Zaburi 9 - KITABU KITAKATIFU

Lihaana lisandiza ku Nyasaye kigira likalaga lirungi

¹ O, Yahova, Inzi ndakwizominya nu mwoyo gwange gwosi, ndavolera avandu vindu viosi viokogenyia via ivi umali kokora.

² Ndimba nu vusangali kigira ivi, ndimba zinyimbu zie lizominya ivi, Nyasaye Wanyala Viosi.

³ Avasigu vange vagirung'ana nukwiruka lwa ololekaa; vikigitara nukugwa hasi imbiri woovo ma vakuza.

⁴ Ivi mulahi kandi musuuvirifu mu likalaga liilio, ivi umali kukalaga mu liyaanzilira inzi.

⁵ Ivi umali kogondokera avizihiiri, nu kuvadiviza ligali, umali kuvakola vivilirwi mihiga ni mihiga.

⁶ Avasigu viitu vamali kudivizwa mihiga ni mihiga, umali kudiviza amadara manene gaavo ligali kandi vamali kwivilirwa ligali.

⁷ Navuzwa Yahova aveeye mwami mihiga ni mihiga, umali kusingiliza endeve yeeye yu vwami aduuki kuhaana likalaga liveeye lirungi ku vandu.

⁸ Yamiha lirova nu vulungi; akalagira zihiiri ziosi ni likalaga lirungi.

⁹ Yahova aveeye uvuhaliru ku yavo avadambizwa, kandi imbinga enene muzing'inga ziu uvudinyu.

¹⁰ O, Yahova, yavo avakumanya, valakusuuvira kandi siulaleka yavo avaazaa ku ivi mba.

¹¹ Mwimbi zinyimbu ziu kwizominya Yahova, wamihaa mu Ziyoni! Mu volere zihiiri ziosi makuva gi vindu viosi viokogenyia viamali kokora.

¹² Uyu uvanzaa kisaalia ku aviiti yizuliza yavo avadambizwa, ahaanaa mageri kuyavo avavadambizaa.

¹³ O, Yahova! Ombere zimbavasi, lola uvusaliri vwa avasigu vange valeta ku inzi! O, Yahova, osoore kutura mu kivi chi likuza,

¹⁴ nduuki kusingira nuvuluviliri imbiri wa vandu va Jerusalemi, kandi nduuki kuvavoolera vindu viosi ivigiraa ningwizominya. Inzi ndasangara kigira ivi umali kombonyia.

¹⁵ Avandu vi zihiiri vamali kugwa mu vogo vwa veene vayava, vamali kuhambwa mu mutego gwa aveene vatega.

¹⁶ Yahova umali kwiivula umwene ku likalaga lilie lirungi, na avachamu vamali kuhambwa mu vikolwa viavo vidamanu.

¹⁷ Avachamu valatura kuzia mu kihadisi, yavo avasuuraa Nyasaye valazia vosi mu kihadisi.

¹⁸ Avadaka si valivilirwa kazozo mba, kandi lisuuvirizwa liavo sililagota mihiga ni mihiga mba.

¹⁹ O, Yahova; hamba! Utaleka mundu kali mulala akuguuti mba, leeta zihiiri ziosi imbiri woovo, na uzikalagiri!

²⁰ O, Yahova! Uvakole vatie ligali! Uvakole vamanye ndi vaveeye vuzwa avandu vakuzu.