ॱङो़न्पा 7 - ॱलोवाबुम च्यीक धाङ तोङ श्यीपच्यु श्येवी मीला थेचे ग्याप्कीनगी कोर 1 होदे स्याम्ने, साश्यी याङना ग्याछो याङना दोङबो च्यीया खाला ॱलुङबु मीग्युक्वास्योक ॱनेरी, नाम्खे भाङछेन श्यी, साश्यीगी छोक श्यीगारागी ॱलुङबुला काक्ती, साश्यीगी छोक श्यीला श्यारी श्युक्कीनगो, ङी थोजुङ। 2 धेनी स्यार स्योकने, नाम्खे भाङछेन श्येम्मा च्यीकगी सो़न्पो को़न्क्षोकगी थेचे खेरती, याला फेप्कीनगो ङी थोजुङ। धेनी साश्यी धाङ ग्याछोला ॱनो़ क्यायेगी आङजा थोप्था, नाम्खे भाङछेन श्यीला खोङगी सुङकेक क्षेला देरे सुजुङ, 3 “हेक्याई हीकी को़न्क्षोकगी श्याप्चीक्याई टाल्ले खाला थेचे माग्याप थुक्पे, साश्यी याङना ग्याछो याङना दोङबोक्याला ॱनो़ घीया ॱमाक्या।” 4 धेनी ङी थेचे ग्याप सासाक्याई ढाङगागो घोरजुङ। खुङक्या बुम च्यीक धाङ तोङ श्यीपच्यु श्येवी दुक। धेनी खुङक्या ईस्राएल्पा भी़टुकक्याई, ग्युपा हो़लेने दुक। 5 युदागी ग्युपाने तोङ च्युङङी, धेनी रुबेनगी ग्युपाने तोङ च्युङङी, धेनी गादगी ग्युपाने तोङ च्युङङी, 6 धेनी आशेरगी ग्युपाने तोङ च्युङङी, धेनी नाप्थालीगी ग्युपाने तोङ च्युङङी, धेनी मानास्येगी ग्युपाने तोङ च्युङङी, 7 धेनी सीमेयोनगी ग्युपाने तोङ च्युङङी, धेनी लेवीगी ग्युपाने तोङ च्युङङी, धेनी ईस्साकारगी ग्युपाने तोङ च्युङङी, 8 धेनी जेबुलुनगी ग्युपाने तोङ च्युङङी, धेनी योसेफगी ग्युपाने तोङ च्युङङी, धेनी बेन्यामीनगी ग्युपाने तोङ च्युङङीला, थेचे ग्याप्दुक। घो़ काउ घो़न्गा मीछोकगी कोर 9 होदे स्याम्ने सी़याः ढाङगा ग्याप ॱमीथुक्कीन, मीरीक हो़ले धाङ ग्युपा हो़ले धाङ मीमाङ हो़ले धाङ केरीक हो़लेगी, मीछोक क्षे च्यीक श्युक्ठी धाङ लुक्टुगी दोङदु लारी धेगीनगो, ङी थोजुङ। धेनी खुङक्या घो़ काउ घो़न्दी, लाक्पारु स्यीङ तालागी याकाक्या खेरती धेदुक। 10 खुङक्याई केक क्षे ग्याप्ती ॱनेवालाक, “श्युक्ठीरु श्युक्कीन, होरी को़न्क्षोक धाङ लुक्टुने थारपा हो़तालाक।” 11 धेनी नाम्खे भाङछेनक्या घीरी, श्युक्ठी धाङ ॱलोपो़नक्या धाङ सेम्चेन श्यीक्याई थाकोरला श्यारी श्युक्दुक। धेनी खुङक्या श्युक्ठीगी दोङदु क्षाक छारी, को़न्क्षोकला देरे ॱनेरी क्षाक्क्षो़पा पुली, 12 “आमेन। तो़पा धाङ शीजे, स्येराप धाङ काटीन धाङ कुरती, वाङ धाङ नी़थु, होरी को़न्क्षोकला ग्युने ग्युन्दु हुङवास्योक। आमेन।” 13 धेनी ॱलोपो़नक्याने च्यीकगी ङाला ढीजुङ, “दे घो़ काउ घो़न्गाक्या सुले? धेनी खुङक्या घाने होवाले?” 14 ङी खोङला ॱनेवी, “ॱलोपो़न ला, खेराङ राङ खेन्दालाक।” धेनी खोङगी ङाला सुजुङ, “देक्या नी, दुक्पु क्षेने थो़न्दी होवाक्या लाक। धेनी खुङक्याई राङगी घो़, लुक्टुगी ठाकला ठी़री काउ शो़ हो़तालाक।” 15 होझ्येरी “खुङक्या को़न्क्षोकगी श्युक्ठीगी दोङदु दुक, धेनी ङीन-छेन खोङबागी क्षो़खाङदु खोङगी श्याप्ची श्युवालाक। धेनी श्युक्ठीरु श्युक्कीनगी, राङ हो़जारु खुङक्याला क्योङ जेगीलाक। 16 खुङक्या याङ नामा तोक्की मालाक, धेनी याङ नामा खा कोम्गी मालाक। ङीमागी छाबा याङना छाबा घीन्गीयाः खुङक्या खाला फोक्की मालाक। 17 घीझ्येरी ॱनाना श्युक्ठीगी घुङदु श्युक्कीन लुक्टुगो, खुङक्याई लुक्जी झ्युङगीलाक। धेनी खोङबागी खुङक्याला छेसोकगी क्षुमीक डामदु ठीया जेगीलाक। धेनी को़न्क्षोकगी खुङक्याई ॱमीकगी क्षीमाक घीरी फीया जेगीलाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.