१ पेटो 2 - ॱलोवायेशु नी धो सो़न्पो हीन्गीनगी कोर 1 होझ्येरी ङेन्सेम धाङ गोकोर धाङ शोक धाङ ठादोक धाङ ॱमेटा ताङये घीरी, खेक्याई पोङ। 2 धेनी खेक्या थारपागी थोक्ने छारलुङ झ्युङयेला, टु ॱमाङ्याकक्या च्योक्रे, सेम्ङीगी होमा थुङयेला दो़पा झ्यी। 3 खेक्याई चोवोगी थुक्जेगी, ढोवा लेन्ला झ्येरी देरे झ्यीघो़। 4 धेनी मीगी पाङपा हीना को़न्क्षोकगी ॱमीक्वादु खोङबा दाम्दा धाङ चाक्षे हीन्गीन, धो सो़न्पो हीन्गीन चोवोगी डुङदु खेक्या हुङी घाङला, 5 को़न्क्षोकगी खेक्यालाः धो सो़न्पोक्या च्योक्रे, थुक्ङीगी फोडाङ चीक्येला भेचो़ जेदु च्युक। धेनी खेक्या धाम्पे क्षो़पो़न झ्युरी, मास्यीका येशुगी थोक्ने को़न्क्षोकला थुक्ङेउ झ्युङगीन सेम्ङीगी क्षो़पा खेक्याई पु। 6 घीझ्येरी ॱनाना धाम्पे सुङरापला देरे सुङ हो़तालाक, “तो़दाङ, ङा सीयोनगी नाङला धो च्यीक श्याहीन, दाम्दा धाङ चाक्षे हीन्गीन शुरधो च्यीक, खोङला धेपा झ्यीगीन सुवाः ङोछारु ॱमीच्युक।” 7 होझ्येरी खे धेपा झ्यीगीनक्याई क्षीदु खोङ चाक्षे लाक हीना धेपा मीझ्यीगीनक्याई क्षीदु, “चीक्पो़नक्याई पाङपा धोगो, शुरधो झ्युदुक।” 8 धेनी, “थोक्ती गेगीन धोरुक धाङ घेरु च्युक्कीन फोङगीङला ग्युर।” खुङक्या गेलालाक घीझ्येरी ॱनाना खुङक्या काला मेङेन्दालाक। धेनी खुङक्याई क्षीला देरेराङ झ्युङयेला, एम्मानेराङ थाक्चो़ जे हो़तालाक। 9 हीना खेक्या नी दाम्दा ग्युपा धाङ ग्यावु रीकगी क्षो़पो़न धाङ मीरीक धाम्पा धाङ को़न्क्षोकगी राङगी मीक्या लाक। धेनी खोङबागी ॱहाङसागीनगी क्षाक्लेक्या सेटाक झ्यीयेला, मी़नाकने खोङगी ॱहाङसागीनगी हो़क नाङला खेक्या भो़वालाक। 10 धी़ च्यीकला खेक्या को़न्क्षोकगी मी मालाक हीना धान्दा खेक्या को़न्क्षोकगी मी लाक। धेनी धी़ च्यीकला खेक्याला ॱङीङजे ॱमाथोप हो़तालाक हीना धान्दा, खेक्याला ॱङीङजे थोप हो़तालाक। को़न्क्षोकगी श्याप्तोक्पा 11 चेवे रोवाक्याओ, ङा खेक्याला श्योवा पुलाहीन, खेक्या ॱनेचाङ ॱयारती धेगीन धाङ ङो ॱमेस्येगीन मीक्या झ्येरी, राङगी सेम्ङीगी डाला हो़गीन ली़गी दो़क्षाकक्या पोङ। 12 धेनी धेपा मीझ्यीगीनक्याई खोक्दु चो़पा शाङपो झ्यी। घीझ्येरी ॱनाना खुङक्याई खेक्याला ङेन्पा झ्यीगीन ॱनेरी क्यो़न च्युई घाङला, खुङक्याई खीकी ले शाङाक्या थोङास्योक धेनी को़न्क्षोक फेप्ये ङीमाला, खुङक्याई खोङबाला तो़पा पुलास्योक। 