१ तीमोथेउ 1 - ॱलोवा1 होरी क्याम्गो़न को़न्क्षोक धाङ होरी रेवा मास्यीका येशुगी काला तेन्ती, मास्यीका येशुगी कुछाप ङा पाउलुने, 2 धेपाला ङी धेन्पा भु तीमोथेउला, याप को़न्क्षोक धाङ होरी चोवो मास्यीका येशुने, थुक्जे धाङ ॱङीङजे धाङ श्यीदे भापास्योक। क्षो़ शोक्पोक्याई कोरला ङेन्ता 3 ङा माकेडोनीया युदु डी़ घाङला, ङी ख्यो़ला श्यी़गीन च्योक्रे होदुरु हो़गीन तावा शोक्पोगी क्षो़ ॱलाप्कीनक्याला ङेन्ता ताङयेला, ख्यो़ एफीसु ग्याजारु राङ धो़क। 4 धेनी खुङलुङ मेगीन तामक्या धाङ जोक्ये मेगीन रीग्युक्याई स्याम्ला, खुङक्याला डारु ॱमाच्युक। देरेक्याई धेपाने रालुगीन, को़न्क्षोकगी क्षाक्लेक्या डुप्तु ॱमीच्युक्वालाक। 5 होरी ॱलापच्यागी ॱमीक्यु नी, सेम चाङमा धाङ स्येराप शाङपो धाङ धेन्पा धेपाने झ्युङगीन झाम्पा लाक। 6 मी रीङगा देक्या पारी, दो़न्दाक मेगीन ढो़लीङला गो खोरती धेदुक। 7 देरे मीक्या राङगी घी ॱनागीन याङना घीन्गी थोकला पोबा केरी ॱनागीनगो घीया ॱहामाघोवालाः, क्षो़ठीमगी ॱलोपो़नक्या झ्युङयेगी दो़पा झ्यीदालाक। 8 क्षो़ठीम दे ढाङपो झ्येरी चीना, क्षो़ठीमगो शाङा दुक ॱनेरी होराङ स्येलालाक। 9 दे स्येरी, क्षो़ठीम दे मी ढाङपोगी क्षीला मेन्दा, ठीम तोरकीन धाङ खाला मेङेन्गीन धेनी क्षो़ ॱमीचीगीनक्या धाङ धीक्चेनक्या धेनी धाम्पा मेगीन धाङ क्षो़ला दो़नाङ मीझ्यीगीनक्या धेनी फामा सेगीनक्या धाङ मी सेगीनक्या, 10-11 लोक्येम्पाक्या धाङ फोला चो़गीन धेनी मी ढेन्योकला चोङगीन धाङ शोक स्येगीनक्या धेनी ॱना ॱमीचीगीन धाङ झ्यीलापचेनगी को़न्क्षोकगी, ङाला ॱनाङगीन शीजेचेनगी ताम्शाङगी तावा ढाङपोला ॱमीथी़न्गीन, घीरीगी क्षीला लाक। पाउलुला को़न्क्षोकगी थुक्जे शीक्वा 12 ङाला स्युक ॱनाङगीन, होरी चोवो मास्यीका येशुला ङा थुक्चीछे पुलाहीन। घीझ्येरी ॱनाना एम्मा, ङा को़न्क्षोकला कुरवा धेप्कीन च्यीक धाङ दुक्जोङ ताङगीन धाङ मी चुपो च्यीक झ्येरीयाः, खोङबागी श्याप्चीला ङाला को़ जेदी, खोङबागी ङाला ॱलोते जेसोङ। 13 धेनी ङाला ॱङीङजे थोप्जुङ घीझ्येरी ॱनाना होदे घीरी धेपा मेती घाङला, ङी ॱमास्येवा झ्येवालाक। 14 होरी चोवो येशुगी थुक्जे, मास्यीका येशुने झ्युङगीन धेपा धाङ झाम्पामुला, ङाला मेछो़ली ॱनाङा जेसोङ। 15 “मास्यीका येशु नी, धीक्चेनक्याला क्योप्येला जीक्तेनदु फेप्पालाक।” ॱनागीन दे ॱलो का थुप्कीन धाङ घीरीगी थोक्ने खेलेन झ्यीघोगीन दुक। होदे धीक्चेनक्याने ङागो चो हीन। 16 हीना ङा धीक्चेनगी चो झ्येरीया, को़न्क्षोकगी ङाला थुक्जे शीक्ती, मास्यीका येशुगी राङगी याङदाक्पे शो़पागी पे झ्युङयेला, ङाला भेचो़ ॱनाङजुङ। देरे झ्येरी मी श्येम्माक्यागीया खोङला धेपा झ्येरी, थामेपे छेसोक थोप्कीलाक ॱनेरी ॱहाघोरकीलाक। 17 धी़ तेन्दु ॱनेगीन ग्यावु, जोक्ये मेगीन, ॱमीकगी थोङ ॱमीथुप्कीन को़न्क्षोक च्यीक च्यीक्पोला, ग्युने ग्युन्दु कुरती धाङ तो़पा झ्युङवास्योक। आमेन। 18 ङी भीजा तीमोथेउ, ख्यी़ कोरला एम्मा ॱङो़न स्येगीन छीकक्याला तेरी, ङा ख्यो़ला का दे ॱलोकारी कुलाहीन। होदे छीकक्याला खाला ङेन्दी धाङ राङगी धेपा धाङ स्येराप शाङपोला तेन्दी, ॱमाक शाङपो टोप। 19 रीङगागी राङगी स्येराप शाङपोला मेङेन्दा, राङगी धेपाराङ मेताला तावालाक। 20 होदेक्याने हुमेनायु धाङ आलेक्जेन्डार ॱङीउ लाक। को़न्क्षोकला कुरवा मेदेप्येगी कोरला ज्याङयेला, ङी दे ॱङीउला धी़कगी लाक्पाला ची ग्याप्हो़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.