१ पेटो 5 - ॱलोवागोठीक्या धाङ श्यो़न्पाक्या 1 ङाराङ क्षो़छोकगी गोठी च्यीक हीन्गीन झ्येरी, धेनी मास्यीकागी दुक्पु ङ्याङगीनगी पाङपो धाङ स्याम्ला ॱङो़न्ये हीन्गीन शीजेला मुला थेये हीन्गीन च्यीक झ्येरी, ङा खेक्या नाङने गोठीक्याला श्योवा पुलाहीन, 2 खेक्यागी लेगेनला ॱनाङना को़न्क्षोकगी लुकख्युला छोक्योङ झ्यी, मीगी उजुक झ्येरी मेन्दा हीना को़न्क्षोकगी थुकोङला तेन्ती राङगी थेती झ्यी। धेनी ग्युनोरला ङोम्दी मेन्दा हीना श्याप्तोक पुयेला, दो़पा झ्येरी छोक्योङ झ्यी। 3 खेक्याई लेगेनला हो़गीनक्या खाला आङजा झ्येरी मेन्दा, हीना लुकख्युक्याई क्षीला पे झ्युरी छोक्योङ झ्यी। 4 धेनी झ्यीवु चोगो ॱङो़न्सुमदु फेवी घाङला, खेक्याला नामा येरी मेडोगीन शीजेगी चोपो़न थोप्कीलाक। 5 दुक झ्येरीराङ, श्यो़न्पाक्याओ, गेम्पाक्याई होकला धो़क। खेक्या घीरी ॱङ्यामच्युङगी थोक्ने, च्यीकगी च्यीकला श्याप्ची श्यी़ घीझ्येरी ॱनाना, “को़न्क्षोकगी ङागेल क्षेक्याला ङोलोक जेदालाक, हीना ॱङ्यामच्युङक्याला थुक्जे जेदालाक।” 6 होझ्येरी को़न्क्षोकगी थी़तोप क्षे क्षाकगी होकदु, राङ-राङला ॱङ्यामच्युङ शो़ धेनी धी़ तीक-तीकगो भावी घाङला खोङबागी खेक्याला या क्या जेगीलाक। 7 धेनी खेक्याई सेम्डा घीरी खोङबाला फी़ घीझ्येरी ॱनाना खोङबागी खेक्याई शीक क्योङ जेदालाक। 8 खेक्याराङ छो़ शीम्दी, च्याङजे झ्यी। खेक्याई डा हीन्गीन धी़क नी, ङारके तो़न्गीन सीङगे च्योक्रे, सुला ॱङेदी शागुनाङ ॱनेरी चारी ग्युक्वालाक। 9 राङगी धेपाला तेन्पो झ्युरी, धी़कगी ङोलोक झ्यी घीझ्येरी ॱनाना जीक्तेन हो़लेरु खीकी पी़नक्यागीयाः देरे दुक्पु राङ ङ्याङी हो़तालाक। 10 धेनी खेक्याई धी़ तीते च्यीक दुक्पु ङ्याङगीन स्याम्ला, मास्यीकागी नाङ थामेपे शीजेला खेक्याला भो़ ॱनाङगीन धाङ थुक्जे क्षेन्बो को़न्क्षोकगीराङ, खेक्याला ॱलार सोये धाङ तेन्पो जेये धाङ तोपस्युक ॱनाङये धाङ यीच्चेगी ॱमाङस्यी तेन्पो जेगीलाक। 11 धी़ तेन्दु वाङ खोङबागी हुङास्योक। आमेन। थामे छाम्डी 12 ङी ॱलो का थुप्कीन चीचा पी़न सीलवानुगी थोक्ने, यीक तुङा दे ढीयाहीन। को़न्क्षोकगी थुक्जे धेन्पागो देराङ हीन ॱनेरी, ङा खेक्याला सेमस्युक धाङ पाङपो तेराहीन। धेनी देलाराङ तेन्पो ॱनेती धो़क। 13 खेक्याला च्योक्रे दाम्दा बाबीलोन युगी क्षो़छोक धाङ ङी भु च्योक्रे हीन्गीन, मारकुगी खेक्याला छाम्डी श्यी़क। 14 च्यीकगी च्यीकला झाम्पे ओगी छाम्डी श्यी़। मास्यीका नाङ हो़गीन खेक्या घीरीला श्यीदे हुङास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.