एफीसुपा 5 - ॱलोवा1 होझ्येरी, खेक्या चेवे से धाङ सेमोक्या झ्येरी, को़न्क्षोकगी च्योक्रे झ्यीये थापस्यी झ्यी। 2 धेनी मास्यीकागी होराङला झाम्पा जेदी, राङगी ॱरोक होरी क्षीला को़न्क्षोकगी डुङदु ढीस्यीमगी क्षो़पा धाङ ॱमारछो़ च्योक्रे झ्युरी, ॱलो़ ताङ जेगीन च्योक्रे, खेक्या झाम्पागी नाङने मीछे क्यो। 3 हीना खेक्या को़न्क्षोकगी धाम्पे मीक्या झ्येरी, खीकी घुङदु दो़लोक धाङ भावा स्योरकीन ले ॱना घीरी, याङना ॱनाब्सेमक्याई मीङ च्यीया भेचो़ झ्यीये मेतालाक। 4 धेनी फेन्थोक मेगीन लाब झोराक्या धाङ क्षो मेगीनक्या याङना क्याकक्यागी लाबक्या, खीकी घुङदु मायुङ घो़ हीना को़न्क्षोकला काटीन्क्षे श्यी़घो़। 5 घीझ्येरी ॱनाना दो़लोक झ्यीगीन धाङ ले ॱमेचाङा झ्यीगीन धाङ ॱनाब्सेम्चेनगी मी सी़ हीन्ना (कुन्डा क्षो़गीनक्या), मास्यीका धाङ को़न्क्षोकगी ग्यासीगी कादा ॱमेथोप्कीलाक ॱनेरी, खेक्याई सावो स्येलाझ्यी। 6 खेक्याला सी़या खुङ मेगीन लाबक्या तारी ॱमाली़वास्योक घीझ्येरी ॱनाना देरेक्याई झ्येरी, को़न्क्षोकगी थुक्ठो़ काला मेङेन्गीनक्याई खाला फोवालाक। 7 होझ्येरी खुङक्यामुला माडे। 8 घीझ्येरी ॱनाना काब च्यीकला खेक्या मी़नाक नाङ हो़तालाक हीना धान्दा, चोवोगी नाङ खेक्या हो़ नाङदु हो़तालाक। हो़गी टुवाक्या च्योक्रे मीछे क्यो़। 9 (घीझ्येरी ॱनाना हो़गी ढेबुक्या नी, शाङा धाङ ढाङा धाङ धेन्पा हीन्गीन घीरी नाङ थोवालाक।) 10 धेनी चोवोगी थुक गेगीनगी दो़नगोक्या स्येलाझ्यी। 11 फेन्थोक मेगीन मी़नाकगी लेगाक्याला माडे, हीना होदेरे लेगाक्या हो़ला तो़न। 12 घीझ्येरी ॱनाना खुङक्याई साङवादु झ्येजा लेगाक्याई कोरला, ॱनायेगोवा ङोछागीन लाक। 13 हीना हो़गी थोक्ने ॱङो़न्गीन घीरी थोङगीलाक धेनी थोङगीन घीरी हो़ लाक। 14 होझ्येरी सुङरापला देरे सुङ हो़तालाक, “ॱङी लोक्ती धेताक्याओ, लोङ धेनी छीवाने सो़न, धेनी मास्यीकागी खेक्याला हो़ ॱनाङगीलाक।” 15 होझ्येरी खेक्या मीछे घारे क्यागीनला शाप-शाप झ्यी, ॱलेन्दाक्या च्योक्रे मेन्दा खेवाक्या च्योक्रे, 16 घुकाप घीरीगी भेचो़ शाङपो तोङ घीझ्येरी ॱनाना धी़चो़क्या ङेन्पा दुक। 17 होझ्येरी ॱलेन्दा माझ्युङ हीना चोवोगी थुकोङ, घी हीन्गीनगो स्येलाझ्यी। 18 धेनी मीछे ठोप्ला ताङगीन, घुन्क्षाङगी शीरी माग्युक हीना धाम्पे थुक्ङीगी खारी, 19 च्यीकगी च्यीकमुला सुङगुर धाङ तो़लु धाङ घुरलुक्या थोक्ने लाब तारी धेनी राङगी सेमने चोवोला तो़याङ धाङ रोल्याङ फी़। 20 धेनी नाम्हीना, होरी चोवो येशु मास्यीकागी छेन थोक्ने घीरीगी क्षीला याप को़न्क्षोकला काटीन्क्षे श्यी़। 21 धेनी मास्यीकाला ॱङीङकुर फी़येला फेन्छुन खाला ङेन। ख्योवा धाङ केमीला ॱलापच्या 22 केमीक्याओ, खेक्या चोवोगी काला ङेन्गीन च्योक्रे, राङगी ख्योवागी खाला ङेन। 23 घीझ्येरी ॱनाना क्षो़छोक नी, मास्यीकागी कुली़ झ्येरी मास्यीका नी, क्षो़छोकगी उ धाङ खोङबाराङ होदेगी क्याम्गो़न हीन्गीन च्योक्रे, ख्योवागो केमीगी गोवा हीन। 24 धा क्षो़छोकगो मास्यीकागी काला ङेन्गीन च्योक्रे, केमीक्या घीरी राङगी ख्योवागी खाला ङेन्घो़। 25 ख्योवाक्याओ, राङगी केमीक्याला चेवा झ्यी घीझ्येरी ॱनाना मास्यीकागीया क्षो़छोकला चेवा जेदी, राङगी कुसोक होदेगी क्षीला ॱलो़ ताङा जेपालाक। 26 दीगी दो़नगो, क्षो़छोकला धाम्पा जेयेगी क्षीला कागी थोक्ने, क्षुगी ठी़री चाङमा जेपालाक। 27 देरे जेदी क्षो़छोकगो ॱमेवा धाङ ॱङीमा मेगीन याङना देरे क्यो़न घीया मेगीन हीना धाम्पा धाङ क्यो़न मेता, ॱमीच्यीकी शीजेक्षेगी गोने राङगी डुङदु पुयेला लाक। 28 दुक झ्येरीराङ ख्यो़वाक्यागीया, राङगी केमीला राङगी ली़ हीन्गीन च्योक्रे, चेवा झ्यी घो़गीलाक। राङगी केमीला चेवा झ्यीगीनगी़ राङला चेवा झ्यीदालाक। 29 मी सी़या राङगी ली़ला दाङा मीझ्यीदालाक हीना होदेला चीदोङ झ्येरी दाक्पो ग्यालाक। देरेराङ मास्यीकागी राङगी क्षो़छोकला चीदोङ जेदालाक, 30 घीझ्येरी ॱनाना होराङ खोङबागी कुली़गी येन्लाकक्या लाक। 31 “होझ्येरी केवे-भुगी राङगी फामाला भोरती, राङगी केमीमुला क्षामालाक धेनी खोङ ॱङीउ ली़ च्यीक झ्युङगीलाक।” 32 दे नी साङवा क्षे च्यीक लाक धेनी दे लाब दे ङा मास्यीका धाङ क्षो़छोकला ॱमीक्ती ॱनाहीन। 33 घीहीन्ना, खेक्या घीरीगी राङगी केमीला राङला च्योक्रे, चेवा झ्यीघो़ धेनी केमीगीया राङगी ख्योवाला चीकुर झ्यीघो़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.