ॱङो़न्पा 16 - ॱलोवाको़न्क्षोकगी थुक्ठो़गी फोरा धी़न 1 धेनी क्षो़खाङ नाङने, सुङकेक क्षे च्यीकगी, नाम्खे भाङछेन धी़नला देरे सुङगीनगो ङी घोरजुङ, “खेक्या सोङ धेनी को़न्क्षोकगी थुक्ठो़गी फोरा धी़नगो साश्यी खाला पो़।” 2 धेनी नाम्खे भाङछेन धाङपोगो सोरी, राङगी फोरागो साश्यी खाला पो़वालाक। धेनी सेम्चेनगी ताक हो़गीन धाङ होदेगी कुला क्षाक्क्षो़पा पुगीन, मी घीरीला जीक्टाक्षे धाङ शुकक्षे ग्याप्कीन ॱमा थो़न्बालाक। 3 धेनी नाम्खे भाङछेन ॱङीवागी़ राङगी फोरागो, ग्याछो खाला पो़वालाक। धेनी होदेगो मी स्यीस्यागी ठाक च्योक्रे झ्युवालाक धेनी ग्याछो नाङ हो़गीन ॱरोक हो़गीन, सेम्चेन घीरी स्यीवालाक। 4 धेनी नाम्खे भाङछेन सुम्बागी़ राङगी फोरा, चाङबु धाङ क्षुमीकक्याई खाला पो़वालाक धेनी होदेक्या ठाक झ्युवालाक। 5 धेनी क्षुक्याई खाला आङजा झ्यीगीन, नाम्खे भाङछेनगी़ देरे सुङगीनगो ङी घोरजुङ, “के धाम्पा को़न्क्षोक, धान्दा श्युक ॱनाङगीन धाङ एम्मा श्युक ङ्युङ हो़गीन, खेराङ राङगी ठीम्चो़ला ढाङपो दुक। 6 खुङक्याई खेराङगी धाम्पे मीक्या धाङ ॱङो़नस्येखेनक्याला सेसा झ्येरी, खेराङगी खुङक्याला ठाक थुङदु च्युक्पालाक। दे नी खुङक्याला झ्युङ घोयेराङ लाक।” 7 धेनी क्षो़ठीने देरे सुङगीनगो, ङी घोरजुङ, “लाक, के चोवो कुवाङ को़न्क्षोक, खेराङगी ठीम्चो़ नी धेन्पा धाङ ढाङपो दुक।” 8 धेनी नाम्खे भाङछेन श्यीवागी़ राङगी फोरागो, ङीमा खाला पो़वालाक। धेनी मीक्याला मेगी ॱराक्येगी, आङजा ङीमाला तेरपालाक। 9 धेनी खुङक्या छाबा छा राक्ती छीक्पालाक धेनी खुङक्याई दे दुक्पुक्याई खाला आङजा हो़गीन, को़न्क्षोकगी छेनला कुरवा धेप्पालाक। हीना खुङक्या राङगी धीक्पा पारी, सेम ग्युरये धाङ खोङबाला तो़पा पुयेला माङेन्बालाक। 10 धेनी नाम्खे भाङछेन ॱङावागी़ राङगी फोरागो, होदे सेम्चेनगी श्युक्ठी खाला पो़वालाक। धेनी होदेगी ग्यासीगो मी़नाक्पा झ्युवालाक। धेनी मीक्या दुक्पु क्षेगी झ्येरी, राङगी च्येमोला सो ग्याप्पालाक। 11 धेनी खोराङक्याई शुक धाङ ॱमागी झ्येरी, नाम्खे श्यीङखामगी को़न्क्षोकला कुरवा धेप्पालाक हीना राङगी झ्येजा लेङेनक्या पारी सेम ग्युरवा ॱमातावालाक। 12 धेनी नाम्खे भाङछेन ढुक्पागी़, राङगी फोरागो चाङबु क्षे युफारेटगी खाला पो़वालाक। धेनी स्यार स्योकने, हुङये हीन्गीन ग्यावुक्याई लाम डाढीक झ्यीयेगी क्षीदु, होदे चाङबुगी क्षु काम्बालाक। 13 धेनी ङी होदे डुकगी खा धाङ सेम्चेनगी, खा धाङ ॱङो़नस्येखेन शोक्पोगी खाने, भावा च्योक्रे सेम्ङी ॱमेचाङा सुम थो़न्दी हुङगीनगो थोजुङ। 14 देक्या नी ॱहालेवा ताकक्या तो़न्गीन डेगी सेम्ङीक्या लाक। कुवाङ को़न्क्षोकगी ङीमा खाक्क्षेगोला, ॱमाक टाप्येगी क्षीदु दे, सेम्ङीक्या जाम्बुलीङ घीरीगी ग्यावुक्या चारु सोरी खुङक्याला रुप्पालाक। 15 “तो़दाङ, ङा कुमु च्योक्रे ॱहाताक्पाला हुङयेहीन। धेनी ॱमाराङा मीग्युक्ये धाङ ङोजा मीझ्युङयेगी क्षीदु, ॱङी मालोक्वा राङगी घोलाक घो़न्दी धेगीन मीगो, झ्यीलाप क्षे लाक।” 16 धेनी खुङक्याई ग्यावुक्याला, ईब्रीपा केकला हार-मागेधोन ॱनागीन साजारु रुप्पालाक। 17 धेनी नाम्खे भाङछेन धी़न्बागी़ राङगी फोरागो, ॱलुङला पो़वालाक। धेनी क्षो़खाङगी श्युक्ठीने, सुङकेक क्षे च्यीकगी देरे सुवालाक, “धा जोक्सो।” 18 धेनी ॱलोक्मार धाङ धीरडा धाङ डुक्डाक्या थो़न्बालाक धेनी सुङगु जीक्टाक्षे सोवालाक। साश्यीदु मीरीक को़ने ॱहाला, झ्युङ माङ्युङगीन सुङगु देरे जीक्टाक्षे च्यीक सोवालाक। 19 धेनी बाबीलोनगी ग्याजा क्षेगो दुबु सुमला गेवालाक धेनी साश्यीक्याई ग्याजाक्या धीप्पालाक। को़न्क्षोकगी बाबीलोन ग्याजा क्षेगोला ढेन्बालाक धेनी राङगी थुक्ठो़गी घुन्क्षाङ खाङखा फोरागो, मोला थुङदु च्युक जेपालाक। 20 धेनी ॱलीङठेन घीरी येरी सोवालाक धेनी री घीरी मेगीन झ्युवालाक। 21 धेनी ॱनामने माला कीलो श्यीपच्यु-श्यीपच्यु चो़ हो़गीन, सेरा क्षेक्या मीक्याई खाला भाप्पालाक। धेनी सेरा ग्याप्कीन दुक्पुगी झ्येरी, मीक्याई को़न्क्षोकला कुरवा धेप्पालाक घीझ्येरी ॱनाना दुक्पु दे ॱमीच्यीकी जीक्टाक्षे हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.