१ थेसालोनीकेपा 5 - ॱलोवाचोवोगी ङीमा 1 पी़न्दाक्याओ, धी़ धाङ ॱनामधी़गी कोरला खेक्याला ढीक घोये मेक। 2 घीझ्येरी ॱनाना छेमु कुमा हुङगीन च्योक्रे, चोवोगी ङीमा हुङगीलाक ॱनेरी, खेक्या घामोमा स्येलालाक। 3 मीक्याई धी़ दे श्यीदे धाङ तेन्दा दुक ॱनी घाङला, ॱहाताक्पाला केमीगी केशुक लाङगीन च्योक्रे, खुङक्या खाला तोरक्यो़न हुङगीलाक धेनी खुङक्या घानेयाः थारकीमालाक। 4 हीना खे पी़नक्या मी़नाक्पाला मेधेगीन झ्येरी, चोवोगी ङीमा दे कुमा च्योक्रे हुङना खेक्या ॱहा मेलेगीलाक। 5 घीझ्येरी ॱनाना खे घीरी हो़ धाङ ङीमागी से लाक। होराङक्या छेमु धाङ मी़नाकगी मालाक। 6 होझ्येरी श्येम्माक्या च्योक्रे, होराङ ॱङी लोक्ती माधेता चाङजे झ्येरी, छो़ शीम्दी धेदु। 7 घीझ्येरी ॱनाना ॱङी लोक्कीनक्या छेमु ङ्यालालाक धेनी थुरी शीगीनक्या छेमुराङ शीलालाक। 8 हीना होराङ ङीङमोला धेगीन झ्येरी चाङजे झ्ये धेनी धेपा धाङ झाम्पागी ठाब धाङ थारपागी रेवागी च्याकश्या घो़न। 9 घीझ्येरी ॱनाना को़न्क्षोकगी होराङला, खोङबागी थुक्ठो़ ङ्याङयेला दामा माजेपालाक हीना चोवो येशु मास्यीकाने थारपा थोप्येगी क्षीला दामा जेपालाक। 10 होराङ सो़न्पो धेना स्यी हो़ना खोङबा मुलाराङ धेयेला, खोङबा होरी क्षीला ढोङ जेपालाक। 11 होझ्येरी खेक्याई धान्दा थुक्पे झ्यीगीन च्योक्रे, पी़न च्यीकगी च्यीकला सेम्सो पोर धेनी धेपाला स्युक क्षेरु डोयेला रोवा झ्यी। थामागी ॱलापच्या धाङ छाम्डी 12 पी़न्दाक्याओ, खीकी खोक्दु काल्ले ग्याप्कीन धाङ चोवोगी क्षीला, खेक्याई गोठी झ्युरी खेक्याला ॱलापच्या ॱनाङगीनक्याला घुस्याप झ्यी। 13 धेनी खुङक्याई लेगागी झ्येरी, खुङक्याला झाम्पागी थोक्ने ॱमीच्यीकी घुस्याप झ्यी। खेराङक्या नाङदु क्षाम्बोमा झ्येरी धो़क। 14 पी़नक्याओ, लेमेलाम्गीनक्याला ॱलापच्या तेर, ॱङीङ च्युङाक्याला सेम्सो पोर, क्योवाक्याला रोवा झ्यी धेनी घीरीमुला शो़पा घोम ॱनेरी खेक्याला कुलाहीन। 15 सी़याः ङेन्पागी छापला ङेन्पा माझ्यी हीना च्यीकगी च्यीक धाङ घीरीमुला नाम्हीना, शाङपो झ्यीयेला थापस्यी झ्यी। 16 च्योई ङ्यामो घा झ्यी, 17 ॱमो़लाम ॱमेक्षेता ग्योप, 18 ॱनेछु घारे हो़ना थुक्चीक्षे श्यी़ घीझ्येरी ॱनाना खेक्याई क्षीला येशु मास्यीकागी थोक्ने, को़न्क्षोकगी थुकोङ देराङ लाक। 19 धाम्पे थुक्ङीला ॱमासे, 20 ॱङो़नस्येक्याला ॱनाङमे माझ्यी, 21 हीना घीरीला छो़ता झ्यी धेनी शाङागोला तेन्पोमा शीम्दी धो़क। 22 ङेन्पा घीरीने जेम्दी धो़क। 23 धा श्यीदे को़न्क्षोकगीराङ खेक्या नाङ हो़गीन घीरी, धाम्पा जेदास्योक धेनी होरी चोवो येशु मास्यीका फेवी घाङला, खेक्याई सेम्ङी धाङ सेम धाङ ली़ घीरी क्यो़न मेगीन ॱरुङवास्योक। 24 खेक्याला भो़ ॱनाङगीन खोङबा नी, ॱलो का थुप्कीन दुक धेनी खोङबागी दे ॱङोन्नेराङ जेगीलाक। 25 पी़नक्याओ, हीकी क्षीला ॱमो़लाम श्यी़। 26 पी़न्दा घीरीला झाम्पागी थोक्ने, धाम्पे ओगी छाम्डी श्यी़। 27 दे यीक दे पी़न्दा घीरीगी दोङदु ढोक्रोझ्यी ॱनेरी, चोवोगी छेनने ङा कुलाहीन। 28 होरी चोवो येशु मास्यीकागी थुक्जे, खेक्यामुला हुङवास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.