फीलेमोन 1 - ॱलोवा1 मास्यीका येशुगी दो़न्दु चो़न्पा हीन्गीन, ङा पाउलु धाङ होरी पी़न तीमोथेउने, हीकी चेवे लेरोक फीलेमोन 2 धाङ हीकी नुमो आफीया धाङ होरी ॱमाक्ढोक आरकीप्पो धाङ ख्यी़ नाङदु छोक्कीन क्षो़छोकला, 3 होरी याप को़न्क्षोक धाङ चोवो येशु मास्यीकाने, खेक्याला थुक्जे धाङ श्यीदे थोप्पास्योक। काटीन्क्षे धाङ ॱमो़लाम श्यी़वा 4 ङी ॱमो़लामला ख्यो़ला ढेन्दी घाङला, ङा च्योई को़न्क्षोकला काटीन्क्षे श्यी़लीहो़क। 5 घीझ्येरी ॱनाना चोवो येशुला ख्यी़ धेपा धाङ धाम्पे मी घीरीगी क्षीला, ख्यी़ चेवे कोरला ङी घोरी। 6 धा मास्यीकागी क्षीदु धेपा च्यीक्पा हीन्गीनक्यामुला, ख्यी़ थी़न्ढीकगी थोक्ने, होराङला हो़गीन शाङा घीरीगी स्येरापला, ख्यो़ फेलास्योक ॱनेरी ङा ॱमो़लाम श्यी़हो़क। 7 ङी पी़न ख्यी़ धाम्पे मीक्याला सेम्सो पारती, ख्यी़ झाम्पाने ङाला घाटो धाङ सेमस्युक क्षे थोप्सुङ। ओनीसीमुगी दो़न्दु पाउलुगी श्योवा पुवा 8 ख्यी़ घी झ्यीघोगीनगोला मास्यीकागी थोक्ने, ङी ख्यो़ला का तेरयेगी ॱलोगोक हो़नाः, 9 झाम्पे केनगी ङा ख्यो़ला श्योवा पुलाहीन, ङा मी घेबो पाउलु, मास्यीका येशुगी दो़न्दु चो़न्पा च्यीक, 10 ङी भीजा च्योक्रे हीन्गीन ओनीसीमुगी दो़न्दु रेभो़ श्युवाहीन। चो़न्खाङदु ङा खी़ आकी झ्युवालाक। 11 एम्मा खो ख्यो़ला फेन ॱमाथोक्पालाक। हीना धान्दा, खो ख्यो़ धाङ ङा ॱङीगारागी क्षीला फेन थोवा झ्युदुक। 12 ङी ॱङीङगी चेवे खोला ख्यी़चारु ॱलोक्ती ताङाहीन। 13 ङा ताम्शाङगी केनगी चो़न्खाङदु हो़धी़, ख्यी़ छापला खी़ ङाला श्याप्ची श्यी़येला, ङी खोला ङाराङमुला श्याक्येगी दो़पा हो़क। 14 हीना ख्यी़ ले शाङागो उजुक झ्येरी मेन्दा, खेरी राङगी दो़पागी झ्यीयेगी क्षीला, ङी ख्यी़ साम्सु ॱमास्येवा घीया झ्यीये मादो़। 15 होझ्येरी खो तेन्दु ख्यो़ला थोप्येगी क्षीला, खी़मुला धी़ तीते च्यीक खा डावा हीन्ढु। 16 धा देने ॱहाला खो ढेन्योक मेन्दा, हीना ढेन्योकले ल्हाक चेवे पी़न च्योक्रे लाक। ॱमीक्सेदु ङी क्षीदु हीना ख्यी़ क्षीदु खो देने ल्हाक ढेन्योक धाङ चोवोगी नाङ चेवे पी़न लाक। 17 होझ्येरी खीकी ङाला राङगी लेरोक चीली हो़ना, खोला ङाला च्योक्रे खेलेन झ्यी। 18 खी़ ख्यो़ला ङेन्पा रे झ्येहो़ना याङना ढीन्लेन रे ॱलोक्ये हो़ना, होदे ङी ची खाला थो ग्योप। 19 ङा पाउलु ङाराङगी लाक्पागी दे ढीयाहीन, ङी होदे जाङु। हीना ख्यी़ मीछेगी ढीन्लेनगो, ङी केनगी हीन्गीनगो ख्यो़ला ॱनाघोगुमालाक। 20 ङी पी़न, ङी क्षीदु दे लेगा दे झ्यीरोझ्यी ॱनेरी, ङा चोवोगी थोक्ने श्युवाहीन। मास्यीकागी नाङ ङी सेम घारु च्युक। 21 ख्यी़ ङी खाला ङेन्गीलाक ॱनेरी, ङाला यीच्चे तेन्पो हो़क। ख्यी़ ङी श्यी़गीनने ल्हाक झ्यीगीलाक ॱनेरी, स्येरी ख्यो़ला यीक दे ढीक्वाहीन। 22 खेक्यागी ॱमो़लामगी झ्येरी, ङा खेक्याचारु हुङयेगी रेवा श्याक्ती, ङी क्षीला डो़न्खाङ च्यीक डाढीक झ्यी। 23 मास्यीका येशुगी नाङदु ङी चो़न्पा रोवा एपाब्रागी ख्यो़ला छाम्डी श्यी़क। 24 धेनी ङी लेरोक हीन्गीन, मारकु धाङ आरीस्तारकु धाङ देमा धाङ लुकागीयाः ख्यो़ला छाम्डी श्यी़क। 25 चोवो येशु मास्यीकागी थुक्जे, खेक्याला थोप्पास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.