ॱङो़न्पा 5 - ॱलोवास्योक्टी धाङ लुक्टु 1 धेनी श्युक्ठीरु श्युक्कीनगी क्षाक ॱयेला, छोक ॱङीगाराला ढीक्टा धाङ थेचे धी़न ग्यापक्या स्योक्टीगो, ङी थोजुङ। 2 धेनी नाम्खे भाङछेन वाङक्षे च्यीकगी सुङकेक क्षेला देरे सुङगीनगो, ङी थोजुङ, “दे थेचेक्या कोक्ती, स्योक्टीगो स्यीक्रीन खाये सु हो़ताले?” 3 नाम्खे श्यीङखामदु याङना साश्यीदु याङना सातीङदु स्योक्टी दे खा स्यीक्ती, होदे नाङला ता थुक्कीन सुवा मेतालाक। 4 धेनी ङा ॱमीच्यीकी ङी़वी घीझ्येरी ॱनाना होदे स्योक्टीगो स्यी़ थुप्कीन याङना होदे नाङदु ता थुप्कीन मी सुवाः ॱमाङेबालाक। 5 धेनी ॱलोपो़नक्याने च्यीकगी ङाला सुजुङ, “माङु। तो़दाङ, युदागी ग्युपागी सीङगे धाङ दावीदगी चावा हीन्गीन, खोङबागी ग्याखा थोप हो़तालाक। धेनी खोङबागी स्योक्टीगो खा स्यीक्ती, थेचे धी़नगो कोक थुक्वालाक।” 6 धेनी सेदी श्याकश्या च्योक्रे थोङगीन, लुक्टु च्यीक श्युक्ठी धाङ सेम्चेन श्यीगी घुङदु धाङ ॱलोपो़नक्याई घुङदु श्याङरी श्युक्कीनगो, ङी थोजुङ। होदे लुक्टुला राक्योक धी़न धाङ ॱमीक धी़न दुक। होदेक्या जीक्तेन हो़लेदु झाजा, को़न्क्षोकगी थुक्ङी धी़न लाक। 7 खोङबा फेप्ती श्युक्ठीरु श्युक ॱनाङा जेजा, खोङबागी क्षाक ॱयेने होदे स्योक्टीगो ॱनुमा जेपालाक। 8 धेनी खोङबागी होदे स्योक्टीगो ॱनुमा जेसारती, होदे सेम्चेन श्यी धाङ ॱलोपो़न ङीस्यु चापश्यीगोक्या, लुक्टुगी दोङदु क्षाक छावालाक। खुङ रे-रेगी क्षाकला पीवाङ धाङ पो़ खाङखा सेरगी फोराक्या ॱनुम हो़तालाक। होदे पो़क्या को़न्क्षोकगी मीक्याई पुपा ॱमो़लामक्या लाक। 9 धेनी खुङक्याई तो़लु साबा च्यीक लेन्दी ॱनेवालाक, “खेराङला स्योक्टी दे ॱनुम्ये धाङ होदेगी थेचेक्या कोक थुप्कीन आङजा हो़तालाक, घीझ्येरी ॱनाना खेराङला सेपालाक, धेनी खेराङगी कुठाकगी को़न्क्षोकगी क्षीदु, ग्युपा धाङ केरीक धाङ मी धाङ मीरीकक्याने, मीक्या ङ्यो़वालाक। 10 धेनी खुङक्याला होरी को़न्क्षोकगी क्षीदु ग्याखाप धाङ क्षो़पो़नक्या को़ जेपालाक। धेनी खुङक्याई जीक्तेनदु वाङ झ्यीगीलाक।” 11 धेनी ङी तेवी धेनी श्युक्ठी धाङ सेम्चेनक्या धाङ ॱलोपो़नक्याई थाकोरला, नाम्खे भाङछेन तोङठाक धाङ बुमठाकगी सुङकेक घोरजुङ। 12 खोङबाक्या सुङकेक क्षेला देरे सुङी हो़तालाक, “सेसा लुक्टुगोला, वाङ धाङ नोर धाङ स्येराप धाङ स्युक, धेनी कुरती धाङ शीजे धाङ तो़पा थोप घोयेदुक।” 13 धेनी नाम्खे श्यीङखाम धाङ साश्यी धाङ साश्यी होकला हो़गीनक्या धाङ ग्याछो धाङ होदे नाङला हो़गीन सेम्चेन घीरीगी, देरे ॱनागीनगो ङी घोरजुङ, “श्युक्ठीरु श्युक्कीन धाङ लुक्टुला, तो़पा धाङ कुरती धाङ शीजे धाङ वाङ, ग्युने ग्युन्दु हुङास्योक।” 14 धेनी होदे सेम्चेन श्यीगारागी “आमेन” ॱनेवालाक। धेनी होदे ॱलोपो़नक्याई, ॱली़ साला दाप्ती क्षाक छावालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.