१ कोरीन्थुपा 1 - ॱलोवा1 को़न्क्षोकगी थुकोङ थोक्ने, मास्यीका येशुगी कुछाप झ्युङयेला भो़पा, ङा पाउलु धाङ होरी पी़न सोस्थेनेसने, 2 कोरीन्थुरु हो़गीन, को़न्क्षोकगी क्षो़छोक धाङ मास्यीका येशुगी थोक्ने, को़न्क्षोकगी धाम्पा जेजा धाङ धाम्पे मी झ्युङयेला भो़पाक्यामुला साजा हो़लेने, खुङक्या धाङ होरी चोवो हीन्गीन होरी चोवो येशु मास्यीकागी छेन भो़गीन घीरीला, 3 होरी याप को़न्क्षोक धाङ चोवो येशु मास्यीकागी थुक्जे धाङ श्यीदे खेक्याला थोप्पास्योक। काटीन्क्षे श्यी़वा 4 मास्यीका येशुगी गोने, खेक्याला को़न्क्षोकगी ॱनाङना थुक्जेगी झ्येरी, ङा को़न्क्षोकला च्योई खीकी क्षीला काटीन्क्षे श्यी़हो़क। 5 घीझ्येरी ॱनाना ताम ॱना घीरी धाङ स्येयो़न ॱना घीरीगी थोक्ने, खेक्या खोङगी नाङ क्षोक घीरीने क्षुक्पु जेदुक। 6 धेनी दे राङगी खेक्याला मास्यीकागी कोरला, हीकी स्येगीनगो धेन्पा लाक ॱनेरी, थाक चेदालाक। 7 होझ्येरी होरी चोवो येशु मास्यीका ॱङो़न्सुमदु ज्यायेला, खेक्या घुक्ती धेताराङ खीकी नाङ सेम्ङीगी ॱनाङज्यीन घीया ॱमेछाङगीन मेयोङगीलाक। 8 धेनी होरी चोवो येशु मास्यीका धाब्ले फेप्ये हीन्गीन ङीमागोला, खेक्या क्यो़न मेगीन झ्युङयेगी क्षीला, खोङबागी खेक्याला था थुक्पे तेन्पो जेगीलाक। 9 को़न्क्षोक नी ॱलोते छोक्पा हो़तालाक। धेनी खोङगीराङ खेक्याला राङगी से, होरी चोवो येशु मास्यीकामुला ङ्याम्ढेल जेयेगी क्षीला भो़ जेपालाक। क्षो़छोक नाङ ॱयेवा 10 धा पी़नक्याओ, खेक्या घीरी खेरी नाङदु थी़न्दी धेनी खेरी नाङदु ॱयेवा भेरी मेन्दा, हीना सेम्बा च्यीक्पा धाङ साम्लो च्यीक्पा झ्येरी धो़क ॱनेरी, ङा होरी चोवो येशु मास्यीकागी छेनने खेक्याला श्योवा पुलाहीन। 11 घीझ्येरी ॱनाना ङी पी़नक्याओ, खेक्या ठुक्ती धेदुक ॱनेरी, ङाला क्लोईगी नाङमीक्याई स्येजुङ। 12 ङी ॱनागीनगो घी लाक ॱनाना, खेक्याने रीङगागी “ङा पाउलुगी हीन” धेनी रीङगागी “ङा आपोल्लोसगी हीन” धेनी रीङगागी “ङा केफासगी हीन” धेनी रीङगागी “ङा मास्यीकागी हीन” ॱनेरी ॱनी। 13 मास्यीका घो़ हो़तालाक से? पाउलु खीकी क्षीला, ग्याङस्यीङ खाला क्याङबालाक से? धेनी पाउलुगी मीङने, खेक्याई ठी़सो़ लेन्बालाक से? 14 ङा को़न्क्षोकला काटीन्क्षे श्युवाहीन घीझ्येरी ॱनाना ङी खेक्याने कीरीस्पु धाङ गायु माना सुलाः ठी़सो़ ॱमातेर। 15 होझ्येरी खेक्या सी़या, ङी मीङने ठी़सो़ लेन्बी ॱनेरी ॱना ॱमेछोक्कीलाक। 16 (लाक, ङी सेतेफानागी नाङमीला ठी़सो़ तेरपी, खुङक्या माना ङी श्येम्मा सुलाः ठी़सो़ तेरकीनगो ङाला ढेन्बा मीदुक।) 