ईब्रीपा 1 - ॱलोवानाम्खे भाङछेनक्याने से मास्यीका थोवा 1 एम्मा को़न्क्षोकगी होरी धाङबी फामाक्यामुला ॱङो़नस्येखेनक्याई थोक्ने, थेङ माङपो धाङ थापस्यी माङाने का सुवालाक। 2 हीना दे थामे धी़क्याला, खोङबागी राङगी सेगी थोक्ने, होराङक्याला का ॱनाङ हो़तालाक। धेनी राङगी सेला ॱङोपो घीरीगी खाला ग्युज्यीन को़वालाक धेनी खोङगी थोक्नेराङ जीक्तेन खाम घीरी को़ जेपालाक। 3 खोङगी को़न्क्षोकगी शीजे ॱङो़न जेदालाक धेनी खोङ नी को़न्क्षोकगी स्यीका ङोमागो लाक धेनी खोङगी का वाङक्षेगी थोक्ने, जीक्तेन खाम घीरी क्योङा जेदालाक। धेनी खोङबागी धीक्पा घीरी दाक जेदी, खोङबा नाम्खे श्यीङखामदु शीजेचेन को़न्क्षोकगी क्षाक ॱये स्योकला श्युक्वा जेदालाक। 4 खोङला थोप्था छेन नी नाम्खे भाङछेनक्याई, छेन ले थोवा लाक होझ्येरी खोङबा खुङक्याने ल्हाक खाक्क्षे को़ जेपालाक। 5 को़न्क्षोकगी नाम्खे भाङछेनक्याने सुलाः देरे नामा सुङा माजे हो़तालाक, “ख्यो़ नी ङी भु लाक। धीरीङ ङा ख्यी़ याप झ्युङ हो़क।” धेनी याङ “ङा खी़ याप झ्युङयेहीन धेनी खो ङी भु झ्युङगीलाक।” 6 धेनी राङगी एम्मा क्येक्या भुगोला जीक्तेनदु ॱङाक जेदाराङ, खोङगी याङ सुङालाक, “को़न्क्षोकगी भाङछेन हो़लेगी खोङला क्षाक छाघो़।” 7 नाम्खे भाङछेनक्याई कोरला खोङबा सुङालाक, “खोङगी राङगी श्याप्चीपा भाङछेनक्याला, ॱलुङ च्योक्रे धाङ मेगी मेचे च्योक्रे जेदालाक।” 8 हीना सेगी कोरला खोङबा देरे सुङालाक, “के को़न्क्षोक खेराङगी श्युक्ठी, धी़ तेन्दु ॱनेलालाक धेनी खेराङगी राङगी ग्यासी, ठीम ढाङपो गोने ठीम चेदालाक। 9 खेराङगी ढाङतेनला चेवा जे हो़तालाक धेनी मेढाङाला दाङा जे हो़तालाक। होझ्येरी को़न्क्षोक, खेराङगी को़न्क्षोकगी खेराङला राङगी रोवाक्याने ल्हाक थोवा जेदी, ॱनुम ढी़री दामा जेदी, घाटो ॱनाङ हो़तालाक।” 10 खोङबागी याङ सुङालाक, “के चोवो थोक्मा खेराङगी साश्यीगी ॱमाङस्यी तीङ हो़तालाक, धेनी नाम्खाक्या खेराङगी क्षाकगी को़ जेपालाक। 11 होदेक्या मेताला डुगीलाक हीना खेराङ तेन्दु ॱनेगीलाक। होदेक्या घोलाक लेमु ॱङीङबाला डुगीलाक, 12 धेनी खेराङगी होदेक्या घो़ लेमु टीगीलाक, धेनी होदेक्या घोलाक लेमु जेप्कीलाक। हीना खेराङ नामा ग्युरवा मेजेगीलाक। धेनी खेराङगी लोच्चीगी था मेयोङगीलाक।” 13 को़न्क्षोकगी नाम्खे भाङछेनक्याने सुला, देरे नामा सुङा माजे हो़तालाक, “ख्यी़ डाक्याला ङी, ख्यी़ काङबी होकदु माश्याक थुक्पे, ख्यो़ ङी ॱये स्योकला धो़क।” 14 होदे नाम्खे भाङछेन घीरी थारपा थोप्ये हीन्गीनक्याई क्षीदु, श्याप्ची श्युयेला ॱङाक्ङा सेम्ङीक्या मालाक से? |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.