एफीसुपा 2 - ॱलोवामास्यीकागी थोक्ने छीवाने सो़न्पो 1 एम्मा खेक्या राङगी ङेक्यो़न धाङ धीक्पागी झ्येरी, स्यीस्या च्योक्रे हो़तालाक। 2 होदे घाङला खेक्या जीक्तेनगी लुक्सो़ ङेन्पाक्या ॱरुरी, बारनाङ खामगी नी़थुक्याला वाङ झ्यीगीनला चीरी, हुरे मीछे क्यालालाक। धेनी सेम्ङी देराङ धान्दा को़न्क्षोकगी काला मेङेन्गीन, मीक्याई खाला वाङ झ्यीदालाक। 3 खुङक्याई घुङदु होराङ घीरीयाः राङगी दो़क्षाकगी वाङ होकदु धेदी, राङगी ली़सेमगी दो़पाला थी़न्गीन लेगाक्या एम्मा झ्यीदालाक। धेनी मी श्येम्माक्या च्योक्रे, होराङक्याला को़न्क्षोकगी थुक्ठो़ फोक घोये हो़तालाक। 4 हीना ॱङीङजेला फी़न्सुम छोक्पा हो़गीन, को़न्क्षोकगी राङगी झाम्पा ग्याक्षेगी थोक्ने, होराङला चेवा जेपालाक। 5 होझ्येरी धीक्पागी नाङदु छी़दी, होराङ स्यीस्या च्योक्रे हो़नाः, खोङबागी होराङला मास्यीकामुला सो़न्पो जेपालाक। थुक्जेगी थोक्नेराङ, खेक्याला थारपा थोप हो़तालाक। 6 धेनी मास्यीका येशुमुला होराङला ॱलार सो़न्पो जेदी, होराङ खोङमुला नाम्खे श्यीङखामदु धेदु च्युक्वा जेपालाक। 7 दे नी माउपारगी धी़ला खोङबागी मास्यीका येशुगी थोक्ने, होराङला ॱनाङना ॱङीङजेगी गोने, राङगी ढाङमेगी थुक्जे दे, मीक्याला तो़न्येगी क्षीला लाक। 8 घीझ्येरी ॱनाना को़न्क्षोकगी थुक्जेने धेपागी थोक्ने, खेक्याला थारपा थोप हो़तालाक। धेनी दे खेक्या राङला तेन्ती झ्युवामालाक हीना को़न्क्षोकगी ॱनाङज्यीन लाक। 9 सी़या ङोम्सो मीझ्यीयेगी क्षीला, थारपा दे लेने झ्युवामालाक। 10 घीझ्येरी ॱनाना होराङ ले शाङाक्याई क्षीला, मास्यीका येशु नाङ को़का को़न्क्षोकगी क्षाक्शो़ लाक। धेनी देरे झ्यीयेला खोङबागी होराङला एम्मानेराङ डाढीक जेपालाक। मास्यीकागी नाङ च्यीकदु ग्युरवा 11 होझ्येरी ढेन्सो़ झ्यी, खेक्या केने ॱहालाराङ याहुदापा मेन्गीन हो़ताराङ, ली़ला लाक्पागी थोक्ने पाउ चेचा याहुदापाक्याई खेक्याला “पाउ ॱमाचेचाक्या” ॱनेरी ॱनालाक। 12 होदे धी़ला खेक्या मास्यीकाने खा ढाडा धेनी ईस्राएल्पा मीरीकगी थोप्ताङने, पी़दी श्याकश्या धेनी को़न्क्षोकगी धाम्चाक्या स्येये मेगीन धेनी रेवा मेगीन धाङ दे जीक्तेनदु को़न्क्षोकमुला ढेवा मेगीन हो़तालाक, ॱनेरी ढेन्सो़ झ्यी। 13 हीना होदे धी़ला, खेक्या मास्यीका येशुने थाक्रीङा हो़गीनक्या, धान्दा मास्यीकागी कुठाकगी गोने ङ्येला ठीक हो़तालाक। 14 घीझ्येरी ॱनाना मास्यीका राङगी होराङ खाक ॱङीउला च्यीक दोमा जेदी, खोङराङ होरी श्यीदे लाक। धेनी खा डारु च्युक्कीन डागी ग्याङगो, खोङबागी तोरस्यीक जेपालाक। 15 दे नी खोङबागी याहुदापा क्षो़ठीमगी काठीम घीरी, मेताला जेदी राङगी थोक्ने खाक ॱङीउगी छापला साबा च्यीकला दोम्दी, श्यीदे जेपालाक। 16 धेनी खोङबा ग्याङस्यीङला ढोङगीनगी थोक्ने, होराङ ॱङीगाराला ली़ च्यीकला को़न्क्षोकमुला दोमा जेदी दाङसेमगो मेताला जेपालाक। 17 खोङबा फेप्ती खे थाक्रीङा धाङ ङ्ये हो़गीनक्याला, श्यीदेगी ताम्शाङ सुङा जेपालाक। 18 घीझ्येरी ॱनाना मास्यीकागी थोक्ने, होराङ ॱङीगारा धाम्पे थुक्ङी च्यीकगी गोने यापगी डुङदु डो थुप्कीन झ्युवालाक। 19 होझ्येरी धा देने ॱहाला, खेक्या यु श्येम्मागी मी याङना ङो ॱमेस्येगीन मी मालाक हीना धाम्पे मीक्यामुला यु च्यीक्पा धाङ को़न्क्षोकगी नाङमीक्या लाक। 20 दे नाङमीगी ॱमाङस्यीगो कुछापक्या धाङ ॱङो़नस्येखेनक्याई, खाला चीक हो़तालाक धेनी मास्यीका येशु खोङबाराङगो चो शुरधोगो लाक। 21 मास्यीकाला तेन्ती, होदे खाङबागो घीरी च्यीकदु थी़न्दी, चोवोगी नाङ क्षो़खाङ धाम्पा च्यीकला ग्युरालाक। 22 धेनी धाम्पे थुक्ङीगी थोक्ने, को़न्क्षोकगी श्युक्सा झ्युङयेला, खेक्याः खोङमुला चीक्ती डोवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.