ॱङो़न्पा 4 - ॱलोवानाम्खे श्यीङखामगी श्युक्ठी 1 होदे स्याम्ने, ङी तेवी धेनी नाम्खे श्यीङखामदु घो च्यीक पेरी श्याकश्या, ङी थोजुङ। धेनी ङी एन्योकला घोरका दुङकेकगी केक च्योक्रेगी़ ङाला देरे सुजुङ, “दुरु याला स्योक धेनी दे स्याम्ने झ्युङघोये हीन्गीन दो़नक्या, ङी ख्यो़ला तो़न्दु।” 2 धेनी लाम्साङ ङा धाम्पे थुक्ङीगी खाजुङ। धेनी नाम्खे श्यीङखामदु श्युक्ठी च्यीक दुक धेनी होदे श्युक्ठीगी खाला श्युक्कीन च्यीक दुक। 3 धेनी होदुरु श्युक्कीनगी श्यालगो धो रीन्पोक्षे, याङटी ॱङोम्पो धाङ पेमाराका ॱमाउ च्योक्रे दुक। धेनी श्युक्ठीगी थाकोरला ॱमारके च्योक्रे जा शुक्दुक। 4 होदे श्युक्ठीगी थाकोरला श्युक्ठी ङीस्यु चापश्यी दुक। धेनी उला सेरगी चो़पेन धाङ घो़ काउ घो़न्गा, ॱलोपो़न ङीस्यु चापश्यी होदे श्युक्ठीक्याखाला श्युक्कीनगो ङी ज्याजुङ। 5 धेनी होदे श्युक्ठी नाङने ॱलोक्मारगी, हो़क्या धाङ धीरडा धाङ डुककेगी डाक्या थो़न्दी होवालाक। धेनी होदे श्युक्ठीगी दोङदु मेगी क्युङ धी़न भारती धे हो़तालाक। होदेक्या नी, को़न्क्षोकगी थुक्ङी धी़न लाक। 6 धेनी श्युक्ठीगी दोङदु दाङस्येल च्योक्रे, स्येगी ग्याछो च्योक्रे च्यीक दुक। धेनी श्युक्ठीगी थाकोर धाङ छोक ॱङीगाराला दोङ धाङ ग्याप ॱङीगाराला, ॱमीक हो़गीन सेम्चेन श्यी हो़तालाक। 7 सेम्चेन धाङपोगो सीङगे च्योक्रे धाङ ॱङीवागो, ॱलुङ च्योक्रे धाङ सुम्बागो मीगी ङोरोङ च्योक्रे धाङ श्यीवागो फुरती धेगीन झ्यालाक च्योक्रे हो़तालाक। 8 होदे सेम्चेन श्यीगाराला स्योक्पा ढुक-ढुक हो़तालाक धेनी होदेगी छोक घीरी धाङ स्योक्पागी नाङ स्योकला, ॱमीकक्याई खारी धे हो़तालाक। धेनी ङीन-छेन खुङक्या छाम मेश्या, देरे ॱनेरी ॱलु ताङी, “धाम्पा, धाम्पा, धाम्पा, चोवो कुवाङ को़न्क्षोक दुक। खोङ एम्मा श्युक ङ्युङ हो़क धेनी धान्दा श्युक्दुक धेनी स्याम्ला फेप्ये हीन्गीनगो लाक।” 9 धेनी होदे सेम्चेनक्याई श्युक्ठीरु श्युक्वा जेगीन धाङ धी़ तेन्दु ॱनेया जेगीन, खोङबाला शीजे धाङ कुरती धाङ थुक्जे पुली घाङला, 10 होदे ॱलोपो़न ङीस्यु चापश्यीगो श्युक्ठीरु श्युक्वा जेगीनगी, दोङदु क्षाक छाली धेनी धी़ तेन्दु ॱनेया जेगीनगोला, खुङक्या क्षाक्क्षो़पा पुली। धेनी खुङक्याई राङ-राङगी चो़पेनक्या श्युक्ठी दोङदु श्याक्ती देरे ॱलु पुली, 11 “होरी चोवो धाङ को़न्क्षोक, खेराङला शीजे धाङ कुरती धाङ वाङ थोप घोयेदुक। घीझ्येरी ॱनाना हो़गीन घीरी खेराङगी को़ जेपालाक, धेनी खेराङगी थुकोङला तेन्ती, होदेक्या झ्युवालाक धेनी को़पालाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.