युदा 1 - ॱलोवा1 येशु मास्यीकागी ढेन्योक धाङ याकोबगी नो, ङा युदाने, याप को़न्क्षोकगी चेवे धाङ येशु मास्यीकागी दो़न्दु, ॱरुरी श्याकश्या, भो़पा पी़नक्याला, 2 ॱङीङजे धाङ श्यीदे धाङ झाम्पा, खेक्याला मेछो़ली हुङास्योक। ॱलोपो़न शोक्पोक्या 3 चेवे पी़नक्याओ, होराङ घीरीला थोप्था थारपागी कोरला, ङी खेक्याला ढीक्ये ॱमीच्यीकी थेहो़नाः, को़न्क्षोकगी राङगी धाम्पे मीक्याला लेन च्यीकदु ॱनाङना, धेपागो ॱरुङक्योप झ्यी ॱनेरी, श्योवा पुयेला, ङी खेक्याला दे यीक दे ढीक घो़जुङ। 4 घीझ्येरी ॱनाना एम्माने ॱहाला ङेपा फोक्येला, थाक्चो़चा मी रीङगा, खेक्याई खोक्दु साङवाने जुदुक। खुङक्या को़न्क्षोकला ॱमीचीगीन मी लाक। खुङक्याई होरी, को़न्क्षोकगी थुक्जेला ॱयो़री दो़छाकला ग्युरदुक धेनी होरी दाक्पो धाङ चोवो च्यीगारा हीन्गीन, मास्यीका येशुला खेलेन मीझ्यीदालाक। 5 खेक्याई दे लाब घीरी एम्माने स्येहो़नाः, ङा खेक्याला याङ देक्या ढो़न्सो ॱलाङी दो़दीक। चोवोगी थेङ च्यीकला, एजेप युने राङगी मीक्याला थारतु च्युक्वा जेपालाक हीना स्याम्ला धेपा मीझ्यीगीनक्याला मेताला जेपालाक। 6 धेनी राङगी गेनगी घोक्जा ॱमारुङा, राङगी धेजा ॱङोमागो पाङपा नाम्खे भाङछेनक्याला, को़न्क्षोकगी मी़नाकगी नाङला थामेगीन च्याक्डोक ग्याप्ती, ठीम्चो़गी ङीमा क्षे थुक्पे श्याजे हो़तालाक। 7 देरे झ्येरीराङ सादोम धाङ गोमोरा धाङ थाकोरगी ढोङखेरगी मीक्या, लोक्येम धाङ ली़गी दो़छाकला छी़पालाक। धेनी खुङक्याला थामेगीन मेगी छेपा फोक्ती, पे च्यीक झ्यु हो़तालाक। 8 दुक झ्येरीराङ देरे मीक्या राङगी ॱमीक्लामला तेन्दी, राङगी ली़ला ॱमेचाङा झ्यीदालाक धेनी चोवोगी आङजा खेमेलेन्दालाक धेनी नाम्खे भाङछेनक्याला कुरवा धेबालाक। 9 हीना नाम्खे भाङछेन चो मीकाएलगी मोशेगी फुङबुगी कोरला, धी़कमुला चो़लीङ झ्यीदी घाङला, खोला कुरवा धेप्ती क्यो़न्जुक कायेगी ॱलोगोक माझ्येवा हीना “चोवोगी ख्यो़ला काको़न जेदास्योक” ॱनेरी सुवालाक। 10 हीना दे मीक्या राङगी ॱमेस्येगीन लाबक्या, घीरीला कुरवा धेबालाक धेनी रीक्पा मेगीन धी़डोक्या च्योक्रे राङगी थेगीनगोराङ झ्येरी, खुङक्या मेताला डुगीलाक। 11 देक्या ॱङ्यावाली! घीझ्येरी ॱनाना खुङक्या कायीनगी लामला डाङालाक धेनी ग्युनोर थोप्ये क्षीला, बालामगी नोन्डुला छी़दालाक। धेनी कोरागी ङोलोकला च्योक्रे, मेताला डुगीलाक। 