कोलोसेपा 1 - ॱलोवा1 को़न्क्षोकगी थुकोङ थोक्ने, मास्यीका येशुगी कुछाप, ङा पाउलु धाङ होरी नो तीमोथेउने, 2 कोलोसे ग्याजारु हो़गीन मास्यीकाला ॱलो का थुप्कीन धाम्पे पी़नक्याला, होरी याप को़न्क्षोकने थुक्जे धाङ श्यीदे, खेक्याला थोप्पास्योक। पाउलुगी काटीन्क्षे श्यी़वा धाङ ॱमो़लाम 3 खीकी दो़नला ॱमो़लाम श्यी़ घाङला, हेक्या होरी चोवो येशु मास्यीकागी याप, को़न्क्षोकला च्योई काटीन्क्षे श्यी़हो़क। 4 घीझ्येरी ॱनाना मास्यीका येशुगी खाला, खीकी धेपा धाङ धाम्पे मीक्या घीरीला खीकी चेवागी कोरला हीकी घोरहो़क। 5 धेपा धाङ चेवा दे, खीकी दो़न्दु नाम्खे श्यीङखामदु श्याकश्या रेवागी झ्येरी लाक। दी कोरला खेक्याई धेन्पे कागी ताम्शाङने एन्दुरु घोर हो़तालाक। 6 ताम्शाङ दे खीकी घुङदु ॱलेप्सालाक धेनी जीक्तेन घीरीदु ढेबु केरी फेली। होझ्येरीराङ खीकी घुङदुवाः खेक्याई ताम्शाङ घोरकीन धाङ को़न्क्षोकगी थुक्जेगी कोरला ॱङोन्ने ॱहाघोरकीन, ङीमानेराङ दे फेरी डी़। 7 दी कोरला, हीकी चेवे लेरोक एपाब्राने खीकी ज्यावालाक। खो हीकी छापला मास्यीकागी श्याप्तोक्पा, ॱलो काथुप्कीन च्यीक लाक। 8 धेनी धाम्पे थुक्ङीने झ्युजा खेक्याई चेवागी कोरला, खी़ हेक्याला स्येजुङ। 9 होझ्येरी हेक्याई खीकी कोरला घोरका ङीमाने, खीकी क्षीला ॱमेक्षेदा ॱमो़लाम ग्यावीहो़क। धेनी को़न्क्षोकगी खेक्याला खोङबाराङगी थुकोङगी, स्येराप छाङगो धाङ सेम्ङीने थोप्कीन स्येराप धाङ स्येयो़न ॱनाङास्योक ॱनेरी, हेक्या खोङला श्युवाहीन। 10 धेनी चोवोला कुरती हुङगीन मीछे पी़ये धाङ खोङबाला घीरीने थुक घेरु च्युक्ये धेनी ले शाङा घीरीला, ढेबु केये धाङ को़न्क्षोकगी स्येयो़नला, खेक्या छारती डोयेगी क्षीला, हेक्या ॱमो़लाम ग्यावीहो़क। 11 धेनी को़न्क्षोकगी शीजे धाङ धेन्पे नी़थुगी तोप घीरीने, शो़पा क्षे धाङ ॱना रीङा झ्युरी खेक्या स्युक्क्षे झ्युङयेगी क्षीला, हेक्या ॱमो़लाम ग्यावीहो़क। धेनी खेक्या घाटोगी खाङास्योक 12 धेनी हो़गी ग्यासी नाङदु धाम्पे मीक्याई, नोरकाला थोप्ताङ थोप्येगी ढाडा जेगीन, यापला खेक्याई काटीन्क्षे श्यी़वास्योक ॱनेरी, हेक्या ॱमो़लाम ग्यावीहो़क। 13 को़न्क्षोकगी होराङला मी़नाकगी वाङने थारपा जेदी, राङगी चेवे सेगी ग्यासी नाङदु होराङला ठीया जेपालाक। 14 सेगी थोक्ने, होराङला थारपा धाङ धीक्पागी घोयाङ हो़तालाक। ॱलानामेपे मास्यीका 15 मास्यीका नी, ॱमीकगी थोङ ॱमीथुप्कीन को़न्क्षोकगी कुयीप लाक धेनी को़पा घीरीने, एन्ला खोङ ठुवालाक। 