ॱङो़न्पा 1 - ॱलोवाङोटो़ 1 ग्योक्जे डुप्घोये हीन्गीन ॱनेछुक्या, राङगी श्याप्चीपाक्याला तो़न्येगी क्षीदु, को़न्क्षोकगी येशु मास्यीकाला ॱनाङा जेजा ॱङो़न्पागो दे लाक। दे नी, खोङबागी राङगी भाङछेनला राङगी श्याप्ची, योहान्नाचारु झाङा जेदी ॱङो़न जेपालाक। 2 धेनी योहान्नागी को़न्क्षोकगी का धाङ येशु मास्यीकागी पाङपो झ्येरी, राङगी थोथा घीरीला धेन्पाङ झ्येवालाक। 3 धा दे ॱङो़नस्येगी छीकक्या केक ग्याप्ती, ॱलोक्कीनक्या झ्यीलाप क्षे लाक। धेनी दी नाङला ढीक्टाक्या ङेन्दी, ॱरुङगीनक्या झ्यीलाप क्षे लाक। घीझ्येरी ॱनाना धी़चो़गो नी ङे ॱलेप्दुक। क्षो़छोक धी़नला छाम्डी 4-5 ङा योहान्नाने, एशीयादु हो़गीन क्षो़छोक धी़नला, यीक दे पुलाहीन। धान्दा श्युक हो़गीन धाङ एम्मा श्युक ङ्युङ हो़गीन धाङ स्याम्ला फेप्ये हीन्गीन को़न्क्षोकने, धेनी खोङगी श्युक्ठी दोङदु हो़गीन थुक्ङी धी़न धाङ धेन्पागी पाङपो जेगीन स्यीम्पोक्याने, धाङपो सो़न्पो श्याङा जेजा धाङ जाम्बुलीङगी ग्यावुक्याई खाला वाङ जेगीन, खोङ येशु मास्यीकागी थोक्ने, थुक्जे धाङ श्यीदे खेक्याला थोप्पास्योक। होराङक्याला झाम्पा जेगीन धाङ राङगी कुठाकगी थोक्ने, होरी धीक्पाक्याने होराङला थारपा जेगीन 6 धेनी होराङला खोङगी याप को़न्क्षोकला श्याप्ची श्युयेला, ग्यासी धाङ क्षो़पो़न जेगीन, खोङबाला शीजे धाङ वाङ ग्युने ग्युन्दु हुङवास्योक। आमेन। 7 “तो़दाङ, खोङबा ॱरीङबाक्याई खोक्ने फेवी।” धेनी “ॱमीक घीरीगी खोङला ज्यागीलाक, धेनी खोङबाला दुङ चुक्कीनक्यागीयाः ज्यागीलाक।” धेनी जीक्तेनगी मी घीरी “खोङबागी दो़न्दु ङुता ग्याप्कीलाक।” ताम दे धेन्पा झ्युङास्योक। आमेन। 8 “ङा नी, आल्फा धाङ ओमेगागो हीन।” सुरी, चोवो को़न्क्षोक सुङालाक। खोङबा श्युक हो़गीन धाङ एम्मा श्युक ङ्युङ हो़गीन धाङ स्याम्ला फेप्ये हीन्गीन, ॱलानामेपे को़न्क्षोक लाक। योहान्नागी थोङनाङला मास्यीका ज्यावा 9 येशुगी थोक्ने, दुक्पु धाङ को़न्क्षोकगी ग्यासी धाङ शो़पागी नाङला, खेक्याई रोवा धाङ पी़न ङा योहान्ना हीन। ङा नी, को़न्क्षोकगी का धाङ येशुला पाङपो झ्येजागी केनगी, पादमोस ॱनागीन ॱलीङठेनदु हो़तालाक। 10 धेनी चोवोगी ङीमागोला, ङा धाम्पे थुक्ङीगी वाङ होकला हो़तालाक। धेनी ङी ग्यापने दुङक्षेन क्षेगी के च्यीक च्योक्रे, केक क्षे च्यीक ङी घोरजुङ। 11 होदेगी “ख्यी़ घी थोङगीनगो धेपला ढीक धेनी दे क्षो़छोक धी़नक्या, एफीसु धाङ सीमीरना धाङ पेरगामोन धाङ थीयातीरा धाङ सारती धाङ फीलादेल्फीया धाङ लाउदीकेयाला कुर।” सुरी सुङजुङ। 12 धेनी ङाला कामो़न सुङगीन सुङकेक स्योकला, ङी खा ॱलोक्ती तेवी। धेनी ॱलोक्ती ती घाङला, होदुरु सेरगी क्युङ धी़न, 13 धाङ होदे क्युङक्याई खोकला मी-भु च्योक्रे, मी च्यीक श्याप थुक्पे नाशा ॱनुम्ना धाङ कुडाङला सेरगी कुराक ॱनुम्ना च्यीक, ङी ज्याजुङ। 14 खोङबागी उगी उटा नी, ॱरीङबा काउ च्योक्रे धेनी खावा काउ च्योक्रे धेनी खोङबागी चेन नी, मेचे च्योक्रे दुक। 15 खोङबागी श्याप नी, मेथाप नाङ हो़ ठाछाई झ्येजा लीदीङ च्योक्रे धाङ खोङबागी सुङकेक नी, क्षु चाङबुगी हुरडा च्योक्रे दुक। 16 खोङबागी क्षाक ॱयेला कारमा धी़न ॱनुम हो़तालाक धेनी खोङबागी श्यालने खा ॱङीगारा ॱनोवा हो़गीन, राल्डी च्यीक थो़न्बालाक। खोङबागी श्याल्दोङगो ङीङमोगी ङीमा च्योक्रे, स्यार हो़तालाक। 17 ङी खोङबाला ज्याली घाङला, ङा खोङबागी श्याप डुङदु मी स्यीस्या च्योक्रे ग्येवी। हीना खोङबागी राङगी क्षाक ॱये, ङी खाला श्या जेदी सुवालाक, “ख्यो़ माजीक। ङा नी थोक्मा धाङ थामागो हीन। 18 ङा नी सो़न्पोगो हीन। एम्मा ङा स्यीवालाक धेनी धान्दा तो़दाङ, ङा धी़ तेनगी क्षीदु सो़न्पो हो़क। धेनी ङाला छीवा धाङ स्यीम्पोक्या, धेसागी धीमीकक्या हो़क। 19 होझ्येरी ख्यी़ थोथा धाङ धान्दा हो़गीन धाङ माउपारला झ्युङये हीन्गीनगो ढीक। 20 धा ख्यी़ ङी लाक्पा ॱये स्योकला थोङगीन, कारमा धी़न धाङ सेरगी क्युङ धी़नगी साङवागो नी दे लाक, कारमा धी़नक्या क्षो़छोक धी़नगी भाङछेनक्या लाक धेनी क्युङ धी़नगो, क्षो़छोक धी़न्बोगो लाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.