२ तीमोथेउ 4 - ॱलोवा1 को़न्क्षोकगी दोङदु धाङ सो़न्पो धाङ स्यीम्बु ॱङीगी ठीम्चो़ जेगीन, मास्यीका येशुगी दोङदु धेनी खोङबागी धाब्ले फेप्सु धाङ ग्यासीला तेन्दी, ङा ख्यो़ला देरे च्याक ग्याहीन। 2 को़न्क्षोकगी का स्यो़क, धी़ हीन्गीन धाङ मेन्गीन ॱङीगाराला डाढीक धो़क। धेनी शो़पा क्षे थोक्ने ॱलोप्चुङगी थोक्ने मीक्याला ॱलापच्या ग्योप, क्यो़न तो़न धेनी सेमस्युक पोर। 3 घीझ्येरी ॱनाना मीक्याई तावा ढाङतेनगी ॱलापच्याला ङेन्ङी मेदो़दा, राङगी ङेन्ङी दो़गीन लाबक्या धाङ राङगी थेगीन ॱलोपो़नक्या चायेगी धी़ स्यारकीलाक। 4 धेनी धेन्पाने लोक्ती खुङलुङ मेगीन, तामग्युक्याई स्याम्ला डागीलाक। 5 ख्यो़राङ च्योई तेन्पो धो़क, दुक्पुक्या शो़पा झ्यी धेनी ताम्शाङ स्यो़क धेनी ख्यो़री श्याप्तोक डुप्तु च्युक। पाउलुगी थामे का 6 ङा नी सेरकेम पुयेला, पु रेन्दी ङा दायेगी धी़ बाप्सादुक। 7 ङी ॱमाक शाङा टाप हो़क धेनी ङी भाङदुरगो तासाहो़क धेनी ङी धेपा ॱरुङहो़क। 8 धा देने ॱहाला ङी क्षीला ढाङतेनगी उगेन श्याक हो़तालाक धेनी होदे ढाङतेनगी ठीम्पो़न, चोवोगी होदे ङीमागोला ङाला ॱनाङगीलाक धेनी ङाला च्यीका मेन्दा, खोङबागी धाब्ले फेप्सुला घागीन घीरीला ॱनाङगीलाक। 9 ङाचारु ग्योक्जे हुङयेला, घी थुक्तु थापस्यी झ्यी। 10 घीझ्येरी ॱनाना देमा, जीक्तेन देला छाक्ती ङाला पारी थेसालोनीकेरु लाजुङ। धेनी कारेसीकेन नी, गालातीया यु स्योकदु लाजुङ धेनी तीतोस नी दालमातीया यु स्योकदु लाजुङ। 11 लुका च्यीगा ङीमुला हो़क। ङी श्याप्तोकगी लेगाला, मारकु ङाला फेन थोक्वा झ्येरी, खोला चारी ख्यी़मुला ठीक्ती स्योक। 12 तुखीकोसला ङी एफीसु ग्याजारु झाहो़क। 13 ख्यो़ हुङी घाङला ङी तोरोआस ग्याजारु, कारपुगी चारु श्याकश्या फीघो़ धाङ पेछाक्या धाङ ॱमीक्सेदु पाकस्योकक्या खेरती स्योक। 14 शाङ शोगीन आलेक्जेन्डारगी ङाला ॱमीच्यीकी ॱनो़ क्याजुङ धेनी खी़ झ्येजागी लेन, चोवोगी खोला ॱनाङगीलाक। 15 ख्यो़याः खोने शाप-शाप झ्यी घीझ्येरी ॱनाना खो होरी ताम्शाङला ॱमीच्यीकी ङोलोक झ्यीदीक। 16 ठीम्पो़नगी दोङदु ङा थेङ धाङपो ठीम श्यी़ घाङला, घीरीगी ङाला पारी, ङा स्योकला सुवा लाङगी मीदुक। दी लेनगो, खुङक्या खाला ॱमाफोक्वास्योक। 17 हीना ङी थोक्ने ताम्शाङ छाङबो स्येयेला धेनी याहुदापा मेन्गीन मीरीक घीरीगी ॱहाघोरयेगी क्षीला, चोवो ङीमुला श्युक्ती ङाला स्युक ॱनाङजुङ। धेनी छीवे खाने ङाला क्योप जेजुङ। 18 चोवोगी ङाला ज्यावा ङेन्पा घीरीने क्योप जेगीलाक धेनी खोङबागी नाम्खे ग्यासीगी क्षीला, ङाला थारपा जेगीलाक। खोङबाला ग्युने ग्युन्दु शीजे हुङास्योक। आमेन। थामे छाम्डी 19 पीरीस्का धाङ आकुला ॱङीउ धेनी ओनीसीफोरुगी नाङमी घीरीला छाम्डी श्यी़। 20 एरेस्तु नी, कोरीन्थु ग्याजारु धेजुङ धेनी तोरोफीमोस नेपा झ्युरी मीलेतुरु राङ श्याक्पी। 21 घुङगा स्यारये एन्लाराङ, ङीचारु हुङये थापस्यी झ्यी। धेनी ईहुबुलुगी ख्यो़ला छाम्डी श्यी़क। धेनी पुदेन धाङ लीनु धाङ कालोदीया धाङ पी़न घीरीगीया, ख्यो़ला छाम्डी श्यी़क। 22 चोवो ख्यी़ सेम नाङदु श्युक्वास्योक। चोवोगी थुक्जे खेक्यामुला हुङास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.