एफीसुपा 6 - ॱलोवाफामा धाङ भी़टुकगी चो़लाम 1 टुवाक्याओ, चोवोगी नाङ राङगी फामागी काला ङेन, घीझ्येरी ॱनाना दे झ्यीघोगीन लेगा लाक। 2 राङगी फामाला चीकुर झ्यी। (दे नी धाम्चा हो़गीन, का धाङपोगो लाक।) 3 “देरे झ्यीना खेक्याला कीदा हुङगीलाक धेनी साश्यीदु खीकी छे रीङा झ्युङगीलाक।” 4 आकेक्याओ, राङगी टुवाला खोङडो ॱमालाङ हीना चोवोगी ढीक्लाम धाङ ॱलोप्तो़नला सो़क्योङ झ्यी। ढेन्योक धाङ दाक्पोगी चो़लाम 5 ढेन्योकक्याओ, खेक्या मास्यीकागी काला ङेन्गीन च्योक्रे, सेम ढाङपोगी गोने जीक्नाङ धाङ घुस्याप झ्येरी, जीक्तेनगी राङगी दाक्पोक्याई काला ङेन। 6 मीक्याला ङ्यामो घारु च्युक्येला ॱमीकगी थोङसारु च्यीगा लेगा माझ्यी हीना मास्यीकागी श्याप्चीक्या च्योक्रे, सेम तीङने को़न्क्षोकगी थुकोङ डुप्तु च्युक। 7 मीक्याई क्षीला मेन्दा हीना चोवोला श्याप्तोक पुगीन च्योक्रे, झ्येरी ङ्यामो घेरी श्याप्ची श्यी़। 8 ढेन्योक हीन्ना याङना राङवाङगी मी हीन्ना, चोवोगी होराङ रे-रेला होरी झ्यीगीन ले शाङाला शीक्ती ज्यागा ॱनाङगीलाक। 9 दाक्पोक्याओ, राङगी ढेन्योकक्याला देरेराङ चो़पा झ्यी धेनी नाम्खे श्यीङखामदु खे ॱङीगाराला ॱयेवा मेजेगीन खे ॱङीगारागी दाक्पो श्युक हो़तालाक ॱनेरी स्येरी, राङगी ढेन्योकक्याला जीक्नाङ ॱमाकु। को़न्क्षोकगी गोठाप 10 थाःला, खेक्या चोवो धाङ खोङबागी नी़थुगी तोप नाङला स्युक्क्षे झ्युङ। 11 धेनी धी़कगी ॱयो़झ्यी़क्याने तेन्पो ॱने थुप्येला, खेक्या को़न्क्षोकगी गोठाप छाङबो घो़न। 12 घीझ्येरी ॱनाना होरी ॱमाक्ठुक नी स्याठाकगी मीमुला मालाक हीना पो़न्रीकक्या धाङ वाङ झ्यीगीनक्या धेनी जीक्तेन देगी मी़नाकगी वाङ झ्यीगीनक्या, धाङ नाम्खाक्याला हो़गीन ङेन्पागी सेम्ङीगी ॱमाक्मीक्यामुला लाक। 13 होझ्येरी माउपारगी धी़ ङेन्पाला ङोग्येल झ्यीथुप्ये धाङ घीरी डुप्ती तेन्पो ॱने थुक्येगी क्षीला, को़न्क्षोकगी गोठाप छाङबो घो़न। 14 होझ्येरी तेन्पो ॱनेयेला, खेरी केपाला धेन्पागी केराक रे धेनी ढाङतेनगी ढाङठाप घो़न। 15 धेनी खेरी काङबाला श्यीदेगी ताम्शाङ स्येयेला, डाढीकगी पोल्ले घो़न। 16 धेनी धी़गी मे भारकीन धाक्या से थुक्येगी क्षीला, नाम्हीना धेपागी फुप खुर। 17 धेनी गोवाला थारपे च्याकश्या घो़न धेनी को़न्क्षोकगी का हीन्गीन धाम्पे थुक्ङीगी राल्डी खुर। 18 धेनी धाम्पे थुक्ङीला तेन्ती धी़ ताक्दु ॱमो़लाम धाङ रेभो़ श्यी़। दो़न दे सेमला शीम्दी थाङ ॱमेक्षेदा शाप-शाप झ्येरी, धाम्पे मी घीरीगी क्षीदु ॱमो़लाम श्यी़। 19 धेनी ताम्शाङगी साङवागो ॱङीङक्षे झ्येरी सेटाक झ्यी थुप्येला, ङी खा पेली घाङला काक्या ॱनाङास्योक ॱनेरी ङी क्षीला ॱमो़लाम श्यी़। 20 ताम्शाङ देगी दो़न्दु च्याक्डोकगी धाम्दी श्याकश्या, ङा कुछाप च्यीक हीन धेनी ङी स्ये घो़गीन ताम्शाङगो ॱङीङक्षे झ्येरी स्ये थुप्पास्योक ॱनेरी, ॱमो़लाम श्यी़। थामे छाम्डी 21 ङा घारे हो़गीन धाङ घी झ्यीगीनगो खेक्यागीया ॱहाघोरास्योक ॱनेरी, चेवे पी़न धाङ चोवो नाङ ॱलो का थुप्कीन श्याप्चीवा तुखीकोसगी खेक्याला लाब घीरी स्येगीलाक। 22 हीकी ॱनेछु घारे हो़गीनगो खेक्याई ॱहाघोरास्योक धेनी खेक्याला सेमस्युक थोप्पास्योक ॱनेरी, साम्लो तारी ङी खोला खेक्याचारु झावी। 23 याप को़न्क्षोक धाङ चोवो येशु मास्यीकाने पी़नक्याला, श्यीदे धाङ धेपाला तेन्पे झाम्पा थोप्पास्योक। 24 होरी चोवो येशु मास्यीकाला धी़ ताक्दु चेवा झ्यीगीनक्याला, को़न्क्षोकगी थुक्जे थोप्पास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.