ॱङो़न्पा 6 - ॱलोवाथेचेक्याई दो़न 1 धेनी लुक्टुगी़ होदे थेचे धी़नक्याने च्यीक स्यीक्कीनगो, ङी थोङी घाङला सेम्चेन श्यीक्याने च्यीकगी, डुक दीरकीन च्योक्रे केकला “स्योक” ॱनागीनगो, ङी घोरजुङ। 2 धेनी ङी याला तेरी, होदुरु ता काउ च्यीक थोजुङ। होदे खाला श्यो़न्गीनमुला दा च्यीक दुक धेनी होदेला चो़पेन च्यीक तेरजुङ धेनी होदेला ग्यागा थोप्ती, धोराङा ग्यागा थोप्येला थो़न्बालाक। 3 धेनी लुक्टुगी़ थेचे ॱङीवागो स्यीयाराङ, सेम्चेन ॱङीवागी़ “स्योक” ॱनागीनगो ङी घोरजुङ। 4 धेनी होदेने श्येम्मा ता ॱमाउ च्यीक थो़न्दी होवालाक। होदे खाला श्यो़न्गीनगोला जीक्तेनने श्यीदे लेन्दी, मीक्याई च्यीकगी च्यीकला सेदु च्युक्येगी आङजा तेर हो़तालाक। धेनी खोला राल्डी क्षे च्यीक तेर हो़तालाक। 5 धेनी लुक्टुगी़ थेचे सुम्बागो स्यीयाराङ, सेम्चेन सुम्बागी़ “स्योक” ॱनेरी ॱनागीनगो ङी घोरजुङ। ङी तेवी धेनी होदुरु ता नाक्पो च्यीक थोजुङ। धेनी होदे खाला श्यो़न्गीनगी लाक्पाला ॱराङ च्यीक दुक। 6 धेनी होदे सेम्चेन श्यीगी खोक्ने, थो़न्गीन च्योक्रे केक च्यीक देरे ॱनागीनगो ङी घोरजुङ, “ङीमा च्यीकगी ॱलाज्या डो कीलो च्यीक धाङ ङीमा च्यीकगी ॱलाज्या ने, कीलो सुम लाक। धेनी ॱनुम धाङ घुन्क्षाङला क्यो़न ॱमाताङ।” 7 धेनी लुक्टुगी़ थेचे श्यीवागो स्यीयाराङ, सेम्चेन श्यीवागी़ “स्योक” ॱनेरी ॱनागीनगो, ङी घोरजुङ। 8 ङी तेवी धेनी होदुरु ता सेउ च्यीक थोजुङ। होदे खाला श्यो़न्गीनगी मीङगो “छीवा” दुक धेनी स्यीम्पोक्या धेसागो, होदेगी स्याम-स्याम्ला डावालाक। धेनी खुङक्याला राल्डी धाङ मुगे धाङ घो़ने धाङ जीक्तेनगी चेनशेनगी गोने, सेदु च्युक्येला जीक्तेनगी दुबु श्यीने च्यीकगी खाला आङ तेर हो़तालाक। 9 धेनी लुक्टुगी थेचे ॱङावागो स्यीयाराङ, क्षो़ठीगी होकदु को़न्क्षोकगी का धाङ खोङला धेन्पाङ झ्येजागी क्षीला सेसा, मीक्याई सेम्ङीक्या ङी थोजुङ। 10 खुङक्याई के ग्याप्ती देरे ॱनेवालाक, “के कुवाङ को़न्क्षोक, धाम्पा धाङ धेन्पा ला, खेराङगी जीक्तेनदु हो़गीन मीक्याला नाम ठीम्चो़ जेये धेनी हीकी ॱरोक लेन्गीनक्याला नाम डास्या लेन्दा जेये?” 11 खुङक्या घीरीला घो़ काउ ॱनावालाक धेनी खुङक्याई लेरोक धाङ पी़नक्याः खुङक्याला च्योक्रे सेदी, ढाङगा ॱमाछाङगीन थुक्पे, धोराङा च्ये च्यीक ङासुरी धो़क ॱनेरी सुवालाक। 12 धेनी ङी लुक्टुगी थेचे ढुक्पागो, स्यीक्कीनगो थोजुङ। धेनी होदुरु सुङगु क्षे च्यीक होजुङ। धेनी ङीमा नी, चीरे नाक्पो च्योक्रे धाङ दावा नी, ठाक च्योक्रे ॱमाउला ग्युरपालाक। 13 धेनी सेयापगी दोङबोला ॱलुङबु स्युक्क्षेगी घु-घु ताङाराङ, ॱमाछो़छा सेयापक्या माला ल्हीम्गीन च्योक्रे, ॱनामगी कारमाक्या साला ल्हीम्बालाक। 14 धेनी स्योक्टी टीगीन च्योक्रे, ॱनामगो येरी सोवालाक धेनी रीक्या धाङ ॱलीङठेनक्या घीरी, राङगी घोक्जाने पो़वालाक। 15 धेनी जीक्तेनगी ग्यावुक्या धाङ पो़न्पोक्या धाङ ॱमाक्पो़नक्या धाङ क्षुक्पुक्या धाङ आङक्षेक्या धाङ ढेन्योक धाङ राङवाङ हो़गीन, मी घीरी डाक्फुक्या धाङ डाकक्याई खोक्दु हीप्पालाक। 16 खुङक्याई रीक्या धाङ डाकक्याला देरे ॱनेवालाक, “हीकी खाला ल्हीम धेनी श्युक्ठीरु श्युक्कीनगी, श्याल धाङ लुक्टुगी थुक्ठो़ने, हेक्याला भेरोझ्यी। 17 घीझ्येरी ॱनाना खोङबाक्याई थुक्ठो़गी ङीमा क्षेगो ॱलेप्दुक धेनी होदे ङीमाला सु लाङ थुक्कीलाक से?” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.