12 खीकी झाम्पे डो़नला दे मीक्या ढीमाक च्योक्रे दुक घीझ्येरी ॱनाना देक्या ङोजा मीझ्यीदा, राङला च्यीगा साम्दी ॱमीच्यीकी शा-थुङ झ्यीदालाक। देक्या नी, ॱलुङगी ताक्ती खेरकीन क्षु मेगीन ॱरीङबाक्या च्योक्रे लाक धेनी तो़न्गागी ढेबु मेगीन थेङमा ॱङी स्यीछासा, चावाने कोक्का स्यीङदोङ च्योक्रे लाक। 13 धेनी देक्या राङगी ङोछागी बोवा तो़न्गीन, ग्याछोगी भालाप ॱङ्यो़न्बाक्या च्योक्रे लाक। धेनी देक्या धी़ ताक्दु जीक्टाक्षे मी़नाकगी क्षीला डाढीक झ्येजा, कारमा ख्याम्बोक्या च्योक्रे लाक। 14 आदामने मीराप धी़न्बागी ॱङो़नस्येखेन, हेनोकगीयाः दे मीक्याई कोरला देरे ॱङो़नस्ये तो़न हो़तालाक, “तो़दाङ, चोवो राङगी धाम्पे भाङछेन तोङडाक माङामुला फेप्कीलाक 15 धेनी घीरीला ठीम्चो़ जेये धाङ क्षो़ मेगीन, मी घीरीगी झ्येजा क्षो़ला ॱमीथी़न्गीन लेगा घीरी धाङ क्षो़ मेगीन मीक्याई, खोङबागी कोरला छीक चुक्वा ॱनागीन घीरीगी क्षीला छेपा जेयेला, खोङबा फेप्कीलाक।” 16 दे मीक्या दुकेक ग्याप्कीन धाङ श्येम्माला क्यो़न चुक्कीन धेनी राङगी दो़छाकला चो़गीन धाङ राङ-राङला तो़पा ताङगीन धेनी राङगी फेन्थोकगी क्षीला, श्येम्माला खा जेवे तो़टा ताङगीनक्या लाक। ङेन्ता धाङ ॱलोप्सो 17 हीना चेवे पी़नक्याओ, खेक्यागो होरी चोवो येशु मास्यीकागी कुछापक्याई, एम्माने सुङगीन काक्याला ढेन्सो़ झ्यी। 18 खुङक्याई खेक्याला ॱनेवालाक, “थामे ङीमाक्याला, राङगी क्षोमेगीन दो़छाकगी स्याम्ला डारी, चोवोला छाले ग्याप्कीनक्या हुङगीलाक।” 19 छोखाक पेगीन धाङ जीक्तेन्पा सेम हो़गीन धाङ धाम्पे थुक्ङी मेगीन, मीक्या देक्याराङ लाक। 20 हीना चेवे पी़नक्याओ, खेक्यागो राङगी ॱमीच्यीकी धाम्पे धेपाला यारके तारी सोङ धेनी धाम्पे थुक्ङीगी गोने ॱमो़लाम ग्योप। 21 राङला को़न्क्षोकगी झाम्पाला ॱनेती श्योक धेनी थामेपे छेसोकला ठीक्कीन, होरी चोवो येशु मास्यीकागी ॱङीङजेला घुक्ती धो़क। 22 धेनी दोक्पा साक्कीनक्याला ॱङीङजे तो़न, 23 धेनी श्येम्माक्याला मेगी खोक्ने तो़न्दी क्योप धेनी को़न्क्षोकगी जीक्नाङ मुला श्येम्माक्याला ॱङीङजे तो़न हीना खुङक्याई धीक्पे दो़छाकगी चोक्पा शो़गीन, घो़ला दाङा झ्यी। तो़पागी ॱमो़लाम 24 धा खेक्याला धीक्पे नाङदु, छी़येने क्योप जे थुप्कीन धाङ खेक्याला घाटो क्षेगी थोक्ने, खोङबागी शीजेगी डुङदु खेक्याला क्यो़न मेगीन तो़न जेगीन, 25 खोङबा होरी क्याम्गो़न धाङ को़न्क्षोक च्यीक च्यीक्पोला, होरी चोवो येशु मास्यीकागी थोक्ने, शीजे धाङ ॱङेन्डाक धाङ नी़थु धाङ आङजा, कावा घीरीगी एम्माने धान्दा धाङ ग्युने ग्युन थुक्पे हुङास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.