लुका 1 - ॱलोवाङोटो़ 1 हीकी घुङदु झ्युजा लोग्युक्याई कोरला, मी ॱमीच्यीकी माङागी ढीक्दुक। 2 दे लेगा घीरी गोमाने थोथा, मीक्या धाङ कागी श्याप्तोक्पा हीन्गीन, मीक्याने हीकी ॱहाघोगीन च्योक्रे होदेक्याई ढीक्दुक। 3 ङीयाः होदे घीरी थोक्माने श्यीप्ता झ्येजा झ्येरी, खोङबा थेउफीलु लागी क्षीदु होदेगी कोरला, होदे धी़चो़ला च्यीकगी स्याबाने च्यीक झ्युजा च्योक्रे, ढीक्ये ढो़ झ्येवी। 4 दे नी खेराङला घी ॱलाप्लागो धेन्पा लाक, ॱनेरी तेन-तेन ॱहाघोयेगी क्षीदु ङी ढीक्वालाक। ठी़सो़खेन योहान्ना केयेगी कोरला ॱङो़नस्ये 5 हेरोदे युदेयागी ग्यावु हो़ती घाङला, आबीया ॱनागीन क्षो़पो़नक्याई स्योखाकने, जेकारीयास ॱनागीन क्षो़पो़न च्यीक हो़तालाक। खी़ केमी आरोन ग्युपाने लाक। मी़ मीङ एलीसाबेत लाक। 6 खुङ ॱङीगारा को़न्क्षोकगी डुङदु ढाङपो हो़तालाक धेनी को़न्क्षोकगी का धाङ ठीम घीरी, नोवा क्षुक्वा मीझ्यीदा चीलालाक। 7 हीना खुङ ॱङीउला टुवा मेतालाक घीझ्येरी ॱनाना एलीसाबेत राप्चे लाक धेनी खुङ ॱङीगारा खा घेसा हो़तालाक। 8 श्याक्मो च्यीक जेकारीयास खोरी स्योखाकगी रेमो भाप्ती, को़न्क्षोकगी डुङदु क्षो़पो़नगी लेगा झ्यीदी हो़तालाक। 9 धेनी क्षो़पो़नक्याई ॱरोला तेन्दी, मी माङक्षेगी जेकारीयासला गेन ग्याप्ती, को़न्क्षोकगी क्षो़खाङगी क्षो़ठीरु पो़ पारयेला दाम्बालाक। 10 पो़ पारी घाङला, मीमाङक्या क्षो़खाङ फीला सोवा ग्याई हो़तालाक। 11 धेनी पो़ पारजा क्षो़ठीगी ॱये स्योकला, नाम्खे भाङछेन च्यीक श्यारी श्युक्कीन, जेकारीयासला ज्यावालाक। 12 धेनी जेकारीयास नाम्खे भाङछेनला थोरी छु थोरती जीक्पालाक। 13 हीना नाम्खे भाङछेनगी खोला सुवालाक, “जेकारीयास, माजीक घीझ्येरी ॱनाना को़न्क्षोकगी ख्यी़ सोवा श्यी़गीनगो सेन्दुक। धा ख्यी़ केमी एलीसाबेतगी, ख्यी़ क्षीला भीजा च्यीक केगुलाक धेनी ख्यी़ होदेगी मीङ योहान्ना तोक। 14 ख्यो़ला घाटो धाङ ङ्यामो घा झ्युङगीलाक धेनी खो केरी, मी ॱमीच्यीकी माङा ङ्यामो घागीलाक। 15 घीझ्येरी ॱनाना खो चोवो को़न्क्षोकगी कुम्दीनदु खाक्क्षे हुङगीलाक। धेनी खी़ घुन्क्षाङ याङना श्येम्मा क्षाङक्या थुङये मेतालाक धेनी खोरी आमागी फोवारु हो़ताराङ, खो धाम्पे थुक्ङीगी खाङगीलाक। 16 धेनी खी़ ईस्राएल्पा माङपोला, खुङक्याई चोवो को़न्क्षोक चारु ॱलोक्ती ठीक्ती हुङगीलाक। 17 धेनी आकेक्याई सेम, खोरी टुवाक्या स्योकला ॱलोक्ये धाङ खाला मेङेन्गीनक्याई सेम ढाङपोगी स्येरापला ग्युरये, धेनी चोवोगी क्षीदु मीमाङक्या डाढीक झ्यीयेगी क्षीदु, खो ॱङो़नस्येखेन एलीयाला हो़गीन थुक्ङी धाङ वाङगी गोने चोवोगी एन्ला फेप्कीलाक।” 18 धेनी जेकारीयासगी नाम्खे भाङछेनला श्यी़वालाक, “दे झ्युङगीलाक ॱनेरी ङी घाङगी झ्येरी ॱहाघोरये? ङा नी घेबो झ्युसालाक धेनी ङी केमीगी लोगोवा सोसालाक।” 