एफीसुपा 4 - ॱलोवामास्यीकागी क्षो़छोक नाङदु थी़न्डील 1 होझ्येरी, चोवोगी चो़न्पा ङा पाउलु, खेक्याला श्योवा देक्या पुलाहीन, को़न्क्षोकगी खेक्याला भो़ जेजागोला तेन थुप्कीन मीछे क्यो। 2 धेनी ॱङ्यामच्युङ धाङ श्यीझाम धाङ शो़गोम घीरीने, झाम्पागी गोने च्यीकगी च्यीकला शो़पा घोम्दी, 3 धाम्पे थुक्ङीने झ्युङगीन थी़न्डीलगो, श्यीदेगी गोने घी थुप-थुप ॱरुङये थापस्यी झ्यी। 4 को़न्क्षोकगी खेक्याला भो़ली घाङला, रेवा च्यीकला भो़पा च्योक्रे ली़ च्यीक धाङ थुक्ङी च्यीक, 5 चोवो च्यीक धाङ धेपा च्यीक धाङ ठी़सो़ च्यीक, 6 धाङ को़न्क्षोक च्यीक हो़तालाक धेनी खोङ घीरीगी याप लाक। धेनी खोङबा घीरीगी थोकला धेनी घीरीगी थोक्ने, धाङ घीरीगी नाङ श्युक हो़तालाक। 7 हीना थुक्जेगो होराङ रे-रेला मास्यीकागी ॱनाङज्यीनगी, छेला तेन्दी ॱनाङ हो़तालाक। 8 दी कोरला सुङरापला देरे सुङ हो़तालाक, “खोङबा नाम्खे श्यीङखाम थोकला फेवी घाङला, चो़न्पागी छोक ठीया जेपालाक। धेनी मीक्याला ॱनाङज्यीनक्या ॱनाङा जेपालाक।” 9 धा “खोङबा नाम्खे श्यीङखाम थोकला फेप्पालाक” ॱनागीनगी दो़न दे घी ले? दो़न नी देराङ लाक, खोङबा एन्ला जीक्तेनगी साजा ॱमास्योकला भाप जेपालाक। 10 माला भाप जेगीनगोराङ, नाम्खे श्यीङखाम घीरीगी थो़स्योकला फेप्कीनगो लाक। धेनी दे नी, खोङगी जीक्तेनदु घीरी खाङदु च्युक्येगी क्षीला लाक। 11 धेनी मास्यीका राङगी ॱनाङना ॱनाङज्यीनक्या, रीङगा कुछापक्या, रीङगा ॱङो़नस्येखेनक्या, रीङगा ताम्शाङ स्येगीनक्या, रीङगा क्षो़पो़न धाङ ॱलोपो़नक्या झ्युरी 12 मास्यीकागी क्षो़छोक यारके ताङयेगी क्षीला श्याप्ची श्युयेगी लेगाक्याला, मी धाम्पाक्या डाढीक झ्यीयेला लाक। 13 धेनी होराङ घीरी धेपाला च्यीक माझ्युङगीन थुक्पे, धाङ को़न्क्षोकगी सेगी स्येयो़नला ॱनाटो ॱङेरी, मास्यीकागी फी़न्सुम छोक्पे छे च्योक्रे माझ्युङगीन थुक्पे, दे नी झ्युङगीलाक। 14 धा होराङ देने ॱहाला मीगी ॱयो़क्युने धेनी ॱली़टे होकला छी़दी, भालापक्याई ॱहाला-छुला ॱयो़या धाङ तावा लोक्पा ॱनाछोकगी टुक्टा टुवाक्या च्योक्रे मीझ्युङा 15 हीना झाम्पागी गोने लाब धेन्पा स्येदी, होरी उ हीन्गीन मास्यीकागी नाङला छोक घीरीने, होराङ छारती डोघो़। 