16 घीझ्येरी ॱनाना खोङबागी गोनेराङ घीरी को़वालाक। नाम्खे श्यीङखाम धाङ साश्यीदु हो़गीन, ॱमीकगी थोङ थुप्कीन धाङ थोङ ॱमीथुप्कीन ग्यासीक्या याङना नी़थुक्या याङना पो़न्पोक्या याङना वाङग्युर झ्यीगीनक्या घीरी, खोङबागी थोक्ने धाङ खोङगी क्षीला को़वालाक। 17 खोङ नी को़पा घीरीने एन्ला श्युक हो़तालाक धेनी को़पा घीरी, खोङगी नाङ ॱने हो़तालाक। 18 खोङ राङगी कुसोक हीन्गीन, क्षो़छोकगी उ लाक। खोङ थोक्मागो लाक धेनी घीरीगी थोकला खोङ थोस्योक झ्युङयेला, खोङ छीवाने सो़न्गीन गोमागो लाक। 19 घीझ्येरी ॱनाना को़न्क्षोकगी फी़न्सुम छोक्पा घीरी खोङगी नाङ ॱनेयेला, को़न्क्षोक थुक घेवालाक। 20 धेनी को़न्क्षोकगी खोङगी ग्याङस्यीङगी कुठाकगी थोक्ने, श्यीदे जेदी साश्यी याङना नाम्खे श्यीङखामगी घीरी, खोङगी थोक्ने राङमुला दोमा जेपालाक। 21 एम्मा खेक्या ले ङेन्पा झ्येरी को़न्क्षोकने, खा डारी ग्याङदु सोरी, राङगी सेमने खोङला डा शीम्बालाक। 22 हीना खोङगी डुङदु खेक्या धाम्पा धाङ क्यो़न मेगीन धाङ क्यो़न्जे मेगीन तो़न्येगी क्षीला, धान्दा मास्यीकागी कु ढोङगीनगी गोने, को़न्क्षोकगी खेक्याला राङमुला दोमा जेपालाक। 23 होझ्येरी खेक्याई घोरकीन ताम्शाङने थोप्था रेवागो ॱमेपाङा, मी़थुने धेपाला तेन्पो ॱनेघो़। ताम्शाङ दे नाम्खे श्यीङखामगी होकदु जीक्तेनदु हो़गीन, घीरीला स्ये हो़तालाक धेनी ङा पाउलु दी श्याप्तोक्पा च्यीक हीन। क्षो़छोकगी क्षीला पाउलुगी काल्ले ङ्याङवा 24 धा ङी खेक्याई दो़नला ङ्याङगीन काङेला, ङा घाटो झ्यीदीहो़क। मास्यीकागी कुसोक हीन्गीन क्षो़छोकगी क्षीदु खोङगी दुक्ङेल ल्हाक्मा दे, ङी ली़ला जोक्वा झ्यीदाहीन। 25 खेक्याई क्षीदु ङाला को़न्क्षोकगी ॱनाङगीन लेगेनला तेन्ती, खोङगी का छाङबो झ्येरी स्येयेला, ङा क्षो़छोकगी श्याप्तोक्पा च्यीक झ्युहो़क। 26 धी़रापने धी़राप धेनी मीरापने मीराप थुक्पे हो़गीन साङवागो, धान्दा खोङबागी धाम्पे मीक्याला ॱङो़न हो़तालाक। 27 को़न्क्षोकगी ढाङमेगी शीजेगी साङवा दे, याहुदापा मेन्गीन मीरीकगी क्षीला ॱमीच्यीकी चाक्षे हीन्गीनगो, राङगी धाम्पे मीक्याला ॱङो़न्दु जेयेगो, को़न्क्षोकगी थुक घेवालाक। साङवा दे नी, मास्यीका खेक्याई नाङ हो़तालाक धेनी खोङ नी शीजेगी रेवागो लाक। 28 होझ्येरी खोङबाला हेक्या सेटाक झ्यीदाहीन। धेनी मी घीरीला मास्यीकागी नाङ तेन्पो शोयेला, हेक्या घीरीला ङेन्ता तारी, स्येराप घीरीने ॱलापच्या ॱलावीहो़क। 29 दो़न दी क्षीला, मास्यीकागी ङी नाङदु स्युक जेगीन नी़थु क्षेगी थोक्नेराङ, ङा ॱमीच्यीकी काल्ले ग्यावाहीन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.