ॱङो़न्पा 12 - ॱलोवाभोमो धाङ डुकगी कोर 1 नाम्खे श्यीङखामदु ॱहाङसागीन ताक च्यीक, ङी थोजुङ। भोमो च्यीक ली़ला ङीमा घो़न्गा धाङ काङबी होकला दावा धाङ गोवाला कारमा च्युङङीगी चो़पेन घो़न्गा च्यीक दुक। 2 मी़ फोवाला टु हो़तालाक धेनी मो टु केघु झ्येरी, केशुक ग्याप्ती ङी़ हो़तालाक। 3 धेनी नाम्खे श्यीङखामदु ताक श्येम्मा च्यीक थोवालाक। गोवा धी़न धाङ राक्योक च्यु झ्येजा धेनी गोवा धी़न्बोगी खाला चो़पेन रे-रे घो़न्गा डुक ॱमाउ क्षे च्यीक थोवालाक। 4 धेनी होदेगी ॱङामागी़ ॱनामने कारमा दुबु सुमने च्यीक रुक्ती, साश्यीदु ॱयुक्पालाक। धेनी टु केलुङ मेताला होदे टुगोला मीक्येगी साम्लो तारी, होदे डुकगो होदे टु केये झ्यीगीन भोमोगी़ दोङदु लारी धे हो़तालाक। 5 धेनी होदे भोमोगी़ मीरीक घीरीला च्याकगी भेक्योकगी वाङग्युर झ्यीये हीन्गीन, भीजा च्यीक केवालाक। धेनी मी़ भीजागो को़न्क्षोक धाङ खोङबागी श्युक्ठीगी दोङदु याला खेरपालाक। 6 धेनी भोमोगो रीतोङ स्योकला डो़री सोवालाक। होदुरु मोला ङीमा च्यीकतोङ ङीग्या ढुकच्यु थुक्पे सो़क्योङ झ्यीयेला, को़न्क्षोकगी एम्मानेराङ मी़ क्षीला होदे धेजा डाढीक जे हो़तालाक। 7 धेनी नाम्खे श्यीङखामदु ॱमाक झ्युवालाक। धेनी मीकाएल धाङ खी़ भाङछेनक्या धाङ डुक धाङ होदेगी भाङछेनक्या घुङदु ॱमाक टाप्पालाक। 8 हीना होदे डुक धाङ खी़ भाङछेनक्या फाम्बालाक धेनी खुङक्याला नाम्खे श्यीङखामदु धेदु ॱमाच्युक्पालाक। 9 होदे डुक क्षेगो माला ॱयुक्पालाक। दे नी, जीक्तेनगी मी घीरीला ॱली़गीन धी़ याङना सातान ॱनेरी, ॱनागीन एम्मा-एम्मागी डुगो लाक। होदेला साश्यीदु ॱयुक्पालाक धेनी होदेमुला खी़ भाङछेनक्याः ॱयुक्पालाक। 10 धेनी ङी नाम्खे श्यीङखामदु देरे सुङगीन सुङकेक क्षे घोरजुङ, “धा होरी को़न्क्षोकगी थारपा धाङ नी़थु धाङ ग्यासी, धेनी खोङबागी मास्यीकागी आङजागो फेप्दुक। घीझ्येरी ॱनाना होरी को़न्क्षोकगी डुङदु होरी, पी़नक्याला ङीन-छेन क्यो़न चुक्कीन, होदे क्यो़न चुक्कीनगोला माला ॱयुक्दुक। 11 होरी पी़नक्याई लुक्टुगी ठाक धाङ, राङगी धेन्पाङगी छीकगी झ्येरी, होदे क्यो़न चुक्कीनगी खाला ग्यावालाक। धेनी छीवागी खा थुक्पे ॱलेप्घोना, खुङक्याई राङगी ॱरोकला ॱमातेवालाक। 12 होझ्येरी नाम्खे श्यीङखाम, धाङ होदुरु श्युक्कीन खेक्या घाटो झ्यी। हीना साश्यी धाङ ग्याछो दे, ॱङ्यावाली। घीझ्येरी ॱनाना राङगी धी़चो़ ङ्युङा हो़गीनगो स्येरी, धी़कगो खोङडो क्षे लारी, खीकीचारु माला हो हो़तालाक।” 13 धा होदे डुकगी़ राङला साश्यीरु ॱयुक ॱयोवागो थोरी, होदे भीजा केगीन भोमोगोला देपालाक। 14 हीना होदे डुकगी लाकने क्योप्ती, रीतोङ स्योकला फुरती डोयेगी क्षीला, मोला झ्यालाक क्षेगी स्योक्पा ॱङी तेर हो़तालाक। होदे रीतोङ नी, लो सुम धाङ फे थुक्पे होदे भोमोगी सो़क्योङ झ्यीयेगी क्षीदु डाढीक झ्येवालाक। 15 धेनी भोमोगोला क्षुगी ताक्तु च्युक्येला होदे डुकगी, राङगी खाने भोमोगी स्याबाला चाङबु च्योक्रे क्षु तो़न्बालाक। 16 हीना साश्यीगी भोमोगोला रोवा झ्यीयेला, राङगी खा पेरी डुकगी खाने तो़न्दा क्षु चाङबुगो मीक्पालाक। 17 धेनी होदे डुकगो होदे भोमोमुला खोङडो लावालाक धेनी मी़ टुवा श्येम्माक्यामुला टाप्तु सोवालाक। याङना को़न्क्षोकगी का ॱरुङगीनक्या धाङ येशुगी पाङपो झ्यीगीनक्यामुला टाप्तु सोवालाक। 18 धेनी डुकगो, ग्याछोगी डामदु लारी धेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.