16 खोङबानेराङ ली़ घाङजाङ ग्युपा रे-रेगी थी़था धाङ मुला धाम्दा हो़तालाक। होझ्येरी येन्लाक मीरी-मीरीगी राङगी झ्यीघोगीन लेगागो झ्यीना, ली़ घाङजाङ छारती झाम्पागी थोक्ने राङला यारके ताङालाक। मीछे ॱङीङबा धाङ साबा 17 धा ङा चोवोगी नाङ का स्युक्क्षे तेरती ॱनाहीन, खेक्या देने ॱहाला याहुदापा मेन्गीन मीक्या च्योक्रे, दो़न मेगीन साम्लोक्या तारी मीछे ॱमाक्या। 18 धेनी खुङक्याई सेम ग्योङागी केनगी, खुङक्या नाङ हो़गीन तीमुकगी झ्येरी, खुङक्याई स्येयो़न मी़नाकगी तुम हो़तालाक धेनी को़न्क्षोकगी छेने खा ढा हो़तालाक। 19 खुङक्याई ङोजा घीरी पारी दो़छाकला छी़दुक धेनी ले ॱमेचाङा ॱनाछोक झ्यीयेला, खुङक्या दो़पा क्षे झ्युदुक। 20 हीना खेक्याई मास्यीकागी कोरला ॱलाप्लागो, देरे मालाक। 21 येशु नाङ हो़गीन धेन्पाला तेन्ती, खेक्याई खोङबागी कोरला ङेन हो़तालाक धेनी ॱलाप हो़तालाक। 22 दे नी ॱली़गीन दो़छाकगी रुरा, एम्मा मीछेगी च्यो़पाला थी़न्गीन खेरी च्यो़पा ॱङीङबागो पोङ। 23 धेनी राङगी सेम्ङीदु साबा झ्युङ। 24 धेनी को़न्क्षोकगी स्यीकाला धेन्पे ढाङतेन धाङ धाम्पाला को़का स्यीका साबागो लेन ॱनेरी, खेक्याला ॱलाप हो़तालाक। 25 होझ्येरी शोक पारी खे रे-रेगी राङगी खीम्चेमुला, लाब धेन्पा स्यो़क घीझ्येरी ॱनाना होराङ ली़ च्यीक्पागी येन्लाकक्या लाक। 26 छीक्पा शो हीना धीक्पा माझ्यी। ङीमा डुप्ये एन्ला खेक्याई छीक्पा श्यीवास्योक। 27 धेनी धी़कला घुकाप ॱमातेर। 28 कुगीनगी धा ॱमाकुवास्योक। हीना खी़ काल्ले ग्यास्योक। खी़ राङगी लाक्पा ॱङीगी ढाङपो झ्येरी, काल्ले ग्यास्योक धेनी घो़गीनक्याला झ्यीम्बा ताङास्योक। 29 खेक्याई खाने छीक ङेन्पाक्या ॱमास्ये हीना ङेन्गीनक्याला फेन्येगी क्षीला, धी़ला थी़न्गीन धाङ यारके ताङगीन छीक ॱङेन्दाक्या च्यीका स्यो़क। 30 धेनी थारपे ङीमागी क्षीला धाम्पे थुक्ङीगी ताक ग्यापक्या झ्येरी, को़न्क्षोकगी धाम्पे थुक्ङीला क्योरु ॱमाच्युक। 31 ङेन्सेम घीरी धाङ खोङडो धाङ स्येताङ घीरी, धेनी थाप्चो़ धाङ ॱमेबेप घीरी धाङ ठादोक ॱनाछोकक्या पोङ। 32 को़न्क्षोकगी मास्यीकागी थोक्ने, खेक्याला घोयाङ ॱनाङगीन च्योक्रे खेक्याः च्यीकगी च्यीकला घोयाङ तेरती, च्यीकगी च्यीकला ॱङीङजे धाङ सेमच्युङ झ्यी। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.