२ योहान्ना 1 - ॱलोवा1 ङा गेम्पाने, को़न्क्षोकगी दामा जेजा भोमो धाङ मी़ टुवाक्याला, यीक दे ढीयाहीन। खेक्याला ङी ॱङोन्नेगी चेवा झ्यीदीहो़क धेनी ङा च्यीगा मेन्दा, हीना धेन्पा ङोस्येगीन घीरीगीया खेक्याला चेवा झ्यीदालाक। 2 घीझ्येरी ॱनाना धेन्पा नी, होरी नाङ हो़तालाक धेनी होरी नाङ ग्युने ग्युन्दु ॱनेगीलाक। 3 याप को़न्क्षोक धाङ यापगी से, येशु मास्यीकाने थुक्जे धाङ ॱङीङजे धाङ श्यीदे, होराङक्या नाङ धेन्पा धाङ झाम्पागी गोने ॱनेलास्योक। 4 ख्यी़ टुवाक्याने रीङगा यापगी होराङला ॱनाङना का च्योक्रे, धेन्पे लामला ग्युक्कीनगो थोरी, ङा ॱमीच्यीकी ङ्यामो ग्येजुङ। 5 धा चेवे भोमो, ङा ख्यो़ला काठीम साबा च्यीक ढीयामेन हीना एम्माने होरीमुला हो़गीन, काठीमगो राङ ढीयाहीन। खेक्या च्यीकगी च्यीकला झाम्पा झ्यी ॱनेरी, ङा श्योवा पुलाहीन। 6 झाम्पा नी खोङगी सुङगीन काला चीरी, मीजी पी़ये लाक। खेक्या झाम्पे गोने मीजी पी़घो़ ॱनेरी, ॱनागीन काठीम दे खीकी गोमानेराङ घोर हो़तालाक। 7 घीझ्येरी ॱनाना येशु मास्यीका नी, कुली़ला फेप्कीनगो खेलेन मीझ्यीगीन, गोकोर ताङगीन माङा जीक्तेनदु थो़न्सादुक। देरे मी नी, गोकोर ताङगीन धाङ मास्यीकागी डा लाक। 8 हेक्याई डुप्टा दो़नगो खेक्याई स्योरतु ॱमाच्युक हीना खेक्याला ज्यागा छाङगो थोप्ये क्षीला, खेक्या शाप-शाप झ्यी। 9 मास्यीकागी सुङगीन क्षो़ला ॱनेती मेधेता, देने थारी ग्युक्कीनक्यामुला को़न्क्षोक मीश्युक्वालाक। हीना दे क्षो़लाराङ ॱनेती धेगीनक्यामुला, याप धाङ से ॱङीगारा श्युक्वालाक। 10 खीकीचारु होरी दे सुङगीन क्षो़ दे खेरती मेयोङगीन सुलाः, खीकी खाङबा नाङदु ॱमासी़ याङना छाम्डी माश्यी़। 11 घीझ्येरी ॱनाना देरेक्याला छाम्डी श्यी़गीनगो, खुङक्याई लेङेनला डेलालाक। 12 ङा खेक्याला ढीक्ये माङा हो़क हीना ङा स्यु धाङ ॱनाक्चागी, होदेक्या ढीक्ङी मेदो़दा। हीना होरी घाटो खाङये क्षीला, ङा खेक्याला थुक्ती खीकी ङोदोङ तेरी, लाब ताङयेगी रेवा हो़क। 13 को़न्क्षोकगी दामा जेजा खीकी नुमोगी, टुवाक्यागीया खेक्याला छाम्डी श्यी़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.