19 नाम्खे भाङछेनगी खोला सुवालाक, “ङा को़न्क्षोकगी डुङदु लाङदी धेगीन गाबरीएल हीन। ख्यो़ला लाब ताङये धाङ दे ताम्शाङ दे स्येयेला ङाला झावालाक। 20 ङी ॱनागीन लाब दे माडुप्कीन थुक्पे, ख्यो़ लाब ताङ ॱमीथुक्कीन झ्युङगीलाक धेनी लाब ताङ थुक्कीमालाक घीझ्येरी ॱनाना ङी ॱनेना लाब दे धी़चो़ तीक-तीकला डुप्कीलाक हीना ख्यी़ दे लाबला यीच्चे माझ्येजुङ।” 21 धा मीक्या जेकारीयासला फीदारु घुक्ती धे हो़तालाक धेनी क्षो़खाङ नाङदु ॱमीच्यीकी घोरा झ्यीगीनगोला ॱहाङसावालाक। 22 धेनी खो फीला थो़न्दी घाङला, मीक्यामुला लाब ताङ ॱमाथुक्पालाक। धेनी खी़ मीक्याला लागागी जुक्ते झ्येवालाक। हीना लाब ताङ ॱमीथुक्कीनगो खुङक्याई थोरी, धा खी़ क्षो़खाङ नाङदु थोङनाङ च्यीक थोदुक ॱनेरी ॱहाघोरपालाक। 23 जेकारीयासगी श्याप्तोकगी धी़रीम झोक्ती, खो खोरी नाङला सोवालाक। 24 धेनी होदे स्याम्ने खी़ केमी एलीसाबेतगी फोवाला टु झ्युवालाक धेनी दावा ॱङा थुक्पे मो नाङदु हीप्ती धेबालाक। 25 धेनी मी़ ॱनेवालाक, “को़न्क्षोकगी ङाला थुक्जे शीक्ती मीक्याई दोङदु ङी ङोछागो मेगीन जेजुङ।” येशु ठुङये कोरला ॱङो़नस्ये 26-27 एलीसाबेतगी फोवाला टु हो़गीनगी दावा ढुक्पागोला को़न्क्षोकगी गाबरीएल ॱनागीन नाम्खे भाङछेनला, गालील ग्यारापगी नाजारेत ॱनागीन ग्याजारु, मीरीयाम ॱनागीन भोमो नाच्युङमा चारु झावालाक। मो दावीद ग्युपागी योसेफ ॱनागीन मी च्यीकमुला ॱनामाला ॱलारी श्याक हो़तालाक। 28 धेनी नाम्खे भाङछेन मी़ चारु फेप्ती सुवालाक, “थुक्जे थोप्था ख्यो़ला श्यीदे हुङास्योक! को़न्क्षोक ख्यी़मुला श्युक्दुक।” 29 हीना लाब देला जीक्ती नाम्खे भाङछेनगी छाम्डीगी दो़न्दाक घी हीन्ढु, ॱनेरी मो गो थोम्बालाक। 30 धेनी नाम्खे भाङछेनगी मोला सुवालाक, “मीरीयाम, माजीक घीझ्येरी ॱनाना को़न्क्षोकने ख्यो़ला थुक्जे थोप दुक। 31 धा ङेन, ख्यी़ फोवाला टु झ्युरी ख्यो़ला से च्यीक ठुङगीलाक धेनी ख्यी़ होदे सेगी छेन येशु ताक्कीलाक। 32 खोङबा ॱमीच्यीकी खाक्क्षे हुङगीलाक धेनी ॱलानामेपे चोवो को़न्क्षोकगी से ॱनेरी श्यी़गीलाक। धेनी चोवो को़न्क्षोकगी खोङबाला खोङबागी याप दावीदगी श्युक्ठी ॱनाङगीलाक। 33 खोङबा याकोबगी ग्युपा खाला धी़ ग्युन्दु वाङग्युर झ्यीगीलाक धेनी खोङबागी ग्यासीगी था नामा झ्युङगीमालाक।” 34 धेनी मीरीयामगी नाम्खे भाङछेनला श्यी़वालाक, “दे घाङगी झ्येरी झ्युङगीलाक से? घीझ्येरी ॱनाना ङा भोमो नाच्युङ चाङमा च्यीक हीन।” 35 नाम्खे भाङछेनगी लेन ॱलोक्पालाक, “धाम्पे थुक्ङी ख्यी़ खाला भाप्कीलाक धेनी ॱलानामेपे को़न्क्षोकगी वाङगी, ख्यो़ला ढीम्जाकगी काप्कीन च्योक्रे काप्कीलाक। होझ्येरी से ठुङयेगो धाम्पा धाङ को़न्क्षोकगी से ॱनेरी भो़गीलाक। 