एफीसुपा 3 - ॱलोवाको़न्क्षोकगी साङवा ॱङो़न्पा 1 होझ्येरी ङा पाउलु, ख्ये याहुदापा मेन्गीनक्याई दो़न्दु, मास्यीका येशुगी चो़न्पा हीन। 2 खेक्याई क्षीला को़न्क्षोकगी थुक्जेगी लेगेनगो, ङाला ॱनाङ हो़गीनगी कोरला, खेक्याई घोर हो़तालाक ॱनेरी ङी सामीहो़क। 3 को़न्क्षोकगी साङवा दे ङाला साल्तो़नगी थोक्ने, ॱङो़न्दु जेपालाक धेनी दी कोरला ङी एन्ला, खेक्याला दोरधी़ला ढीक हो़तालाक। 4 खेक्याई दे ॱलोक्यी घाङला, मास्यीकागी साङवागी कोरला ङी स्येयो़न घारे हो़गीनगो, खेक्याई ॱहाघोर थुप्कीलाक। 5 धेनी साङवा दे, एम्मागी मीरापला ॱङो़न्दु माजेपालाक हीना धान्दा धाम्पे थुक्ङीगी गोने, खोङबागी धाम्पे कुछापक्या धाङ ॱङो़नस्येखेनक्याला, को़न्क्षोकगी ॱङो़न्दु जेपालाक। 6 साङवा दे नी, ताम्शाङगी थोक्ने याहुदापा मेन्गीनक्याः ईस्राएल्पाक्यामुला ग्युज्यीन च्यीक्पा धाङ ली़ च्यीकगी येन्लाकक्या धाङ मास्यीका येशुगी नाङ, धाम्चागी कादा थोप्गीन लाक। 7 को़न्क्षोकगी नी़थुगी क्षाक्ले थोक्ने, ङाला ॱनाङगीन खोङबागी थुक्जेगी ॱनाङज्यीनला तेन्ती, ङाला ताम्शाङगी श्याप्तोक्पा को़वालाक। 8-9 ङा को़न्क्षोकगी धाम्पा मीक्याने ॱमास्योकगो हीन्नाः मास्यीकागी ढाङमेगी शीजेक्षेगी ताम्शाङगो, याहुदापा मेन्गीनक्याला स्येये धाङ धेनी घीरी को़ ॱनाङगीन, को़न्क्षोकगी एम्मा धी़रापने बेरी श्याक जेजा साङवा दे, मी घीरीला ॱङो़न्दु च्युक्येगी दे थुक्जे दे ङाला ॱनावालाक। 10 दे नी, क्षो़छोकगी गोने नाम्खे श्यीङखामदु हो़गीन पो़न्पोक्या धाङ वाङ झ्यीगीनक्याला, को़न्क्षोकगी स्येराप ॱनाम्पा ॱनाछोक धान्दा ॱङो़न्दु जेयेगी क्षीला लाक। 11 दे नी, को़न्क्षोकगी थामेपे थुकोङला तेन्ती, मास्यीका येशु होरी चोवोगी थोक्ने डुपा जेपालाक। 12 धेनी मास्यीकाला होरी धेपा धाङ खोङबागी थोक्ने, होराङ को़न्क्षोकगी डुङदु ॱङीङक्षे धाङ ॱलोतेक्षे झ्येरी डो थुबालाक। 13 खीकी क्षीला ङी ङ्याङगीन दुक्पु दे, खेक्याला फेन्येला लाक। होझ्येरी खेक्या सेमस्युक ॱमाक्षाक ॱनेरी, ङा श्योवा पुलाहीन। एफीसुपाक्याई क्षीला ॱमो़लाम श्यी़वा 14-15 होझ्येरी ॱनाम्सा ॱङी नाङला हो़गीन, नाङमी रे-रेला यापने मीङ झ्युजा, खोङबागी डुङदु ङी पीमु साला चुक्ती ङा ॱमो़लाम श्यी़लाहीन। 16 को़न्क्षोकगी ढाङमेगी शीजेला तेन्ती, थुक्ङीगी थोक्ने नी़थु ॱनाङदी, खेक्याई सेमला तोपस्युक ॱनाङास्योक, 17 धेनी धेपागी थोक्ने, मास्यीका खेक्याई सेम नाङदु श्युक्वास्योक धेनी झाम्पा नाङ चावा तीङ रीङबो, धाङ तेन्पो झ्युरी 18 धाम्पे मी घीरीमुला मास्यीकागी झाम्पागी ग्याछे धाङ रीङछे धाङ थोछे धाङ तीङछे, घी हीन्गीनगो ॱहाघोरयेगी तोप थोबा झ्यीये, 19 धेनी को़न्क्षोकगी छेसोक धाङ नी़थुगी, खेक्या घाङजाङ खाङयेगी क्षीला, खेक्याई ॱलोला जु ॱमीथुप्कीन मास्यीकागी झाम्पा ॱहाघोरयेगी ॱमो़लाम, ङा श्यी़लाहीन। 20 धा होरी नाङदु ले डुप्कीन नी़थुगी गोने, होरी श्यी़गीन धाङ साम्गीनने ल्हाक मेछो़ली जे थुप्कीन को़न्क्षोकला, 21 क्षो़छोक धाङ मास्यीका येशुगी थोक्ने, मीरापने मीराप थुक्पे ग्युने ग्युन्दु तो़पा हुङास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.