ॱङो़न्पा 11 - ॱलोवापाङपो ॱङीगी कोर 1 होदे स्याम्ने छे ग्याप्कीन स्यीङ च्योक्रे, ग्युक्पा च्यीक ङाला ॱनाङजुङ धेनी ङाला सुजुङ, “सोङ धेनी को़न्क्षोकगी क्षो़खाङ धाङ क्षो़ठीगी छे ग्योप धेनी होदुरु क्षाक्क्षो़पा पुगीन, मीक्याई ढाङगा ग्योप। 2 हीना क्षो़खाङ फीला हो़गीन, आङगुगो भोर श्योक धेनी छे माग्याप घीझ्येरी ॱनाना होदे मीरीकक्याला ॱनाङ हो़तालाक धेनी खुङक्याई धाम्पे ग्याजाला, दावा श्यीपच्यु श्येङी थुक्पे काङबी ॱलेगीलाक। 3 धेनी ङी पाङपो ॱङीउगोला, ङा ङीमा तोङ च्यीक धाङ ङीग्या ढुक्चु थुक्पे, चारे घो़न्दी ॱङो़न स्येयेगी आङ तेरयेहीन।” 4 खुङक्या नी, साश्यीगी चोवोगी दोङदु लाङदी धेगीन, क्युरुस्यीङगी दोङबो ॱङी धाङ क्युङ ॱङीउ लाक। 5 धेनी खुङक्याला ॱनो़ क्याये दो़पा झ्यीना, खुङक्याई खाने मे थो़न्दी राङगी डाक्याला मेताला ताङालाक। धेनी खुङक्याला ॱनो़ क्याङी दो़गीन रे हो़ना, होदेला देरेराङ झ्येरी सेगीलाक। 6 खुङक्याई ॱङो़नस्ये स्येगीन ङीमाक्याला क्षावा माग्यास्योक ॱनेरी, ॱनामक्या खा काक्येगी नी़थु खुङक्याला हो़तालाक। धेनी क्षुक्याला ठाक शोये धाङ साश्यीरु, राङगी थेगीनगी धी़ला दुक्पु ॱना घीरी, खेरती हुङयेगी नी़थु खुङक्याला हो़तालाक। 7 धेनी खुङक्याई राङगी धेन्पाङगो झ्येसारती, थी मेगीन दोङ-दोङने थो़न्दी हुङगीन सेम्चेनगो, खुङक्यामुला थाप्कीलाक धेनी खुङक्या खाला ग्यारी खुङक्याला सेगीलाक। 8 धेनी खुङक्याई चोवोला ग्याङस्यीङ खाला क्याङक्या, ग्याजा हीन्गीन ग्याजा क्षेगी ॱराङगाकला, खुङक्याई रोगो लेरी धेगीलाक। दे ग्याजा क्षेला सादोम याङना एजेप ॱनेरी, मीङ ताक हो़तालाक। 9 ङीमा सुम धाङ फे थुक्पे मीमाङक्या धाङ ग्युपाक्या धाङ केरीकक्या धाङ मीरीकक्याई, खुङ ॱङीउगी रोला तेरी धेगीलाक धेनी खुङक्याई रोक्या भारु ॱमीच्युक्कीलाक। 10 साश्यीदु हो़गीन मीक्या, खुङक्या ढोङगीनगोला ङ्यामो घागीलाक धेनी घाटो झ्यीगीलाक धेनी ॱहाला-छुला ॱङेन्बा तेरकीलाक। घीझ्येरी ॱनाना होदे ॱङो़नस्येखेन ॱङीउगी साश्यीरु धेगीनक्याला, दुक्पु तावालाक। 11 हीना ङीमा सुम धाङ फे स्याम्ने, को़न्क्षोकने छेसोकगी उपगो खुङक्याई नाङला जुवालाक धेनी खुङक्या काङबा चुक्ती लाङबालाक धेनी खुङक्याला थोङगीन घीरीगी, खाला जीक्टाक्षे केवालाक। 12 धेनी नाम्खे श्यीङखामने, खुङक्याला देरे सुङगीन सुङकेक क्षे च्यीक, खुङक्याई घोरपालाक, “दुरु याला स्योक।” धेनी खुङक्या नाम्खे श्यीङखाम स्योकला, ॱरीङबा नाङला फेप्पालाक धेनी खुङक्याई डाक्याई खुङक्याला तेरी धेबालाक। 13 होदे धी़लाराङ सुङगु क्षे च्यीक सोवालाक धेनी ग्याजागी दुबु च्युने च्यीक धीप्पालाक। धेनी सुङगुगोला मी तोङ धी़न स्यीवालाक। धेनी ल्हाक्मा ल्हाक्लाक्या जीक्पालाक धेनी खुङक्याई नाम्खे श्यीङखामगी, को़न्क्षोकला तो़पा पुवालाक। 14 धा दुक्पु ॱङीवागो जोक्पालाक। धेनी दुक्पु सुम्बागो ग्योक्वा हुङी हो़तालाक। दुङक्षेन धी़न्बागो 15 धेनी नाम्खे भाङछेन धी़न्बागी़ राङगी दुङक्षेनगो भी़वालाक धेनी होदे स्याम्ने नाम्खे श्यीङखामदु सुङकेक क्षेक्याई देरे सुवालाक, “जीक्तेनगी ग्यासी, होरी चोवो धाङ खोङबागी मास्यीकागी ग्यासी झ्युदुक। धेनी खोङबागी ग्युने ग्युन्दु वाङग्युर जेगीलाक।” 16 धेनी को़न्क्षोकगी दोङदु राङ-राङगी श्युक्ठीगी खाला श्युक्कीन, ॱलोपो़न ङीस्यु चापश्यीक्याई क्षाक क्षारी, को़न्क्षोकला क्षाक्क्षो़पा पुरी 17 सुवालाक, “धान्दा श्युक हो़गीन धाङ एम्मा श्युक ङ्युङ हो़गीन धाङ चोवो कुवाङ को़न्क्षोक ला, हेक्या खेराङला काटीन्क्षे श्युवाहीन। घीझ्येरी ॱनाना खेराङगी राङगी वाङ क्षेगो श्येला जेदी, वाङग्युर जेयेगो चुक जेपालाक। 18 मीरीकक्या खोङडो लावालाक, हीना खेराङगी थुक्ठो़ फोक्येगी धी़गो ॱलेप्दुक। स्यीम्बुक्याला ठीम्चो़ जेये, धाङ खेराङगी श्याप्ची ॱङो़नस्येखेनक्या धाङ धाम्पे मीक्या, धेनी खेराङगी छेनला जीक्नाङ झ्यीगीन क्षे-च्युङ घीरीला, ज्यागा ॱनाङयेगी धी़गो ॱलेप्दुक। धेनी जीक्तेनला तोरस्यीक ताङगीनक्याला, मेताला ताङयेगी धी़गो ॱलेप्दुक।” 19 धेनी नाम्खे श्यीङखामदु को़न्क्षोकगी क्षो़खाङगी घोगो बेवालाक धेनी खोङबागी क्षो़खाङ नाङदु, खोङबागी धाम्चागी गामगो थोवालाक। धेनी होदुरु ॱलोक्मार धाङ धीरडा धाङ डुक्डाक्या थो़न्बालाक। धेनी सुङगु सोवालाक धेनी सेरा क्षेक्या भाप्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.