२ पेटो 1 - ॱलोवा1 येशु मास्यीकागी ढेन्योक धाङ कुछाप सीमोन पेटोने, होरी को़न्क्षोक धाङ क्याम्गो़न येशु मास्यीकागी ढाङतेनला, हेक्याला च्योक्रे चाक्षे धेपा थोप्थाक्याला, 2 को़न्क्षोक धाङ होरी चोवो येशुगी स्येरापगी नाङ थुक्जे धाङ श्यीदे, खेक्याला मेछो़ली थोप्पास्योक। धेपाला छारयेगी कोरला 3 को़न्क्षोकगी राङगी नी़थुगी गोने, मीछे धाङ क्षो़सेमगी क्षीला घो़गीन घीरी, खोङगी होराङला ॱनाङ हो़तालाक। दे नी, खोङबा राङगी शीजे धाङ थुक शाङपोगी गोने होराङला भो़ जेगीन, खोङबाला होरी ङोस्येस्या झ्येरी दे घीरी थोप्पालाक। 4 धेनी खोङबागी शीजे धाङ थुक शाङपोगी गोने, होराङला खोङगी धाम्चा खाक्क्षेक्या धाङ चाछेक्या ॱनाङ हो़तालाक। देक्या गोने दो़पा ङेन्पाक्याई झ्येरी, जीक्तेन नाङ हो़गीन ङेन्पाक्याने थारती, खेक्या को़न्क्षोकगी ॱलानामेपे राङश्यीला थेये राक हो़तालाक। 5 होझ्येरी घी झ्यी थुप-थुप खेक्याई धेपाला चो़लाम शाङपो धेनी चो़लाम शाङपोला स्येयो़न 6 धेनी स्येयो़नला राङ-छो़ शीम्गीन धेनी राङ-छो़ शीम्गीनला शो़पा धेनी शो़पाला क्षो़सेम, 7 धेनी क्षो़सेमला पी़नक्याला झ्यीगीन झाम्पा धेनी पी़नक्याला झ्यीगीन झाम्पा खाला घीरीला झ्यीगीन झाम्पागो ॱनो़न्गा ग्योप। 8 घीझ्येरी ॱनाना दो़न देक्या खीकी नाङ हो़ना धेनी फेरी डोना, खेक्या होरी चोवो येशु मास्यीकागी स्येयो़नला फेन मेगीन धाङ ढेबु मेगीन झ्युङयेने, देक्याई क्योप्कीलाक। 9 हीना दो़न देक्या मेगीन मीक्या राङगी धीक्पा ॱङीङबाक्या दाक्सासागो ज्येदी डुगीन, थाक्रीङाला हो़गीनगो ॱमेथोङगीन श्यारा च्योक्रे लाक। 10 होझ्येरी पी़नक्याओ, खेक्याला को़न्क्षोकगी भो़पा धाङ दाम्दागोला, ॱङोन्ने हीन्गीनगो तो़न्ये क्षीदु धोराङा ची़न्डी़ झ्यी घीझ्येरी ॱनाना देरे झ्यीना, खेक्या खेरी धेपाने ल्हीम्गीमालाक। 11 धेनी होझ्येरी खेक्याला होरी चोवो धाङ क्याम्गो़न येशु मास्यीकागी, थामेपे ग्यासी नाङदु सी़याङ खाक्क्षे थोप्कीलाक। धाम्पे सुङरापगी ॱङो़नस्ये 12 होझ्येरी खेक्याई दो़न देक्या ॱहाघोरका धाङ खेक्याला हो़गीन धेन्पाला तेन्पो हो़नाः, ङा खेक्याला च्योई देक्या ढेन्सो़ ॱलाङयेहीन। 13 ङा सो़न्पो हो़ती घाङला, खेक्याला दो़न देक्याई कोरला ढेन्सो़ ॱलारी शाप-शाप शोना ङा घागुलाक। 14 घीझ्येरी ॱनाना होरी चोवो येशु मास्यीकागी ङाला सावो तो़न जेगीन च्योक्रे, ङा स्यी रीन्जुङ ॱनेरी ङाला स्येयेहो़क। 15 धेनी ङा स्यी सारतीयाः खेक्याई दे दो़नक्या नाम्हीना ढेन्सो़ झ्यी थुक्वास्योक ॱनेरी, ङा घी थुप-थुप काल्ले ग्याप्येहीन। 16 घीझ्येरी ॱनाना हीकी खेक्याला होरी चोवो येशु मास्यीकागी नी़थु धाङ खोङ फेप्ये हीन्गीनगी कोरला स्येदी घाङला, मीगी चोम्दी शो़सा ताम्पेक्या च्योक्रे ॱमास्ये, हीना खोङबागी शीजे हीकी ॱमीकगी ॱङो़न्सुम ज्यावालाक। 17 घीझ्येरी ॱनाना याप को़न्क्षोकने खोङबाला कुरती धाङ शीजे थोप्यी घाङला, शीजे धाङ धेन्पे सुङकेकगी खोङला, “दे नी ङी चेवे भु हीन धेनी खी़मुला ङा ॱमीच्यीकी ङ्यामो घा हो़क।” सुरी सुङकेक दे थो़न्बालाक। 18 होदे धाम्पे री खाला हेक्या खोङबामुला हो़ती घाङला, नाम्खे श्यीङखामने थो़न्गीन सुङकेक दे हेक्याई राङ घोरजुङ। 19 धेनी होरीमुला हो़गीन ॱङो़नस्येखेनक्याई का धेन्पा हीन्गीनगो, हेक्या ॱयोल्ले तेन्पो झ्युजुङ। धेनी ॱनाम शारा-शीरी माझ्युङगीन धाङ खीकी सेम नाङदु ॱङारोकगी कारमा ॱमास्यारकीन थुक्पे, मी़नाकगी नाङला भारती धेगीन क्युङ च्योक्रे, खेक्यागीयाः दे का देला दो़नाङ झ्यीना घा हुङगीलाक। 20 दे घीरीगी थोकला, सुङरापगी ॱङो़नस्ये च्यीया, ॱङो़नस्येखेन राङगी ढेस्ये मालाक ॱनेरी, खेक्याई ॱहाघोरा झ्यी। 21 घीझ्येरी ॱनाना मीगी दो़पाला तेन्ती, ॱङो़नस्ये च्यीया मायोवालाक हीना धाम्पे थुक्ङी थोक्ने, को़न्क्षोकगी थोक्ने मीगी सुङ दे स्येपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.