१ थेसालोनीकेपा 4 - ॱलोवाको़न्क्षोकला थुक्ङेवे मीछे 1 पी़न्दाक्याओ, को़न्क्षोकला थुक्ङेउ मीछे पी़येला, हीकी खेक्याला ॱलापच्या ग्याप्पी धेनी खेक्या होदे च्योक्रे मीछे क्याली। धा देला ल्हाक झ्यीरोझ्यी ॱनेरी, चोवो येशुगी स्योकने हेक्या खेक्याला श्योवा पुलीहो़क। 2 घीझ्येरी ॱनाना चोवो येशुगी वाङने, हीकी खेक्याला तेरता ॱलापच्याक्या खेक्याई स्येलालाक। 3 खेक्या लोक्येमने जेम्ये धाङ धाम्पाला ग्युरकीनगो, को़न्क्षोकगी थुकोङ लाक। 4-5 राङगी ली़ला धाम्पा धाङ घुस्याप झ्यीयेला, खेक्या घीरी छो़ शीम हीना को़न्क्षोकला ॱमेस्येगीन, याहुदापा मेन्गीन मीरीकक्या च्योक्रे दो़क्षाक क्षे माझ्युङ। 6 दो़न देला मी सी़याः राङगी पी़नला दुक्पु तारी गोकोर ॱमेछोक्कीलाक घीझ्येरी ॱनाना हीकी खेक्याला एन्दुरु ॱनागीन च्योक्रे, चोवोगी देरे लेगा झ्यीगीनक्याला डास्या लेन जेगीलाक। 7 को़न्क्षोकगी होराङला ॱमेचाङा ग्युरतु माभो़वा, धाम्पा ग्युरतु भो़ जेपालाक। 8 होझ्येरी दे लाबला ॱमीचीगीनक्या मीगी ॱलापच्याला मेन्दा, धाम्पे थुक्ङी ॱनाङगीन को़न्क्षोकला ङोलोक झ्यीदालाक। 9 धा पी़न्दा च्यीकगी च्यीकला झाम्पा झ्यीयेगी कोरला, सी़याः खेक्याला ढीक घोगुमालाक घीझ्येरी ॱनाना च्यीकगी च्यीकला झाम्पा झ्यीयेला को़न्क्षोकगी ॱलाप ॱनावालाक। 10 धेनी खेक्याई माकेडोनीयारु हो़गीन पी़न्दा घीरीला, देरेराङ झाम्पा झ्यीदालाक। धेनी धोराङा देला ल्हाक झ्यीरोझ्यी ॱनेरी, हेक्याई श्योवा हो़क। 11 हेक्याई खेक्याला ॱलापच्या तेरकीन च्योक्रे, खेक्या श्येम्मागी दो़न्दाकला थेरु माग्युक्वा, राङगी मीछेगो जाबोमा क्यो धेनी राङगी लाक्पागीराङ काल्ले झ्यी। 12 देरे झ्यीना धेपा मीझ्यीगीनक्याई, खेरी मीछे केताङला घुस्याप झ्यीगीलाक धेनी खेक्या मी श्येम्माला रे मेघो़गीलाक। 13 हीना पी़न्दाक्याओ, रेवा मेगीन मी श्येम्माक्या च्योक्रे दुङा माझ्यीवास्योक ॱनेरी मास्यीकावा रे ढोङना, होदेगी कोरला खेक्याला धेन्पा झ्येरी स्येयेला हेक्याई दो़पा हो़क। 14 घीझ्येरी ॱनाना येशु ढोरी कुसो़न्पो श्याङवालाक ॱनेरी, होराङ यीच्चे झ्यीदालाक धेनी धेपा झ्यीगीन ढोङगीनक्याला को़न्क्षोकगी येशुमुला ठीया जेगीलाक ॱनेरी, होराङ धेपा झ्यीदालाक। 15 हेक्या खेक्याला चोवोगी काने देरे ॱनाहीन, चोवो फेवी घाङला सो़न्पो हो़गीनक्या ढोङसागीनक्या ले एन्ला को़न्क्षोकगी डुङदु मेडोगीलाक। 16 घीझ्येरी ॱनाना चोवो खोङबाराङ नाम्खे श्यीङखामने, सुङकेक क्षे धाङ को़न्क्षोकगी भाङछेनक्याई भो़टाक धाङ को़न्क्षोकगी दुङक्षेगी केकमुला फेप्कीलाक। धेनी चोवो येशुला धेपा झ्येरी, ढोङगीनक्या एन्ला सो़न्पो ग्युरकीलाक। 17 धेनी होराङ सो़न्पो हो़गीन धाङ लेगीनक्या चोवोला ॱनामला ज्यायेला खुङक्यामुला ॱरीङ नाङदु ठीया जेगीलाक धेनी होराङक्या चोवोमुला च्योई ॱनेगीलाक। 18 होझ्येरी च्यीकगी च्यीकला ताम दे स्येदी सेम्सो पोर। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.