36 धा ङेन, ख्यी़ पी़न्दा एलीसाबेत खा घेरी टु ॱमेकेगीन राप्चे झ्येरीयाः, धान्दा मी़ फोवाला टु झ्युरी दावा ढुक झ्युसालाक। 37 घीझ्येरी ॱनाना को़न्क्षोकगी जे ॱमीथुप्कीन घीया मेतालाक।” 38 धेनी मीरीयामगी श्यी़वालाक, “ङा को़न्क्षोकगी ॱयोक्मो हीन। खेराङगी सुङगीन च्योक्रे ङाला हुङास्योक।” धेनी नाम्खे भाङछेनगो होदेने लोक्ती फेप्पालाक। मीरीयाम धाङ एलीसाबेतगी थुक्ठे 39 धेनी श्याक्मो घाजीङ स्याम्ने, मीरीयाम छाटाक झ्येरी, युदेयागी री स्योकगी यु च्यीकला सोवालाक। 40 होदुरु मो जेकारीयासगी नाङदु जुरी, एलीसाबेतला छाम्डी श्यी़वालाक। 41 धेनी मीरीयामगी केक घोरती, एलीसाबेतगी फोवा नाङगी टुगो घु-घु झ्येवालाक धेनी एलीसाबेत धाम्पे थुक्ङीगी खारी 42 केक क्षेला ॱनेवालाक, “केमी घीरीने ख्यो़ झ्यीलाप क्षे धेनी ख्यी़ फोवा नाङगी टुगोवा झ्यीलाप क्षे। 43 हीना ङी चोवोगी युम ङीचारु फेप्कीन, देरे काटीन ङाला घाङगी झ्येरी झ्युवाले? 44 तो़दाङ, ख्यी़ छाम्डीगी केक, ङी आमच्योकगी घोरलुङ मेताला, ङी फोवा नाङगी टु ङ्यामो घेरी घुजुङ। 45 चोवोगी मोला सुङगीनगो डुप्कीलाक ॱनेरी यीच्चे झ्यीगीन, मो घीन्गी झ्यीलाप क्षे।” मीरीयामगी को़न्क्षोकला तो़टा पुवा 46 धेनी मीरीयामगी ॱनेवालाक, “ङी ॱङीङने चोवोला तो़टा, 47 को़न्क्षोक ङी क्याम्गो़नला, ङी सेम घावा। 48 घीझ्येरी ॱनाना खोङबागी राङगी ॱयोक्मो ॱङ्यामच्युङला शीया जेदुक, धा धेनी ॱहाला मीराप घीरीगी, ङाला झ्यीलाप क्षे ॱनेरी भो़गीलाक, 49 घीझ्येरी ॱनाना खोङबा कुवाङगी, ङी क्षीला क्षाक्ले क्षे जेदुक। खोङबागी छेन नी धाम्पा लाक। 50 खोङबाला चीगीनक्याला खोङबागी थुक्जे, मीरापने मीराप थुक्पे ख्यावा जेगीलाक। 51 खोङबागी क्षाकगी ॱहाङसागीन क्षाक्लेक्या जे हो़तालाक, धेनी राङगी सेम नाङगी साम्लोक्याला, पोवा केरी धेगीनक्याला खोङबागी ठेथोरी जे हो़तालाक। 52 खोङबागी वाङ झ्यीगीनक्याला, खुङक्याई ठीने माला पाबा जे हो़तालाक, धेनी ॱङ्यामच्युङक्याला, तो़ला ता जे हो़तालाक। 53 खोङबागी तोक्ती धेताक्याला, शाङागी खाङा जे हो़तालाक, धेनी क्षुक्पुक्याला, खोङबागी तोङबा तो़न जे हो़तालाक। 54-55 खोङबागी होरी धाङबी फामाक्याला धाम्चा जेजा च्योक्रे, आब्राहाम धाङ खी़ ग्युपाक्याला, थामेपे थुक्जे शीक्येगो ढेन्सो़ जेदी, राङगी ॱयोक्पो ईस्राएलला रोक्राम जे हो़तालाक।” 56 धेनी मीरीयाम एलीसाबेत मुला, दावा सुम थुक्पे धेबालाक धेनी मोरी नाङला लोक्पालाक। ठी़सो़खेन योहान्ना केवा 57 धा एलीसाबेतगी टु केगीन धी़चो़ झ्युरी, मोला टु भीजा च्यीक केवालाक। 58 धेनी को़न्क्षोकगी मोला थुक्जेक्षे जेदुक, ॱनेरी ॱहाघोरती मी़ खीम्चेक्या धाङ पी़न्दाक्या मी़मुला ङ्यामो घेवालाक। 