१ पेटो 1 - ॱलोवा1 येशु मास्यीकागी कुछाप, ङा पेटो, खे पोन्तु धाङ गालातीया धाङ कापादोकीया धाङ एशीया धाङ बीथानीयादु थोरती धेताक्याला, दे यीक दे ढीयाहीन। 2 याप को़न्क्षोकगी एम्मानेराङ खेक्याला खेन्दा जेदी दामा जेपालाक धेनी खोङबागी थुक्ङीगी थोक्ने, खेक्याला धाम्पा जेपालाक। होझ्येरी खेक्याई येशु मास्यीकाला चीरी, खोङबागी कुठाकगी थोक्ने खेक्या चाङमा झ्युङ हो़तालाक। को़न्क्षोकगी खेक्याला, थुक्जे धाङ श्यीदे मेछो़ली ॱनाङास्योक। थामेपे छेसोकगी रेवा 3 को़न्क्षोक, होरी चोवो येशु मास्यीकागी यापला तो़पा पुलो। खोङबागी ॱङीङजे क्षेम्बोगी, येशु मास्यीका छीवाने सो़न्पो जेदी, दी थोक्ने होराङक्याला रेवा सो़न्पो थोप्येगी क्षीदु, होराङक्याला छे साबा ॱनाङ हो़तालाक। 4 धेनी नाम्खे श्यीङखामदु खेक्याई क्षीदु नामा मेजोक्कीन धाङ ढीमा मेगीन धाङ येरी मेडोगीन, ग्युज्यीन श्याक जे हो़तालाक। 5 धेनी खीकी धेपागी गोने को़न्क्षोकगी नी़थुगी, खेक्याला थामे धी़ला ॱङो़न्ये हीन्गीन थारपागी क्षीदु ॱरुरी श्याक हो़तालाक। 6 दे घीरीगी झ्येरी खेक्या ङ्यामो घा लाक हीना धी़ तीतेगी क्षीदु धान्दा, खेक्या दुङा ॱनाछोकक्या ङ्याङ घोये हो़तालाक। 7 देक्या नी, खीकी धेपा ॱङोन्ने हीन्गीनगी पाङपो तो़न्ये धाङ येशु मास्यीका ॱङो़न्दी घाङला, खेक्याला तो़पा धाङ शीजे धाङ कुरती थोप्ये क्षीदु हुङालाक। पेला ताना मेताला डोगीन सेरक्या, मेला ॱराक्ती चाङा शोवालाक हीना खेक्याई धेपा सेर ले चाक्षे लाक। 8 खेक्याई खोङबाला ज्या माङ्युङ हो़ना, खोङला चेवा झ्यीदालाक। धेनी धान्दा खेक्याई खोङबाला मेज्यानाः, खेक्या खोङबाला धेपा झ्यीदालाक धेनी खेक्या स्ये ॱमीथुक्कीन धाङ शीजेगी खाङखा घाटो क्षे झ्यीदालाक। 9 घीझ्येरी ॱनाना खेक्याई धेपागी ढेबु नी, खीकी सोकगी थारपा थोप्ये लाक। 10 खेक्याई क्षीला झ्युङये हीन्गीन थुक्जेगी कोरला ॱङो़नस्ये जेगीन ॱङो़नस्येखेनक्याई, दे थारपागी कोरला ॱमीच्यीकी श्यीप्ता झ्येरी चाजो़ झ्येवालाक। 11 खुङक्याई सेम नाङदु श्युक्कीन मास्यीकागी थुक्ङीगी, मास्यीकागी दुक्पुक्या धाङ दी स्याम्ला झ्युङगीन शीजेगी कोरला ॱङो़नस्ये जेदी घाङला, होदेगी धी़ धाङ ॱनेछुक्याई कोरला खुङक्याई चाजो़ झ्येवालाक। 