याकोब 1 - ॱलोवा1 को़न्क्षोक धाङ चोवो येशु मास्यीकागी ढेन्योक याकोबने, जीक्तेनदु थोरती धेता याहुदापा ग्युपा च्युङङीक्याने, मास्यीकाला धेपा झ्यीगीनक्याला छाम्डी श्युवाहीन। धेपा धाङ स्येराप 2 ङी पी़नक्याओ, खेक्याला काङे ॱनाछोक ठेदी घाङला, होदेला घाटो क्षे ची च्यीक। 3 घीझ्येरी ॱनाना खीकी धेपाला छो़ता ङ्याङगीनगी, शो़पे सेम केरु च्युक्वालाक। 4 खेक्याला ॱमेछाङगीन घीया माझ्युवा, याङदाक्पा धाङ छाङगो झ्युङयेगी क्षीदु शो़पाला होदेगी ज्यावा डुप्तु च्युक। 5 खेक्या नाङने स्येराप ॱमेछाङगीन रे हो़ना, काको़न मेजेदा घीरीला फाङमेदु ॱनाङगीन को़न्क्षोकला होदेगी श्यी़घो, धेनी खोला होदे ॱनाङगीलाक। 6 हीना खी़ दोक्पा घीया मीझ्यीदा धेपेगोने श्यी़घो़ घीझ्येरी ॱनाना दोक्पा झ्यीगीनगो नी ॱलुङगी देता धाङ टुक्टा ग्याछोगी भालाप च्योक्रे लाक। 7 होरे मीगी राङला चोवोने च्यीक रे थोप्टु ॱनेरी ॱमासाम्घो़। 8 घीझ्येरी ॱनाना साम्लो ॱङी ताङगीन, मी राङगी लेगा घीरीला तेन्पो मेयोङालाक। छो़ता धाङ ङ्याम्छो़ 9 पी़न्दा ङ्यामच्युङक्याई राङगी घोक्जा थोवाला, ङ्यामो घा झ्यीघो़। 10 हीना क्षुक्पुक्या ॱमावा झ्युङी घाङला, ङ्यामो घा झ्यीघो़ घीझ्येरी ॱनाना चागी मेन्तोक च्योक्रे खोवाः काम्दी डुगीलाक। 11 घीझ्येरी ॱनाना ङीमा छा स्यारती चाक्या कामालाक धेनी मेन्तोक साला भाप्ती, होदेगी जेवा घीरी येलालाक। होझ्येरीराङ क्षुक्पुक्या राङगी लेगी दो़न्दाकगी खोकला, मेताला डुगीलाक। 12 दुक्पो ङ्याई घाङला शो़पा झ्यीगीन, मी झ्यीलाप क्षे लाक घीझ्येरी ॱनाना छो़ताने खो थारसारती, को़न्क्षोकगी राङला चेवा झ्यीगीनक्याला धाम्चा जेजा मीछेगी चो़पो़नगो, खोला थोप्कीलाक। 13 छो़ता नाङला छी़दी घाङला सी़या, “को़न्क्षोकगी ङाला छो़ता लेन्दी” ॱनेरी ॱमानास्योक घीझ्येरी ॱनाना ङेन्पागी गोने, को़न्क्षोकगी छो़ता झ्युङ ॱमीथुक्वालाक धेनी खोङबाराङगीया मी सी़या छो़ता मेजेदालाक। 14 हीना मी घीरी राङगी दो़क्षाकगी ॱली़री, होदे स्याबाला डारी छो़ता नाङदु छी़दालाक। 15 धेनी दो़क्षाकगी ढेबु ली़ला क्षाक्ती धीक्पा केलालाक धेनी धीक्पागो छाङगो छारती, होदेगी छीवा खेरती हुङालाक। 16 ङी चेवे पी़नक्याओ, गोवा ॱमाखोर च्यीक। 17 ॱनाङज्यीन शाङपो धाङ याङदाक्पा घीरी तो़ने, नाम्खे हो़क्या को़ जेगीन यापने भावालाक। पो़री डुगीन ढीम्जाक च्योक्रे, खोङबाला ग्युरवा घीया मेतालाक। 18 खोङबागी को़पा घीरीने, लोदोक फी़गो होराङ झ्युङास्योक ॱनेरी, खोङबाराङगी थुकोङगी धेन्पे का थोक्ने, होराङला केवा साबा ॱनाङा जेपालाक। का ङेन्घोये धाङ लाक्लेन ताङघोये 19 ङी चेवे पी़नक्याओ, मी घीरी ङेन्येला ग्योवा, लाब ताङयेला धाला धेनी खोङडो लाङयेला धाला हुङ घोलालाक ॱनागीन लाब दे स्येलाझ्यी। 20 घीझ्येरी ॱनाना मीगी खोङडोगी, को़न्क्षोकगी ढाङतेनगी ज्यावा मीडुपालाक। 21 होझ्येरी ॱमेचाङा घीरी धाङ ङेन्पा हो़ले पोङ च्यीक। धेनी खीकी सेमला क्योप थुप्कीन, खीकी नाङदु च्युक हो़गीन कागो ॱङ्यामच्युङ झ्येरी खेलेन झ्यी। 22 काला ङेन्ये च्यीगा झ्युरी, राङला गोकोर ॱमाताङ हीना काला सुङगीन च्योक्रे झ्यीगीन झ्युङ। 23 काला ङेन्ये च्यीगा ङेन्दी लाक्लेन ॱमेताङगीनगो, राङगी ङोरोङ मेलुङला तागीन मी च्योक्रे लाक। 24 घीझ्येरी ॱनाना खी़ राङला तागीलाक धेनी सोरी, खो घारे थोङगीनगो लाम्साङ ज्येदी डोवालाक। 25 हीना राङवाङ ॱनाङगीन याङदाक्पे ठीमला श्यीप्ता, झ्यीगीन धाङ तेन्पो ॱनेगीन धेनी काला ङेन्दी, ज्येदी डुगीन मेन्दा हीना लाक्लेन तारी झ्यीगीन मीगोला, खी़ झ्यीगीन लेगाला झ्यीलाप थोप्कीलाक। 26 धेनी राङला ढाङपो साम्दी हीना राङगी च्येमोला दाक्पो मेग्याप्कीन मीगी राङला गोकोर ताङालाक धेनी खी़ क्षो़गोवा फेन ॱमेथोवालाक। 27 होरी याप को़न्क्षोकगी डुङदु चाङमा धाङ क्यो़न मेगीन क्षो़ नी, काल्ले ठेदी धेता दोजेक्या धाङ युक्जामाक्याला, तादोक झ्यीये धाङ राङला जीक्तेनगी ॱमेचाङाने ॱरुङये लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.