२ पेटो 2 - ॱलोवाॱङो़नस्येखेन शोक्पोक्या धाङ ॱलोपो़न शोक्पोक्याई कोरला 1 हीना ईस्राएल्पाक्याई खोक्दु ॱङो़नस्येखेन शोक्पोक्या थो़न्गीन च्योक्रे, खीकी खोक्दुवाः ॱलोपो़न शोक्पोक्या थो़न्गीलाक। खुङक्याई ॱनो़ क्यागीन क्षो़ शोक्पोक्या साङवाला तो़न्गीलाक धेनी दे च्यीगा मेन्दा, खुङक्याला रीङगी ॱली़गीन चोवोलाः, खुङक्याई खेलेन मीझ्यीगीलाक। धेनी राङगी खाला तोरस्यीक ग्योवा खेरती हुङगीलाक। 2 मी माङागी खुङक्याई दो़क्षाकगी चो़लाम च्योक्रे झ्यीगीलाक धेनी खुङक्याई झ्येरी, धेन्पे लामला ॱमेटा फोक्कीलाक। 3 धेनी खुङक्याई ॱहाम्बा झ्येरी, खेक्याला शोक्पो तामक्या चोम्दी गोकोर ताङगीलाक। खुङक्याला फोक्ये हीन्गीन ठीमगो, एम्माने थाक्चो़सा हो़तालाक धेनी खुङक्याला मेताला ताङगीनगो, ॱङीला ॱमास्योर हो़तालाक। 4 घीझ्येरी ॱनाना नाम्खे भाङछेनक्याई धीक्पा झ्यीदी घाङला, को़न्क्षोकगी खुङक्याला ॱलो़ ताङा माजेपालाक हीना खुङक्याला ॱङ्यावादु ॱयुक जेपालाक। धेनी ठीम्चो़गी ङीमा थुक्पेगी क्षीला च्याक्थाकगी धाम्दी, मी़नाकगी नाङला श्याक जे हो़तालाक। 5 धेनी क्षो़ला ॱमीचीगीनक्याई खाला, को़न्क्षोकगी क्षुलोक ताङा जेदी घाङला, खोङबागी एम्मागी जीक्तेनला ॱलो़ ताङा माजेपालाक हीना ढाङतेनगी क्षो़ स्येगीन, नोआ धाङ खी़ नाङमी श्येम्मा धी़नला च्यीगा क्योप जेपालाक। 6 धेनी खोङबागी सादोम धाङ गोमोरा ग्याजाक्याला मेगी ॱराक्ती, चामेदु ताङा जेपालाक। देरे जेदी खोङबागी क्षो़ला ॱमीचीगीन मीक्याला घी झ्युङये हीन्गीनगी, पे च्यीक ॱनाङा जेपालाक। 7 हीना को़न्क्षोकगी लोतला क्योप जेपालाक। खो नी, ठीम मेगीन मीक्याई दो़क्षाकगी चो़लामला सेम फाम्गीन, मी ढाङपो च्यीक लाक। 8 (होदे मीक्या खोक्दु धेताराङ धेनी श्याक्मो ढाङी खुङक्याई ले ङेन्पाक्या थोङाराङ धेनी ङेन्दाराङ, खो खोरी ढाङसेम नाङदु ॱमीच्यीकी सेम्बा दुक्वालाक।) 9 धा देरे झ्येरी, क्षो़सेमगी मीला छो़ता नाङने क्योप्ये धाङ क्षो़ ॱमीचीगीनक्याला ठीम्चो़गी ङीमा थुक्पे छेपा होकदु श्याक्येला, चोवोगी खेन्दालाक। 10 धेनी ॱमीक्सेदु मीला नोगीन दो़क्षाकला क्षाक्कीन धाङ आङजाला थोङछुङ झ्यीगीनक्याला, चोवोगी ठीम्चो़गी ङीमा थुक्पे छेपा होकदु श्या जेगीलाक। देक्या नी, पोबा क्षे धाङ ग्योङा झ्येरी शीजेचेनक्याला ॱमेटा ताङयेला, खुङक्या जीक्टा मीझ्यीदालाक। 11 हीना नाम्खे भाङछेनक्या वाङ धाङ नी़थुला देक्याने क्षे हो़नाः, चोवोगी डुङदु होदे शीजेचेनक्याला ॱमेटा पाप्ती क्यो़न ॱमीचुक्वालाक। 