१ थेसालोनीकेपा 2 - ॱलोवाथेसालोनीकेरु पाउलुगी क्षाक्ले 1 पी़न्दाक्याओ, खेक्यामुला हीकी थुक्ठे क्षोमेगीन माझ्युजुङ ॱनेरी, खेक्याला क्षा हो़तालाक। 2 हेक्याई फीलीप्पीरु दुक्पु धाङ ॱमेटा ङ्याङगीनगो, खेक्याला स्येये हो़तालाक हीना ङोलोक स्युक्क्षेगी खोक्ने, को़न्क्षोकगी ताम्शाङ खेक्याला ख्याप्टाक झ्यीयेला, को़न्क्षोकने हेक्याला ॱङीङतोप जोरजुङ। 3 हीकी स्येगीन ताम्शाङ दे नोन्डु याङमेना, साम्लो ॱमेचाङा धाङ मीला गो कोरयेला मालाक। 4 हीना ताम्शाङ दे हीकी खाला ॱलो कायेला, को़न्क्षोकगी हेक्याला थाक्चो़ जेदी, हेक्या मीगी घाटोगी क्षीला मेन्दा, होरी ॱङीङगी छो़ शीक्कीन को़न्क्षोकला थुक्ङेउ हुङयेला स्येदाहीन। 5 हेक्याई खेक्याला नामा गो कोरकीन लाबक्या ॱमाता, धेनी घीन्गी थोक्ने दो़ङाम माझ्ये ॱनेरी, खेक्या स्येलालाक। को़न्क्षोकराङ पाङपो हीन। 6 मास्यीकागी कुछाप झ्युरी, हेक्याई खेक्याला आङजा झ्यी थुक्येहो़क हीना मी सुनेः हीकी तो़टा ॱमाचा। खेक्याने मेन धेनी श्येम्माक्याने मेन। 7 हीना आमागी राङगी टु क्योङगीन च्योक्रे, खेक्याई खोकला हेक्या जाबो झ्येरी धेपी। 8 हेक्याई खेक्याला ॱमीच्यीकी चेवा झ्येरी, खेक्याला को़न्क्षोकगी ताम्शाङ च्यीगा मेन्दा राङगी ॱरोकगोवा झ्यीम्बा ताङयेला डाढीक झ्युवी घीझ्येरी ॱनाना खेक्या हीकी चेवे पी़न झ्युवालाक। 9 पी़न्दाक्याओ, खेक्याला को़न्क्षोकगी ताम्शाङ स्येदी घाङला, सुलाः घाक्वा माझ्युवास्योक ॱनेरी, हीकी ङीन-छेन लेगा झ्येवी धेनी हीकी काल्ले धाङ दुक्पु खेक्याला स्येये हो़तालाक। 10 खे धेपा झ्यीगीनक्याई खोक्दु हीकी चो़पा धाम्पा धाङ ढाङपो धाङ क्यो़न मेगीनगी पाङपोगो, खेक्याराङ धाङ को़न्क्षोक हीन। 11-12 खेक्याला स्येये हो़तालाक, आकी च्यीकगी राङगी टुवाक्याला च्याक ग्याप्कीन च्योक्रे, हीकी खेक्याला को़न्क्षोकला थुक्ङेउ हुङयेगी मीछे क्यायेला ॱलापच्या तेरती, सेमस्युक पारती खेक्याला च्याक ग्याप्पी। खोङबा को़न्क्षोकगीराङ खेक्याला राङगी ग्यासी धाङ शीजेला भो़ ॱनाङालाक। 13 हेक्याने घोरकीन को़न्क्षोकगी का दे, खेक्याई होदेला मीगी का च्योक्रे मेन्दा, को़न्क्षोक राङगी का ॱनेरी खेलेन्बालाक धेनी खे धेपा झ्यीगीनक्याई खोक्दु को़न्क्षोकगी क्षाले डुप्कीनगोला, हेक्या ॱमेक्षेता को़न्क्षोकला थुक्जेक्षे पुलीहो़क। 14 पी़न्दाक्याओ, युदेयारु हो़गीन येशु मास्यीकाला धेपा झ्यीगीन, को़न्क्षोकगी क्षो़छोकगी लेमो झ्यीगीन, खेक्या झ्युजुङ घीझ्येरी ॱनाना खुङक्याला याहुदापाक्याई दुक्पु ताङगीन च्योक्रे, खेक्यालाः खेरी राङगी मीक्याई दुक्पु तावालाक। 15 होदे याहुदापाक्याई चोवो येशु धाङ ॱङो़नस्येखेनक्याला सेपालाक धेनी होराङक्याला तो़न्दी झावालाक धेनी को़न्क्षोकला थेदा मीझ्यीदा, मी घीरीला ङोलोक झ्यीदालाक। 16 धेनी मीरीक श्येम्माक्याला थारपे लामगी कोरला स्येयेला, देक्याई होराङला काक्ये थापस्यी झ्येरी, राङगी धीक्पे छेगो साक्यी। हीना थाला को़न्क्षोकगी थुक्ठो़ खुङक्या खाला भाप्पालाक। 17 हीना पी़न्दाक्याओ, हेक्या युन तुङागी क्षीला ली़गी थोक्ने खेक्याने ढाना, सेम्ङीने माढा हो़क। खेक्या ॱमीच्यीकी ढेन्दी खेक्याला ॱङो़न्सुम थोङयेला हीकी दो़पा क्षे हो़क। 18 हेक्या खेक्याचारु हुङयेला दो़पा झ्येवी धेनी ङा पाउलुगीया धाब्ले कुल्ले दो़पा झ्येवी हीना धी़कगी हेक्याला काक्जुङ। 19 चोवो येशु फेई घाङला, खोङबागी डुङदु, हीकी रेवा धाङ घाटो धाङ उगेनगी ङोम्जोगो खेक्याराङ मालाक से? 20 ॱङोन्ने खेक्याराङ हीकी शीजे धाङ घाटो हीन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.