एफीसुपा 1 - ॱलोवा1 को़न्क्षोकगी थुकोङ थोक्ने, मास्यीका येशुगी कुछाप ङा पाउलुने, येशु मास्यीकाला धेपा झ्यीगीन एफीसु ग्याजारु हो़गीन धाम्पे मीक्याला; 2 होरी याप को़न्क्षोक धाङ चोवो येशु मास्यीकाने थुक्जे धाङ श्यीदे, खेक्याला थोप्पास्योक। मास्यीकाने झ्यीलाप 3 होरी चोवो येशु मास्यीकागी याप, को़न्क्षोकला तो़पार स्योक। मास्यीकागी थोक्ने, खोङबागी होराङक्याला नाम्खे श्यीङखामगी सेम्ङीगी, झ्यीलाप हो़लेगो ॱनाङ हो़तालाक। 4 को़न्क्षोकगी डुङदु होराङ, धाम्पा धाङ क्यो़न मेगीन हुङयेगी क्षीला, जीक्तेन ॱमाको़ एन्लाराङ मास्यीकागी थोक्ने, खोङबागी होराङला दामा जेपालाक। 5 को़न्क्षोकगी थुकोङ धाङ घावाला तेन्ती, येशु मास्यीका थोक्ने, खोङबागी होराङला राङगी से धाङ सेमो झ्युङयेला, एम्माने झाम्पागी थोक्ने थाक्चो़ जेपालाक। 6 धा को़न्क्षोकगी शीजेचेनगी थुक्जेगी क्षीला, खोङबाला तो़पार स्योक घीझ्येरी ॱनाना थुक्जे दे, खोङबागी चेवे सेगी गोने होराङला फाङमेदु ॱनावालाक। 7 को़न्क्षोकगी ढाङमेगी थुक्जेला तेन्ती, मास्यीकागी कुठाकगी थोक्ने होराङला थारपा हो़तालाक धेनी होरी धीक्पाक्याई घोयाङ हो़तालाक। 8 धेनी होदे थुक्जे दे, खोङबागी होराङला मेछो़ली ॱनाङा जेपालाक। को़न्क्षोकगी स्येराप धाङ स्येयो़न ॱनाछोकगी थोक्ने, 9 मास्यीका खाला ॱनेना, खोङबागी क्षास्यीला तेन्ती, राङगी थुकोङगी साङवा दे होराङला ॱङो़न्तु जेपालाक। 10 धेनी खोङबागी थुकोङगी धी़ तीक-तीकगो भावी घाङला, ॱनाम्सा ॱङीला हो़गीन घीरी च्यीकदु मास्यीकागी वाङला धी़ये लाक। 11 राङगी थुकोङला तेन्ती क्षाक्ले घीरी डुप्कीन को़न्क्षोकगी, मास्यीकागी गोने होराङला खोङबा राङगी मी दामा जेपालाक घीझ्येरी ॱनाना देराङ थोक्माने, खोङबागी थाक चो़चा राङगी क्षास्यी लाक। 12 दे नी मास्यीकाला रेवा झ्यीगीन हे धाङस्योकक्याई को़न्क्षोकगी शीजेला, तो़पा हुङयेगी क्षीला लाक। 13 थारपागी ताम्शाङ, धेन्पे का ङेन्दी मास्यीकाला धेपा झ्यीगीन, खेक्याला को़न्क्षोकनेराङ धाम्चा जेजा धाम्पे थुक्ङीगी थेचे ग्याप हो़तालाक। 14 धेनी को़न्क्षोकगी राङगी मीक्याला थारपा ॱमानाङगीन थुक्पे, धाम्पे थुक्ङी नी होराङला थोप घोये हीन्गीन ग्युज्यीनगी गेलेनगो लाक। दे नी, को़न्क्षोकगी शीजेगी तो़पा हुङयेगी क्षीदु लाक। पाउलुगी काटीन्क्षे धाङ ॱमो़लाम श्यी़वा 15 होझ्येरी चोवो येशुला खेक्याई धेपा हो़गीन धाङ को़न्क्षोकगी धाम्पे मीक्याला, खेक्याई चेवागी कोरला ङी घोरती, 16 ङी ॱमो़लामला खेक्याला ढो़न्सो झ्येरी, खीकी क्षीला काटीन्क्षे श्यी़येला ङी नामा ॱमाछे हो़क। 17 धेनी होरी चोवो येशु मास्यीकागी को़न्क्षोक, शीजेक्षे यापगी राङगी कोरला, खेक्याई घीरी ॱहाघोरयेगी क्षीला, सेम्ङीगी स्येराप धाङ साल्तो़न ॱनाङास्योक, ॱनेरी ङा ॱमो़लाम श्यी़हो़क। 18 खेक्याई सेम्ङीगी ॱमीक बेलास्योक ॱनेरी, ङा ॱमो़लाम ग्यावीहो़क। होझ्येरी खेक्या रेवा घीन्गी क्षीला भो़पा धाङ धेनी धाम्पे मीक्याला, खोङबागी ढाङमेगी शीजेगी ग्युज्यीनगो घी हीन्गीन धाङ 19 होराङ धेपा झ्यीगीनक्याई क्षीला, खोङबागी ची ॱमेथेप्कीन ॱहालेवे नी़थुगो, घी हीन्गीनगो स्येये क्षीदु लाक। दे ॱहालेवे नी़थुने राङ 20 को़न्क्षोकगी मास्यीकाला छीवाने कुसो़न्पो श्याङा जेपालाक धेनी नाम्खे श्यीङखामक्यारु, राङगी क्षाक ॱयेरु श्युक्तु च्युक्वा जेपालाक। 21 धेनी खोङबागी मास्यीकाला ठीम धाङ वाङ धेनी नी़थु धाङ ग्यासी घीरी धेनी दे धी़रापगी च्यीगा मेन्दा, माउपारगी धी़रापला हुङगीन छेन घीरीले थो़स्योक को़ जेपालाक। 22 धेनी को़न्क्षोकगी घीरी मास्यीकागी श्याप होकदु श्या जेपालाक। धेनी क्षो़छोकगी क्षीदु खोङबाला घीरीगी उ को़ ॱनावालाक। 23 दे क्षो़छोक नी, खोङबागी कुसोक च्योक्रे लाक धेनी घीरी खाङा जेगीन, मास्यीकागी थोक्नेराङ क्षो़छोक फी़न्सुम छोक्पा जेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.