२ कोरीन्थुपा 1 - ॱलोवा1 को़न्क्षोकगी थुकोङ थोक्ने, मास्यीका येशुगी कुछाप, ङा पाउलु धाङ हीकी पी़न तीमोथेउने, कोरीन्थुरु हो़गीन को़न्क्षोकगी क्षो़छोक धाङ आकाईया नाङ घीरीरु हो़गीन धाम्पे मी घीरीला, 2 होरी याप को़न्क्षोक धाङ चोवो येशु मास्यीकाने, खेक्याला थुक्जे धाङ श्यीदे थोप्पास्योक। को़न्क्षोकला तो़पा पुवा 3 होरी चोवो येशु मास्यीकागी को़न्क्षोक धाङ यापला तो़पा हुङास्योक धेनी ॱङीङजेचेनगी याप धाङ सेम्सो घीरीगी, को़न्क्षोकला तो़पा हुङास्योक। 4 खोङबागी होराङक्याई दुङा घीरीला सेम्सो जेदालाक। धेनी को़न्क्षोकने होराङला थोप्था सेम्सो देनेराङ, होराङक्यागीयाः दुक्पु ङ्याङगीनक्याला सेम्सो पार थुक्कीलाक। 5 घीझ्येरी ॱनाना होराङ मास्यीकागी दुक्ङेलला घाजो़ माङा थेदुई, होदेरेराङ झ्येरी मास्यीकागी थोक्ने, को़न्क्षोकगी होराङला सेम्सो मेछो़ली ॱनाङगीलाक। 6 हेक्याला दुक्पु झ्युङना, होदेगो खेक्याला सेम्सो धाङ थारपा थोप्येगी क्षीदु लाक। धेनी हेक्याला सेम्सो थोप्हो़ना, खेक्याला सेम्सो थोप्कीलाक। धेनी हीकी ङ्याङङ्या दुक्पु च्योक्रे, खेक्याई होदे दुक्पुगो शो़पा झ्येरी घोमाराङ, खेक्यागीयाः होदेराङ सेम्सो ङ्यामङ्युङ झ्यीगीलाक। 7 धेनी खेक्याई क्षीदु हीकी रेवा तेन्पो हो़क घीझ्येरी ॱनाना खेक्या हीकी दुक्पुमुला ङ्याङगीन च्योक्रेराङ, हेक्याला थोप्था सेम्सोगो खेक्याला थोप्कीलाक ॱनेरी हेक्याला स्येयेहो़क। 8 पी़नक्याओ, हीकी एशीयारु ङ्याङगीन दुक्पुगो खेक्याई स्येलाझ्यी ॱनेरी, हेक्या दो़दीहो़क। हेक्या शो़पा घोम ॱमीथुक्कीन ॱमीच्यीकी दुक्पुक्षेला छी़दी, हेक्या सो़न्पो धेटो ॱनेरी रेवाः माझ्युङ। 9 हेक्याला सेयेगी क्षेपा फोक्कीन च्योक्रे छोरजुङ। हीना दे नी हेक्या राङला तेन्ये मेन्दा, स्यीम्पोला सो़न्पो जेगीन को़न्क्षोकला तेन्घोयेगी क्षीदु झ्युवालाक। 10 खोङबागी हेक्याला हुरे जीक्टाक्षे ङेन्काने क्योप जेजुङ धेनी खोङगी हेक्याला याङ क्योप जेगीलाक, धेनी माउपारलाः खोङबागी हेक्याला क्योप जेगीलाक ॱनेरी हेक्याला रेवा हो़क। 11 खेक्याई ॱमो़लामगी थोक्ने, हेक्याला रोवा झ्येवालाक होझ्येरी ॱमो़लाम माङागी थोक्ने, हेक्याला थोप्था झ्यीलापक्याई क्षीदु, हीकी छापला मी माङागी को़न्क्षोकला काटीन्क्षे श्यी़गीलाक। पाउलुगी क्षास्यी ग्युरकीनगी कोर 12 हीकी ङोम्सो झ्यीयेगी दो़न नी, दे जीक्तेनगी मीक्यामुला हीकी चो़पा धाङ ॱमीक्सेदु खेक्यामुला हीकी ढेवा नी, को़न्क्षोकने झ्युङगीन सेम ढाङपो धाङ चाङमा थोक्ने हीन्गीनगो, हीकी स्येयो़नगीराङ पाङपो झ्यीदालाक। दे नी जीक्तेनगी स्येरापगी थोक्ने मेन्दा, को़न्क्षोकगी थुक्जे थोक्ने झ्युवालाक। 