२ पेटो 3 - ॱलोवाचोवो फेप्कीनगी कोरला 1 चेवेक्याओ, दे नी ङी खेक्याला ढीक्टा यीक ॱङीवागो लाक। धेनी दे यीक ॱङीगारा, ङी खेक्याला सेम ढाङपो केरु च्युक्येला, ढेन्सो़ ॱलाङयेगी क्षीदु ढीक्पालाक। 2 धाम्पे ॱङो़नस्येखेनक्याई एम्मा ॱनाङना ॱङो़नस्येक्या धाङ होरी चोवो धाङ क्याम्गो़नगी कुछापक्याई थोक्ने ॱनाङना काक्या, खेक्याई ढेन्सो़ झ्यीगीनगो ङा दो़दीहो़क। 3 गेक्षेस्योकगो खेक्याई दे ॱहाघोरा झ्यी, थामे ङीमाक्याला क्षाले ग्याप्कीनक्या, धेन्पागोला क्षाले ग्याप्ती राङगी दो़क्षाकगी स्याबाला डारी हुङगीलाक। 4 धेनी खुङक्याई देरे ॱनागीलाक, “खोङबा फेप्ये हीन्गीन धाम्चागो घाना? होरी धाङबी फामाक्या दारी सोसा धी़ने, जीक्तेनगी को़ने ॱहाला हो़गीन घीरी धान्दाः हुरेराङ दुक।” 5 घीझ्येरी ॱनाना को़न्क्षोकगी कागी थोक्ने, नाम्खे श्यीङखाम एम्माने हो़तालाक धेनी साश्यी दे क्षुने धेनी क्षुगी थोक्नेराङ को़ जेपालाक ॱनागीन लाब दे, खुङक्याई ॱहाघोरतीया या मीझ्यीदालाक। 6 धेनी दे क्षुने राङ होदे धी़गी जीक्तेनगो, क्षुलोकला भीप्ती चामेदु जेपालाक। 7 हीना को़न्क्षोकगी होदे कागी थोक्नेराङ, धान्दागी ॱनाम-सा ॱङीला मेगी ॱराक्येगी क्षीदु श्याक हो़तालाक धेनी ठीम्चो़गी ङीमा धाङ को़न्क्षोकगी काला मेङेन्गीनक्याला चामेदु ताङयेगी धी़ थुक्पेगी क्षीदु, श्याक हो़तालाक। 8 हीना चेवेक्याओ, चोवोगी क्षीदु ङीमा च्यीक नी, लो तोङ धाङ लो तोङ नी, ङीमा च्यीक च्योक्रे लाक ॱनेरी, खेक्या ढेन्बा माझ्ये। 9 मी रीङगाक्याई चोवोगी राङगी धाम्चा डुप्येला, धाला जेदुक ॱनेरी, साम्लो हो़नाः खोङबा धाला मेजेदालाक। हीना घीरीगी राङगी धीक्पा पारी सेम ग्युरती सुवाः मेताला माडोवास्योक ॱनेरी, खोङबा खेक्यामुला शो़गोम जेदालाक। 10 हीना चोवो फेप्कीन ङीमागो कुमु हुङगीन च्योक्रे हुङगीलाक। होदे ङीमाला नाम्खा नी, हुरडा क्षे ग्याप्ती येरी डुगीलाक धेनी झ्युङवा श्यी नी, मेगी तोरस्यीक ताङगीलाक धेनी साश्यी धाङ दी नाङ हो़गीन घीरी, को़न्क्षोकगी मेताला जेदु च्युक्कीलाक। 11-12 धा दे घीरी देरे झ्येरी मेताला डोये हीन्गीन झ्येरी, खेक्या मी घारे च्यीक झ्युङ घो़गुले? खेक्या को़न्क्षोकगी ङीमाला घुक्ती धेताराङ धेनी होदे ग्योक्जे हुङदु च्युक्ये झ्यीदाराङ, खेक्या धाम्पा धाङ क्षो़सेमगी मीछे क्याघो़। होदे ङीमाला नाम्खा नी, मेगी मेताला डुगीलाक धेनी झ्युङवा श्यी नी, मेगी ॱराक्ती श्यी़री डुगीलाक। 13 हीना खोङबागी धाम्चाला तेन्ती, ढाङतेन ॱनेसा नाम्खे श्यीङखाम साबा धाङ साश्यी साबाला, होराङक्या घुक्ती धेतालाक। 14 होझ्येरी चेवेक्याओ, खेक्या दो़न देक्याला घुक्ती धेगीन झ्येरी, को़न्क्षोकगी डुङदु ढीमा मेगीन धाङ क्यो़न मेगीन धाङ श्यीदेला थुक्येगी क्षीदु घी थुप-थुप थापस्यी झ्यी। 15 होरी चोवोगी शो़गोम नी, थारपा हीन्गीनगो ची ग्योप। धेनी होरी चेवे पी़न पाउलुगीयाः, को़न्क्षोकगी खोला ॱनाङना स्येरापगी गोने खेक्याला ढीक हो़तालाक। 16 खी़ खोरी यीक घीरीला दो़न देक्याई कोरला ढीक हो़तालाक। खी़ यीक देक्याला दो़न रीङगाक्या ॱहाघोरयेला, काल्ले घाक्वा हो़तालाक धेनी स्येयो़न मेगीन धाङ सेम तेन्पो मेगीनक्याई सुङराप श्येम्माक्याला ॱयो़गीन च्योक्रे, होदे दो़नक्याला ॱयो़लालाक धेनी राङगी राङला मेताला ताङालाक। 17 होझ्येरी चेवेक्याओ, दो़न देक्या एन्लाराङ ॱहाघोरती शाप-शाप झ्यी। देरे झ्येरी ठीम मेगीन मीक्याई नोन्डुला गो ॱमाखोर धेनी राङगी ॱनेसा तेन्पोगो ॱलाक्तु ॱमाच्युक। 18 हीना होरी चोवो धाङ क्याम्गो़न येशु मास्यीकागी थुक्जे धाङ स्येयो़नला छारलुङ झ्येरी सोङ। खोङलाराङ धान्दा धाङ थामे ङीमा थुक्पे, शीजे हुङास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.