१ पेटो 4 - ॱलोवाको़न्क्षोकगी क्षीदु छोवा 1 होझ्येरी मास्यीकागीयाः कुली़ला दुक्पु ङ्याङगीन च्योक्रे, खेक्याः देरेराङ साम्लो खेरती राङला स्युक्क्षे शो़। घीझ्येरी ॱनाना ली़ला दुक्पु ङ्याङगीनगी धीक्पा पाङालाक। 2 होझ्येरी ली़ नाङदु धेये हीन्गीन थुक्पे, खेक्या मीगी दो़पा मेन्दा, को़न्क्षोकगी थुकोङला मीछे क्यो। 3 घीझ्येरी ॱनाना खेक्याई एम्मा धेपा मीझ्यीगीन मीक्या च्योक्रे, लोक्येम धाङ दो़क्षाक धाङ रा शीगीन धाङ क्षोमेगीन तेमो धाङ क्षाङ-आराकगी थुक्ठो़ धाङ आम्लोवा ल्हाकुन्डाला क्षो़गीन लेगाक्याला धी़चो़ माङा क्यावालाक। 4 धा धान्दा खेक्या खुङक्यामुला क्षोमेगीन च्यो़पा ङेन्पाला ॱमेथेगीन झ्येरी, खुङक्या ॱहालेरी खेक्याला ॱमेटा ताङालाक। 5 हीना सो़न्पो धाङ स्यीम्पो ॱङीगी ठीम्चो़ ॱनाङयेला डाढीक हो़गीन, खोङबाला खुङक्याई ची पु घोगुलाक। 6 होझ्येरी मीला च्योक्रे स्यीम्पोक्याला ली़ला ठीम्चो़ झ्येहो़नाः, सेम्ङीला खुङक्या को़न्क्षोक च्योक्रे सो़न्पो ॱनेयेगी क्षीदु, खुङक्यालाः ताम्शाङगो स्येपालाक। 7 दो़न घीरीगी थागो ङे ॱलेप्दुक। होझ्येरी खेक्या ॱमो़लाम ग्याप्येगी क्षीदुराङ, छो़ शीम्गीन धाङ शाप-शाप झ्युङघो़। 8 दे घीरीने गेक्षेस्योकगो, खेक्या च्यीकगी च्यीकला सेम तीङने झाम्पा झ्यी घीझ्येरी ॱनाना झाम्पागी धीक्पा माङाला काप थुक्वालाक। 9 धेनी दुकेक माग्यावा च्यीकगी च्यीकला डो़न्बो सी़। 10 खेक्या नाङने मी रे-रेला को़न्क्षोकने ॱनाङज्यीन थोप्था झ्येरी, को़न्क्षोकगी थुक्जेगी ॱनाङज्यीन ॱनाछोक थोप्था ॱङेरपाक्या च्योक्रे, राङला थोप्था ॱनाङज्यीनगो च्यीकगी च्यीकला श्याप्ची श्यी़येला भेचो़ झ्यी। 11 दो़न घीरीगी थोक्ने, येशु मास्यीकागी थोक्ने को़न्क्षोकगी शीजे झ्युङयेगी क्षीदु, खेक्याने क्षो़ स्येगीनगी को़न्क्षोकगी का सुङगीन च्योक्रे स्येघो़ धेनी खेक्याने श्याप्ची श्युगीनगी को़न्क्षोकगी ॱनाङना तोपगी गोने श्याप्ची श्यी़घो़। धी़ तेन्दु शीजे धाङ वाङ खोङबागी लाक। आमेन। मास्यीकावा झ्युरी दुक्पु ङ्याङगीन 12 चेवेक्याओ, खेक्याला छो़ता झ्यीयेला मे च्योक्रे, दुक्पु खीकी खाला भाप्ना, खेक्याला खेन्छा च्यीक झ्युङगीन च्योक्रे ॱहाङ ॱमासाङ। 13 हीना मास्यीका शीजेला ॱङो़न्दी घाङला, खेक्या ॱमीच्यीकी ङ्यामो घा धाङ घाटो केयेगी क्षीला, धान्दा खेक्या मास्यीकागी दुक्पुमुला खुरी घाङला ङ्यामो घा झ्यी। 14 धेनी मास्यीकागी छेनगी झ्येरी खेक्याला ॱमेटा फोक्ना, खेक्या झ्यीलाप क्षे लाक घीझ्येरी ॱनाना शीजे धाङ को़न्क्षोकगी थुक्ङी खेक्या नाङ ॱने हो़तालाक। 15 हीना खेक्याने सुवाः ॱरोक चेगीन याङना कुमा कुगीन याङना ङेन्पा झ्यीगीन याङना थेप्तोक झ्यीगीनला च्योक्रे दुक्पु माङ्याङा स्योक। 16 घीहीन्ना, खेक्या मास्यीकावा झ्युरी दुक्पु ङ्याङना, खो ङो ॱमाछास्योक हीना मास्यीकागी छेन देलाराङ, खी़ को़न्क्षोकला तो़पा ताङास्योक। 17 घीझ्येरी ॱनाना को़न्क्षोकगी नाङमीनेराङ गो चुक्ती, ठीम चेयेगी धी़ भाप्दुक धेनी दे होराङक्याने गो चुक्ना, को़न्क्षोकगी ताम्शाङ ॱमीचीगीनक्याई ढेबुगो घी झ्युङी हो़टु? 18 धेनी सुङरापला देरे सुङ हो़तालाक, “ढाङतेनक्याई थारपाला घाक्वा हो़ना, मेढाङा धाङ धीक्चेनक्याला घी झ्युङी हो़टी़?” 19 होझ्येरी, को़न्क्षोकगी थुकोङगी थोक्ने दुक्पु ङ्याङगीनक्या, ले शाङा झ्यीदी घाङला राङगी ॱरोक ॱलोते छोक्पा को़न्क्षोकला च्योघो़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.