59 टु केगीनगी श्याक्मो ग्येगोला पाउ चेगीन ॱरो झ्येरी, खी़ मीङगो खोरी आकीगी मीङ च्योक्रे, जेकारीयास ताक्ये झ्येवालाक 60 हीना खी़ आमागी ॱनेवालाक, “मालाक! खी़ मीङ योहान्ना ॱनागुलाक।” 61 खुङक्याई एलीसाबेतला ॱनेवालाक, “ख्यी़ पी़न्दाक्याने देरे मीङ हो़गीन सुवा मेतालाक।” 62 धेनी खुङक्याई भीजी आकीला, खी़ मीङ घी श्याक्ङी दो़दी ॱनेरी, लागागी जुक्ते झ्येरी ढीवालाक। 63 खी़ यीक ढीक्जा च्यीक ॱलारी, “खी़ मीङ योहान्ना लाक।” ॱनेरी ढीक्पालाक। धेनी खुङ घीरी ॱहाङसावालाक। 64 धेनी उक्कुरा च्यीकला, खी़ खा भेरी च्येमो डोरी, खो लाब ताङ थुप्कीन झ्युवालाक धेनी खी़ को़न्क्षोकला तो़टा पुवालाक। 65 खी़ खीम्चे घीरीला जीक्टा झ्युवालाक। धेनी दे लाबगो युदेया रीगी यु घीरीला ढाम्बालाक। 66 लाब ङेन्गीन घीरीगी राङ-राङगी सेमला ॱनेवालाक, “दे भीजा दे स्याम्ला घारे च्यीक झ्युङये हीन्ढी़?” घीझ्येरी ॱनाना को़न्क्षोकगी वाङ खी़ खाला हो़तालाक। जेकारीयासगी ॱङो़नस्ये 67 टु आकी जेकारीयास धाम्पे थुक्ङीगी खारी ॱङो़नस्ये स्येपालाक, 68 “ईस्राएलगी चोवो को़न्क्षोकला तो़टा हुङास्योक, घीझ्येरी ॱनाना खोङबा राङगी मीक्याचारु फेप्दुक धेनी खुङक्याला थारपा ॱनाङदुक। 69 खोङबागी राङगी ॱयोक्पो दावीदगी ग्युपाने, होरी क्षीला थारपे राक्योक च्यीक ॱलाङा जेदुक। 70 दे नी, खोङबागी एम्मानेराङ राङगी धाम्पे ॱङो़नस्येखेनक्याई थोक्ने सुवालाक। 71 होराङला होरी डाक्या धाङ होराङला दाङा झ्यीगीनक्याई लागाने क्योप्येला होदे जेपालाक। 72 खोङबागी होरी धाङबी मेमेक्याला ॱङीङजे जेये, धाङ राङगी धाम्पे धाम्चागो ढेन्सो़ जेयेला, 73 होदे होरी याप आब्राहाममुला, खोङबागी उ ॱना श्येवालाक, 74-75 होदेगो होराङला, होरी डाक्याई लागाने क्योप्ये, धाङ होरी मीजी घाङजाङ, धाम्पा धाङ ढाङपो झ्युरी, खोङबागी कुम्दीनदु होराङ जीक्टा मीझ्यीदा, खोङबाला श्याप्ची श्युये लाक।” 76-77 “धेनी ङी भु ख्यो़ ॱलानामेपे को़न्क्षोकगी ॱङो़नस्येखेन ॱनेरी भो़गीलाक, घीझ्येरी ॱनाना ख्यो़ चोवोगी फेप लाम डाढीक झ्यीये, धाङ खोङबागी मीक्याला खुङक्याई धीक्पा सेल्दी, होदे थोक्ने थारपागी स्येराप ॱनाङयेला, ख्यो़ चोवो फेप्ये एन्ला डुगीलाक। 78 होरी को़न्क्षोकगी झाम ॱङीङजेगी झ्येरी, खोङबागी थारवे हो़क नाम्खे श्यीङखामने ताङा जेगीलाक, 79 धेनी मी़नाक्पा धाङ स्यीवे ढीम्जाकला धेगीनक्याला थारवे हो़क थोप्कीलाक, धेनी होराङला श्यीदेगी लामला ठीक्कीलाक।” 80 धेनी टु योहान्ना ली़ला छारती, सेमला स्युक्क्षे झ्युवालाक। धेनी ईस्राएल्पाक्याई खोक्दु ॱङो़न्सुमदु ॱमाङो़न्गीन थुक्पे, खो रीतोङ स्योक्लाराङ धेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.