13 धेनी खेक्याई ढोक ॱमीथुक्कीन धाङ ॱहाघो ॱमीथुक्कीन लाबक्या, हेक्या मीढीक हो़क। 14 धेनी खेक्याई हीकी कोरला तीते च्यीक ॱहाघोरसागीन झ्येरी, धा हीकी कोरला घीरी ॱहाघोरास्योक ॱनेरी, ङी रेवा हो़क। धेनी चोवो येशु याङ फेप्ये हीन्गीन ङीमाला, हेक्याई खीकी क्षीला ङोम्सो झ्यीगीन च्योक्रे, खेक्यागीयाः हीकी क्षीला ङोम्सो झ्यी थुक्कीलाक। 15 दे लाब दे ङाला तेन्देन स्येये झ्येरी, खेक्याला धाब्ले झ्यीलाप थोप्पास्योक ॱनेरी, ङा एन्ला खीकीचारु हुङयेगी दो़पा झ्येवी। 16 ङा माकेडोनीयारु डी़ घाङला, खेक्याला थुक्ये धेनी याङ माकेडोनीयाने खेक्याचारु लोक्ती हुङये धेनी खेक्याने राङ ङाला युदेयारु डोयेगी रोवा राक्येगो, ङी दो़पा झ्येहो़क। 17 ङी देरे दो़पा झ्यीगीनगो तेन्पो मेगीन च्योक्रे दुक्ये? याङना धी़ च्यीकला राङ “लाक, लाक” धेनी “मालाक, मालाक” ॱनेरी जीक्तेनगी मीक्या च्योक्रे, ङी क्षास्यीक्या शो़ दुक्ये? 18 हीना को़न्क्षोक ॱलोते छोक्पा हो़गीन च्योक्रे, हीकी खेक्याला “लाक” धाङ “मालाक” ॱनागीनगी तामक्या ॱमास्येहो़क। 19 घीझ्येरी ॱनाना खेक्याई खोक्दु ङा, सीलवानु धाङ तीमोथेउगी ताम्शाङ स्येस्या, को़न्क्षोकगी से, येशु मास्यीका नी “लाक” धाङ “मालाक” ॱनेरी मालाक हीना खोङगी नाङ च्योई “लाक” च्यीगा हुङालाक। 20 घीझ्येरी ॱनाना को़न्क्षोकगी धाम्चा घीरी, खोङबागी नाङ डुप्पालाक। होझ्येरी को़न्क्षोकगी शीजेगी क्षीदु, खोङगी थोक्ने होराङ “आमेन” ॱनालाक। 21 धा हेक्याला खीकीमुला मास्यीका येशुगी नाङ तेन्पो जेगीन धाङ हेक्याला दामा जेगीनगो को़न्क्षोक लाक। 22 धेनी खोङबागी होराङक्या खाला, राङगी हीन्गीनगी थेचे ग्याप जे हो़तालाक धेनी खोङबागी थुक्ङीगो, होरी सेम नाङला गेलेनगी क्षीदु ॱनाङ हो़तालाक। 23 खेक्याला घाक्वा मीझ्युङयेगी क्षीदु, ङा कोरीन्थुरु मायो धेनी दे लाब दे ङा को़न्क्षोकला पाङपो चुक्ती ॱनाहीन। 24 खीकी धेपे खाला हीकी वाङ झ्यीयेगी दो़पा मेक हीना खेक्याई घाटोगी क्षीदु हेक्या, खीकीमुला लेगा झ्यीदालाक। घीझ्येरी ॱनाना खेक्या खेरी धेपाला तेन्पो दुक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.