गालातीयापा 1 - ॱलोवा1 मीक्याने मेन्दा धेनी मीगी थोक्ने मेन्दा, हीना येशु मास्यीका धाङ खोङबाला छीवाने श्याङा जेगीन याप को़न्क्षोकगी कुछाप, ङा पाउलु 2 धाङ ङीमुला हो़गीन पी़नक्या घीरीने, गालातीयागी क्षो़छोकक्याला, 3 होरी याप को़न्क्षोक धाङ चोवो येशु मास्यीकाने, खेक्याला थुक्जे धाङ श्यीदे भाबास्योक। 4 होरी को़न्क्षोक धाङ यापगी थुकोङ डुप्येला, येशु मास्यीकागी होराङला धान्दागी धी़ ङेन्पाने थारतु च्युक्येला, होरी धीक्पाक्याई क्षीला राङगी कुसोक ॱलो़ तावालाक। 5 ग्युने ग्युन्दु को़न्क्षोकला शीजे हुङास्योक। आमेन। ताम्शाङ श्येम्मा मेक 6 मास्यीकागी थुक्जेने भो़पा खेक्या देरे ग्योवा खोङला ङो ॱलोक्ती, ताम्शाङ श्येम्मागी स्याम्ला डागीनला ङा ॱहालेजुङ। 7 ताम्शाङ श्येम्मा नी, हो़या मेतालाक हीना मी रीङगागी खेक्याला टुक्ती, मास्यीकागी ताम्शाङगोला ॱयो़ये झ्यीदीक। 8 घीहीन्ना हीकी खेक्याला स्येगीन ताम्शाङगी मेडावा, हेक्या धाङ नाम्खे भाङछेन च्यीकगीया श्येम्मा स्येना, होदेगोला को़न्क्षोकगी छेपा फोक्वास्योक। 9 हीकी एम्मा ॱनागीन च्योक्रे, धान्दा ङा धाब्ले ॱनाहीन, खेक्यागी खेलेन्ला ताम्शाङने मेडावा श्येम्मा सु च्यीकगीया खेक्याला स्येना, होदेला को़न्क्षोकगी छेपा फोक्वास्योक। 10 धा ङा मीक्याने ङोलेन चालीओ याङमेना को़न्क्षोकने चालीओ? याङ ङा मीक्याला घारु च्युक्येगी थापस्यी झ्यीदे? ङी धान्दा थुक्पे, मीक्याला घारु च्युक्ये थापस्यी झ्येहो़ना, ङा मास्यीकागी श्याप्ची हुङये मेक। पाउलुला भो़वा 11 पी़नक्याओ, ङी स्येगीन ताम्शाङगो मीगी ताम्शाङ मालाक ॱनेरी, खेक्या स्येलाझ्यी ॱनेरी ङा दो़दीहो़क। 12 घीझ्येरी ॱनाना ङाला दे मी सुनेः जोरपा मालाक धेनी सी़या ॱलाप्पा मालाक हीना येशु मास्यीकाला ॱङो़न्सुम ज्यारी, खोङबाने ङाला दे थोप्सुङ। 13 एम्मा ङा याहुदापा क्षो़लुक चीली घाङला, ङी को़न्क्षोकगी क्षो़छोकला ॱमीच्यीकी जीक्टाक्षे दुक्पु तेरकीन धाङ होदेला मेताला ताङयेला थापस्यी झ्यीगीनगो, खेक्याई घोर हो़तालाक। 14 हीकी मीक्या खोक्दु ङी लो डाडागी मीक्याने ल्हाक, याहुदापा क्षो़लुकला ङा एन्ला थारजुङ धेनी ङी फामे लुक्सो़क्याला ङा ॱमीच्यीकी स्युक्क्षे चीलीहो़क। 15 हीना ङा ॱमाकेगीन एन्लाराङ ङाला राजा पेरी दामा जेगीन, धाङ राङगी थुक्जे थोक्ने भो़ जेगीन को़न्क्षोकगी थुक्ङेउ जेदी, 16 याहुदापा मेन्गीन मीरीकक्याला ताम्शाङ स्येयेगी क्षीला, खोङबागी से ङाला तो़न जेसुङ धेनी ङी छाटाक झ्येरी सी़मुला ढो़ माझ्ये, 17 धेनी ङी एन्ला हो़गीन कुछापक्या चारु, येरुसालेमदु ङा ॱमासो हीना ङा लाम्साङ आराब युला सोवी धेनी स्याम्ला दामासेको ग्याजारु लोक्ती होवी। 18 धेनी लो सुम स्याम्ने, ङा येरुसालेमदु पेटोला थुक्तु सोवी धेनी खी़मुला श्याक्मो चेङा धेबी। 19 हीना चोवोगी नो याकोबला माना, श्येम्मा कुछापक्याने सुला ङी ॱमाथो। 20 को़न्क्षोकगी दोङदु ङी खेक्याला ढीक्कीन, लाबक्या शोक्पो मेन। 21 होदे स्याम्ने, ङा सीरीया धाङ कीलीकीया युछोकला सोवी। 22 होदे थुक्पे युदेया युदु हो़गीन मास्यीकागी क्षो़छोकक्याई, ङाला थोङ माङ्युङ हो़तालाक। 23 खुङक्याई देचो़ च्यीगा घोर हो़तालाक, “एम्मा होराङला दुक्पु तारी, होरी चीगीन धेपा मेताला ताङये झ्यीगीन मीगो धान्दा होदे धेपागी क्षीलाराङ ताम्शाङ स्येदीक।” 24 धेनी ङी झ्येरी, खुङक्याई को़न्क्षोकला तो़पा पुवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.