13 चोवोगी क्षीदु खेक्या मी घीरीगी वाङ झ्यीगीन आङजा थोस्योकगी ग्यावुक्या, 14 याङना चीख्यापक्याई होकला धो़क। खुङक्या नी, ङेन्पा झ्यीगीनक्याला क्षेपा काये धाङ शाङा झ्यीगीनक्याला तो़पा ताङयेगी क्षीदु चोवोगी ॱङाक्पालाक। 15 घीझ्येरी ॱनाना को़न्क्षोकगी थुकोङ नी, खेक्याई शाङा झ्येरीराङ मी ॱलेन्पाक्याई तीमुकला खा काक्ये लाक। 16 खेक्या राङवाङगी मी च्योक्रे मीछे क्यो हीना राङगी राङवाङगो ङेन्पे लेगा काप्येला भेचो़ माझ्यी। खेक्या को़न्क्षोकगी श्याप्चीपा च्योक्रे मीछे क्यो। 17 घीरीला घुस्याप झ्यी। धेनी मास्यीकावा पी़नक्याला चेवा झ्यी। धेनी को़न्क्षोकला जीक्नाङ झ्यी। धेनी ग्यावुक्याला कुरती झ्यी। दुक्पुगी पे 18 योक्पोक्याओ, कुरती क्षेन्बो गोने राङगी दाक्पोक्याई होकला धो़क। खेक्याला घा धाङ ज्याबो झ्यीगीन दाक्पोला च्यीगा मेन्दा, हीना खेक्याला चुवा झ्यीगीन दाक्पोक्याई होकलाः धो़क। 19 घीझ्येरी ॱनाना मी श्येम्मागी मेढाङा झ्येरी, खेक्याला दुक्पु ताङनाः खेक्याई को़न्क्षोकला साम्दी शो़पा झ्यीना, दे खोङबाला थुक्ङेउ झ्युङालाक। 20 घीझ्येरी ॱनाना खेक्याई ले ङेन्पा झ्येरी, दुङदाक शाराङ शो़पा झ्यीना, देला घी फेन्दा हो़तालाक से? हीना ले शाङा झ्येरीयाः दुक्पु राक्वाराङ शो़पा झ्यीना, दे को़न्क्षोकला थुक्ङेउ झ्युङालाक। 21 खेक्या दो़न दी क्षीलाराङ भो़वालाक घीझ्येरी ॱनाना मास्यीकागी स्याम्ला डाङयेगी क्षीला, मास्यीका खीकी दो़न्दु दुक्पु ङ्यारी, खोङगी खेक्याई क्षीला पे च्यीक श्या जेपालाक। 22 “खोङबागी धीक्पा च्यीया माझ्ये, धेनी खोङबागी ॱली़टेगी छीक ॱमासुङ।” 23 खुङक्याई मास्यीकाला ॱमेबेप ताङी घाङला, खोङबागी लेन ॱलोक्वा माजेपालाक। धेनी दुक्पु ङ्याङी घाङला, खोङबागी जीक्टा ॱमाकुवालाक। हीना ढाङतेनगी ठीम थाक जेगीनला ॱलो का जेपालाक। 24 होराङ धीक्पाला छोवा क्यायेगो भोरती, ढाङतेनगी दो़नला छोवा क्याये क्षीदु, खोङबागी राङगी कुली़ला होरी धीक्पाक्या ग्याङस्यीङ खाला खुरा जेपालाक। खोङगी ॱमाक्याई थोक्ने खेक्याला ढाक्सो़ थोप्पालाक। 25 घीझ्येरी ॱनाना “खेक्या लुकक्या च्योक्रे गो थोम्दी धे हो़तालाक।” हीना धान्दा खेक्याई झ्यीवु धाङ सेम ॱरुङगीनगो चारु, खेक्याला ॱलोक्ती हो हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.