12 हीना दे मीक्याई राङगी ॱहामेघोगीन दो़नक्याला कुरवा धेप्पालाक। देक्या नी शीम्दी सेयेगी क्षीदु, च्यीगा केक्या रीक्पा मेगीन धाङ राङदो़गी च्यो़पा झ्यीगीन सेम्चेनक्या च्योक्रे लाक। धेनी सेम्चेनक्या च्योक्रे खुङक्याः मेताला डुगीलाक। 13 खुङक्याई श्येम्माला ॱनो़ क्यारी, होदेगी छापला राङलाः ॱनो़ फोक्कीलाक। धेनी खुङक्याई क्षीदु कीपो ताङयेगो, ङीङमोराङ छो़ मीशीम्दा शा-थुङ झ्येरी धेये लाक। खुङक्या खीकीमुला डो़नला शामा शी घाङलाः, मीला गोकोर ताङयेला घालालाक। खुङक्या नी, खेक्याला ङोजा खेरती हुङगीन क्यो़न च्योक्रे लाक। 14 लोक्येमगी खाङखा खुङक्याई ॱमीकगी धीक्पा झ्यीयेला, नामा छाम मेश्यालाक। धेनी तेन्पो मेगीन सेम हो़गीनक्याला, खुङक्याई ॱली़लालाक। खुङक्याई सेम सेन्ना झ्यीयेला घोम हो़तालाक धेनी खुङक्या ॱमेमो फोक्पा भुटुक लाक। 15 खुङक्याई ढाङतेनगी लाम पारी, लाम नोरती बेओरगी भीजा बालामगी स्याबाला डाङ हो़तालाक। खो नी मेढाङा झ्येरी, थोप्कीन ॱलाज्याला घालालाक। 16 हीना खी़ मेढाङा झ्यीगीनगोला भुङगु च्यीकगी थोक्ने काको़न थोप्पालाक। धेनी लाब ताङ ॱमीथुक्कीन भुङगुगी, मी केक ग्याप्ती होदे ॱङो़नस्येखेनगी ॱङ्योम्बा च्योक्रे, च्यो़पा झ्यीगीनगो काक्पालाक। 17 दे ॱलोपो़न शोक्पोक्या क्षुमीक काम्बोक्या धाङ ॱलुङबुगी धेता ॱमुक्पा च्योक्रे लाक। खुङक्याई क्षीदु मी़नाक तीङरीङबोगी घोक्जा श्याक हो़तालाक। 18 देक्याई दो़न मेगीन धाङ ङागेलगी तामक्या स्येये धेनी ङेन्पे मीछे पी़गीनक्याने, धान्दाका थारती होवा मीक्याला, ली़गी दो़छाकक्याई गोने ॱली़लालाक। 19 धेनी खुङक्याला राङवाङ तेरयेगी धाम्चा श्याक्नाः, हीना ॱलोपो़न शोक्पो खोराङक्या राङ तोरस्यीक ताङगीन चो़पागी ॱयोक्पो लाक घीझ्येरी ॱनाना मी घीन्गी वाङ होकदु स्योरी, होदेगीराङ ॱयोक्पो झ्युङालाक। 20 होरी चोवो धाङ क्याम्गो़न येशु मास्यीकाला ङोस्येरी, दे जीक्तेनगी ङेन्पाक्याने थार सारतीयाः याङ धाब्ले होदेगी वाङ होकदु छी़ना, हुरे मीक्याई ॱनेछुगो एम्माले श्युकला दुक्वा झ्युङगीलाक। 21 घीझ्येरी ॱनाना ढाङतेनगी लाम स्येरी, खुङक्याला ॱनाङना धाम्पे काक्याला ग्याप लोक्वालेः होदे लामगो नामा ॱमास्ये हो़ना, खुङक्याई क्षीदु घा झ्युङयेहो़क। 22 खुङक्या नी धेन्पा पे देगी पाङपो लाक, “की राङगी क्युकला लोक्ती हुङालाक।” धेनी “शु ठी़ठा फाक्पा, दाम्बालाराङ चेमो चेरु डोवालाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.