ॱङो़न्पा 8 - ॱलोवाथेचे धी़न्बा धाङ सेरगी पो़फोर 1 धेनी लुक्टुगी थेचे धी़न्बागो स्यीयाराङ, नाम्खे श्यीङखामदु छुची फेचो़ जाम्थीङ झ्युवालाक। 2 धेनी को़न्क्षोकगी डुङदु श्युक्कीन नाम्खे भाङछेन धी़नगो, ङी थोजुङ। धेनी खुङक्याला दुङक्षेन धी़न ॱनाङजुङ। 3 धेनी नाम्खे भाङछेन श्येम्मा च्यीक, सेरगी पो़फोर खेरती फेप्जुङ धेनी क्षो़ठीगी डामदु श्यारी श्युक्जुङ। धेनी श्युक्ठीगी दोङदु हो़गीन सेरगी क्षो़ठी खाला, धाम्पे मीक्याई ॱमो़लामक्या पुयेला, खोला पो़ माङा ॱनावालाक। 4 धेनी नाम्खे भाङछेनगी क्षाकने पो़गी धीबागो, धाम्पे मीक्याई ॱमो़लामक्यामुला को़न्क्षोकगी डुङदु याला सोवालाक। 5 धेनी नाम्खे भाङछेनगी पो़फोरगो खेरती, क्षो़ठीगी मेगी पो़फोरगो कावालाक। धेनी साश्यीगी खाला तोरपालाक। धेनी होदुरु डुक्डा धाङ केडा धाङ ॱलोक्मार थो़न्बालाक धेनी सुङगु सोवालाक। दुङक्षेनक्या 6 धेनी दुङक्षेन धी़न हो़गीन नाम्खे भाङछेन धी़न्बोगोक्या, होदेक्या भी़येला डाढीक झ्युवालाक। 7 नाम्खे भाङछेन धाङपोगी़ राङगी दुङक्षेनगो भी़वालाक धेनी होदुरु ठाक ॱरेरा सेरा धाङ मे साश्यीगी खाला भाप्पालाक। धेनी साश्यीगी दुबु सुमने च्यीक धाङ स्यीङदोङक्याई, दुबु सुमने च्यीक धाङ चा ॱङोम्पो घीरी मेगी छीक्पालाक। 8 नाम्खे भाङछेन ॱङीवागी़ राङगी दुङक्षेनगो भी़वालाक धेनी मे भारती धेता, थोङगीन री क्षे च्योक्रे च्यीक, ग्याछोला ॱयुक्पालाक। धेनी ग्याछोगी दुबु सुमने च्यीक ठाकला ग्युरपालाक। 9 धेनी ग्याछो नाङला हो़गीन, सेम्चेन दुबु सुमने च्यीक स्यीवालाक धेनी डुशीङक्याई दुबु सुमने, च्यीक मेताला सोवालाक। 10 नाम्खे भाङछेन सुम्बागी़ राङगी, दुङक्षेनगो भी़वालाक धेनी ॱलोक च्योक्रे भारकीन कारमा क्षे च्यीक, ॱनामने माला चाङबुक्याई दुबु सुमने च्यीक धाङ क्षुमीकक्याई, दुबु सुमने च्यीक खाला ल्हीम्बालाक। 11 होदे कारमागी़ मीङ खाक्ती लाक। धेनी क्षुगी दुबु सुमने च्यीक खाक्ती झ्युवालाक धेनी होदे क्षु खाक्तीगी झ्येरी, मी माङा स्यीवालाक। 12 नाम्खे भाङछेन श्यीवागी़ राङगी दुङक्षेनगो भी़वालाक धेनी ङीमागी दुबु सुमने च्यीक धाङ दावागी दुबु सुमने च्यीक धाङ कारमाक्याई दुबु सुमने, च्यीक खाला फोक्पालाक। धेनी होदेक्याई हो़गी, दुबु सुमने च्यीक मी़नाक्पा झ्युवालाक। होझ्येरी ङीङमो दुबु सुमने च्यीक, हो़ मेगीन झ्युवालाक। देरेराङ झ्येरी छेमोगी दुबु सुमने च्यीकगोवा, हो़ मेगीन झ्युवालाक। 13 धेनी ङी तेवी धेनी ॱनामला फुरती ग्युक्कीन, ॱलाक च्यीक केक क्षेला, देरे ॱनागीनगो ङी घोरजुङ, “धा नाम्खे भाङछेन श्येम्मा सुमगी भी़ये हीन्गीन दुङक्षेनगी दुङकेकगी झ्येरी, जीक्तेनगी मीक्याला ॱङ्यावाली, ॱङ्यावाली, ॱङ्यावाली!” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.