12 धेनी राङला मेन्दा खेक्याई श्याप्ची श्युगीनगो, ॱङो़नस्येखेनक्याला ॱङो़न्पालाक। धेनी धान्दा नाम्खे श्यीङखामने ॱङाक्ङा धाम्पे थुक्ङीगी वाङगी गोने क्षो़ सुङगीनक्याई, खेक्याला ताम्शाङ दे स्ये हो़तालाक। धेनी नाम्खे भाङछेनक्यागीयाः दो़न देक्या स्येङी दो़दालाक। धाम्पा झ्युङयेगी कोर 13 होझ्येरी खेक्या राङगी सेम डाढीक झ्यी धेनी चाङजे झ्येरी धो़क। धेनी येशु मास्यीका ॱङो़न्दी घाङला, खेक्याला ॱनाङये हीन्गीन थुक्जे गोला रेवा छाङगो झ्येरी धो़क। 14 खेक्या टुवा खाला ङेन्पोक्या च्योक्रे, एम्मा खीकी ॱमास्येवाला झ्येजा दो़छाकक्याला याङ खेक्या माडे। 15 हीना खेक्याला भो़ ॱनाङगीनगो धाम्पा हीन्गीन च्योक्रे, खेक्या राङगी चो़लाम घीरीला धाम्पा झ्युङ, 16 घीझ्येरी ॱनाना देरे ढीक हो़तालाक, “खेक्या धाम्पा झ्युङ घीझ्येरी ॱनाना ङा धाम्पा हो़क।” 17 क्षोक्री मेजेदा मीक्याई राङगी लेगा घी झ्यीगीनला शीक्ती, ठीम्चो़ जेगीनगोला खेक्याई याप ॱनेरी श्यी़नाः, खेक्याई ॱनेचाङ ॱयारती धेयेगी धी़ दे, खोङबाला कुरती झ्येरी मीछे क्याघो़। 18 घीझ्येरी ॱनाना को़न्क्षोकगी खीकी धाङबी फामाने झ्युजा दो़न मेगीन चो़लामक्याने, खेक्याला मेताला डुगीन सेर याङना ॱङुगी रीङ ज्यारी ॱली़वा मेन्दा, 19 हीना क्यो़न धाङ ढीमा मेगीन लुक्टु च्योक्रे, हीन्गीन मास्यीकागी कुठाक रीन्छेनगी ॱली़वालाक ॱनेरी, खेक्याई स्येलालाक। 20 जीक्तेन ॱमाको़ एन्लाराङ मास्यीकाला दामा जेपालाक हीना खेक्याई क्षीदु थामे धी़ला खोङबा ॱङो़न्दा जेपालाक। 21 धेनी खेक्या खोङबागी गोनेराङ, को़न्क्षोकला धेपा केवालाक। को़न्क्षोकगी खोङला छीवाने सो़न्पो जेदी, खोङला शीजे जेपालाक। होझ्येरी खेक्या को़न्क्षोकला धेपा झ्येरी रेवा झ्यीदालाक। 22 को़न्क्षोकगी धेन्पे काला चीगीनगी गोने, खेक्याई राङगी सेम चाङमा शो़ हो़तालाक। होझ्येरी पी़नक्याला ॱनाम्पा दाक्पो चेवा झ्यी धेनी च्यीकगी च्यीकला सेम तीङनेराङ चेवा झ्यी। 23 घीझ्येरी ॱनाना खेक्या मेताला डुगीन साङाने मेन्दा, ग्युने ग्युन्दु ॱनेगीन साङा हीन्गीन, को़न्क्षोकगी सो़न्पो धाङ ताक्दु ॱनेगीन कागी थोक्ने धाब्ले केवालाक। 24 घीझ्येरी ॱनाना, “स्याठाक घीरी चा धाङ डा, शीजे घीरी चागी मेन्तोक डा। चा नी काम्ने मेन्तोक ये। 25 हीना चोवे का नी ग्युन्दु ॱने।” दे का देराङ खेक्याला स्येस्या ताम्शाङगो लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.