Zaburi 85 - KITABU KITAKATIFU

Lisaala lie mirembe

¹ O, Yahova, Ivi waaveera avandu vovo zimbavasi ligali; Ivi umali kokora avandu va Isiraeli kuzizagilira komeedeka mu vugasu.

² Ivi umali kusamiiha uvwoni vwa vandu vovo, kandi umali kuvaveera uvuchamu vwavo.

³ Ivi umali kolekera kuva nu vutima navo, kandi umali kwigalira uvutima vuvwo vululu.

⁴ O, Nyasaye muhonyi vwitu ukwiranyie, kandi na olekele livihirirwa ku kunyi.

⁵ Ivi ulakusinyikira mihiga ni mihiga? Ulava nu vutima nikunyi mihiga ni mihiga?

⁶ Ulavula kukwiranila na okohe liiva lihia kandi, kunangwa avandu vovo kuduuki kusangalira ivi?

⁷ O, Yahova, ukumanyie uvuyanzi vuvwo vutaveeye ne keheri, kandi okohe ovokonyi vuvwo vwo kohonyia.

⁸ Mbulirizaa ku aga Yahova Nyasaye avoora; asuuvirizaa kuhaana mirembe ku kunyi, avandu veve vene, niiva sikulirana kuzia mu zinzira zietu ziuvusiru.

⁹ Ligali Yahova yeetegeki kohonyia yavo avamuhezaa uluyali, na uvukumi vwivwe vuduuki komenya mu kivala chietu.

¹⁰ Uvuyanzi vutaveeye nekeheri nu vusuuvirifu vilagana harara; uvulungi nimirembe vilakumbelana.

¹¹ Uvusuuvirifu vwu mundu vuladuuka igulu mwigulu kutura ku lirova, na uvulungi vwa Nyasaye vuliika hasi kutura mwigulu.

¹² Yahova alahaana uvugasu ku kunyi, kandi kivala chiitu kilava niligesa linyingi.

¹³ Uvulungi vulimila imbiri wa Yahova, nukumwetegekizira inzira yalonda ku.