१ योहान्ना 1 - ॱलोवाछेसोकगी का 1 थोक्माने हो़गीन धाङ हीकी घोर ङ्युङगीन धाङ हीकी ॱमीकगी थोङ ङ्युङगीन धाङ हीकी तेदेयागो धाङ हीकी लाक्पी जु ङ्युङगीन, छेसोकगी कागी कोरला हेक्या सेटाक झ्यीदाहीन। 2 धेनी दे छेसोकगो ॱङो़न्पालाक। हीकी होदे ज्यावी धेनी होदेगी पाङपो झ्यीदाहीन। धेनी यापगी मुला हो़गीन धाङ स्याम्ला हीकी चारु ॱङो़न्गीन, थामेपे छेसोकगी कोरला हे खेक्याला सेटाक झ्यीदाहीन। 3 खेक्याः हीकीमुला थी़न्डीलला हुङास्योक ॱनेरी, हेक्याई थोथा धाङ घोरकागो हेक्या खेक्याला सेटाक झ्यीदाहीन। धेनी हीकी थी़न्डीलगो याप धाङ से, येशु मास्यीकामुला लाक। 4 हीकी घाटोगो खाङयेगी क्षीदु हेक्या दे ढीयाहीन। को़न्क्षोक नी हो़क हीन 5 को़न्क्षोक नी हो़क हीन धेनी खोङगी नाङ मी़नाक च्यीया मेतालाक, सुरी सुङगीन कालोप दे हीकी येशुने घोरपी धेनी खेक्यालाः सेटाक झ्यीदाहीन। 6 धा होरी थी़न्डीलगो को़न्क्षोकमुला हो़क ॱने, हीना मी़नाकला ग्युक्ना, होराङक्या शोक स्येदालाक धेनी धेन्पागो ॱमीचीलालाक। 7 हीना खोङबा हो़क नाङला हो़गीन च्योक्रे होराङक्या हो़क नाङला ग्युक्ना, होराङक्या च्यीकगी च्यीक नाङदु थी़न्डील झ्युङालाक धेनी खोङबागी से येशुगी कुठाकगी होराङक्याला, धीक्पा घीरीने चाङमा जेदालाक। 8 होरी धीक्पा माझ्येहो़क ॱनेरी ॱनाना, होराङक्या राङला गोकोर ताङालाक धेनी होरी नाङ धेन्पा मेयोङालाक। 9 याङ होराङगी होरी धीक्पा झ्येहो़क ॱनेरी, खेलेन झ्यीना खोङबागी होरी धीक्पाक्या सेल्गीलाक धेनी मेढाङा घीरीने, होराङला चाङमा जेगीलाक। घीझ्येरी ॱनाना खोङबा ॱलोते छोक्पा धाङ ढाङपो हो़तालाक। 10 याङ होराङक्या हीकी धीक्पा माझ्येहो़क ॱनेरी ॱनाना, होराङक्याई खोङबाला शोक्पो शोवालाक धेनी खोङगी का होरी नाङदु मेयोङालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.