17 घीझ्येरी ॱनाना मास्यीकागी ङाला ठी़सो़ तेरतु मेन्दा, ताम्शाङ स्येयेगी क्षीदु ॱङाक जेपालाक। धेनी दे नी, जीक्तेन्पा स्येरापगी तामक्याने मालाक। देरे हीन्ना मास्यीकागी ग्याङस्यीङला कु ढोङगीनगो दो़न्मेदु डोये हो़क। मास्यीकाराङ को़न्क्षोकगी स्येराप धाङ नी़थु 18 घीझ्येरी ॱनाना मेताला डोये हीन्गीनक्याई क्षीदु ग्याङस्यीङगी ताम नी, क्षोमेगीन लाक हीना होराङ थारपा थोप्यी हो़गीनक्याई क्षीदु होदे को़न्क्षोकगी नी़थु लाक। 19 घीझ्येरी ॱनाना सुङरापला देरे ढीक हो़तालाक, “ङा मी खेवाक्याई स्येराप मेताला ताङयेहीन, धेनी मी रीक्पाचेनक्याई रीक्पा फाम्दु च्युक्येहीन।” 20 मी खेवागो घाना? क्षो़ठीमगी ॱलोपो़नक्या घाना? दे धी़रापगी चो़लीङ झ्यीगीनक्या घाना? को़न्क्षोकगी दे जीक्तेनगी स्येरापगोला ॱलेन्दा जेपा मालाक से? 21 को़न्क्षोकगी स्येरापगी नाङ, दे जीक्तेनगी मीक्याई राङगी स्येरापगी गोने, को़न्क्षोकला ङो ॱमेस्येगीन झ्येरी, होरी ताम्शाङ स्येगीन क्षोमेगीन लेगागी थोक्ने धेपा झ्यीगीनक्याला क्योप्येला, को़न्क्षोक थुक घेवालाक। 22 याहुदापाक्या ताक श्यी़लालाक धेनी गीरीकक्या स्येराप चालालाक। 23 हीना याहुदापाक्याई क्षीदु काक्दो धाङ याहुदापा मेन्गीनक्याई क्षीदु क्षोमेगीन लाब हीन्गीन, ग्याङस्यीङ खाला क्याङक्या मास्यीकाला, होराङ सेटाक झ्यीदालाक। 24 हीना याहुदापा हीन्ना याङना गीरीक हीन्ना, को़न्क्षोकगी भो़पाक्याई क्षीदु मास्यीकाराङ को़न्क्षोकगी नी़थु धाङ स्येरापगो लाक। 25 घीझ्येरी ॱनाना को़न्क्षोकगी ॱलेन्दा नी, मीगी स्येरापले क्षे हो़तालाक धेनी को़न्क्षोकगी तोप क्योवा नी, मीगी तोप क्षेने ल्हाक क्षे हो़तालाक। 26 पी़नक्याओ, खेक्याला भो़ली घाङला, खेक्या घारे हो़गीनगो ढो़न्सो झ्यी। जीक्तेनगी ताताङला खेक्याने माङक्षे खेवा धाङ वाङक्षे धाङ खाक्क्षे मेतालाक। 27 हीना खेवाक्याला ङोजा पाप्येगी क्षीदु, को़न्क्षोकगी जीक्तेनगी ॱलेन्दाक्याला दामा जेपालाक धेनी वाङक्षेक्याला ङोजा पाप्येगी क्षीला, जीक्तेनगी क्योवाक्याला दामा जेपालाक। 28 को़न्क्षोकगी जीक्तेनगी ॱमावा धाङ थोङछुङ चीचाक्याला दामा जेपालाक। धेनी हो़गीनगोला क्षोमेगीन जेयेगी क्षीदु, चीया ॱमीचीगीनक्याला दामा जेपालाक। 29 दे नी, को़न्क्षोकगी डुङदु सी़याः ङोम्सो मीझ्यीयेगी क्षीदु लाक। 30 मास्यीका येशुगी नाङ खेक्या हो़गीन दे, को़न्क्षोकगी झ्येरी लाक। धेनी मास्यीका नी, होरी दो़नला को़न्क्षोकने होरी स्येराप धाङ होरी ढाङतेन धाङ होरी धाम्पा धाङ होरी थारलाम झ्युवालाक। 31 होझ्येरी देरे ढीक हो़तालाक, “ङोम्सो झ्यीगीनक्याई, चोवोगी खाला ङोम्सो झ्यीघो़।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.