ॱङो़न्पा 10 - ॱलोवानाम्खे भाङछेन धाङ स्योक्टी च्यीमेगी कोर 1 धेनी ङी नाम्खे श्यीङखामने श्येम्मा आङक्षे नाम्खे भाङछेन च्यीक, भाप्ती फेप्कीनगो थोजुङ। खोङ नी, ॱरीङबागी तुम्दा धाङ खोङगी उला जा हो़तालाक। धेनी खोङगी श्यालगो ङीमा च्योक्रे, धाङ श्यापक्या नी मेगी कावा च्योक्रे हो़तालाक। 2 खोङगी क्षाकला स्यीक्ती श्याकश्या, स्योक्टी च्यीमे च्यीक हो़तालाक। धेनी खोङगी श्याप ॱयेगो ग्याछो खाला धेनी श्याप ॱयो़म्बागो सा खाला श्याक्दुक। 3 धेनी सीङगेगी ङारके च्योक्रे, खोङगी सुङकेक क्षेला भो़वालाक। धेनी खोङगी भो़टाकगी स्याम्ने, डुक्के धी़नगी केक ग्याप्जुङ। 4 धेनी होदे डुक्के धी़नगी केक ग्यावाराङ, ङी होदे ढीक्कु झ्येवी हीना नाम्खे श्यीङखामने देरे सुङगीन सुङकेक च्यीक ङी घोरजुङ, “होदे डुक्के धी़नगी सुङकेकगो ख्यी़ माढीक्वा, साङवा स्योक।” 5 धेनी ग्याछो धाङ सागी खाला श्यारी श्युकश्या, ङी थोङगीन नाम्खे भाङछेनगी़ राङगी क्षाक ॱयेगो, नाम्खे श्यीङखाम स्योकला क्याजुङ। 6 धेनी नाम्खे श्यीङखाम धाङ होदे नाङदु हो़गीन धेनी साश्यी धाङ होदे नाङ हो़गीन धेनी ग्याछो धाङ होदे नाङ हो़गीन घीरी, को़ जेगीन धाङ ग्युने ग्युन्दु ॱनेगीन, खोङगी छेनला उ ॱना श्येरी, खोङगी सुवालाक, “धा देने ल्हाक धाला झ्युङगीमालाक। 7 हीना नाम्खे भाङछेन धी़न्बागी़ राङगी दुङक्षेन भी़गु झ्यीयेगी ङीमागोला, को़न्क्षोकगी राङगी श्याप्ची ॱङो़नस्येखेनक्याला सेटाक झ्येजा च्योक्रे, राङगी साङवागो डुप्कीलाक।” 8 धेनी नाम्खे श्यीङखामने ङी घोरका सुङकेकगी, ङाला याङदा देरे सुजुङ, “सोङ धेनी ग्याछो धाङ सागी खाला श्यारी श्युकश्या, नाम्खे भाङछेनगी क्षाकला स्यीक्ती, श्याकश्या स्योक्टीगो लेन।” 9 होझ्येरी ङा होदे नाम्खे भाङछेन चारु सोरी, होदे स्योक्टी च्यीमेगो ॱनाङयेला श्यी़वी। खोङगी ङाला सुजुङ, “दे लेन धेनी शो। दी ख्यी़ फोवा नाङदु खाक्ती झ्युङगीलाक हीना ख्यी़ खाला ढाङची च्योक्रे, ॱङाम्मो झ्युङगीलाक।” 10 धेनी ङी नाम्खे भाङछेनगी क्षाकने स्योक्टी च्यीमेगो लेन्बी धेनी होदे शेवी। धेनी ङी खारु होदे ढाङची च्योक्रे ॱङाम्मो झ्युजुङ हीना शेसारती, ङी फोवागो खाक्ती झ्युजुङ। 11 धेनी ङाला देरे सुजुङ, “ख्यी़ मीमाङ धाङ मीरीक धाङ केरीक धाङ ग्यावु माङागी कोरला, याङ ॱङो़न स्येघोगुलाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.