Zaburi 61 - KITABU KITAKATIFU

Nyasaye aveeye imbinga yange

(Izaburi ya Daudi)

¹ O, Nyasaye, hulira lilira liange. Huliriza ku lisaala liange;

² nzanira ku ivi, mu likuza mwoyo kandi nimbeeye ihale ligali kutura yengo, umbile ha vuhaliru vwi mirembe.

³ Kigira ivi oveeye uvuhaliru vwange, ukingaa inzi kutura ku vasigu vange.

⁴ Ndeka menye mu lihema liilio litakatifu mihiga ni mihiga; leka nyoore chukwivisa mu isi wi zimbaha zizio.

⁵ O, Nyasaye, Ivi umali kuhulira liesuuha liange, kandi ivi umali kuhaana ku inzi miandu ja yavo avakutizaa.

⁶ Meeda mihiga minyingi ku livamwoyo liu mwami leka azizagiliri komenya mihiga ni mihiga.

⁷ O, Nyasaye, leka yaamihi mihiga ni mihiga imbiri woovo, umukiingi nuvuyanzi vuvwo vutali nekeheri kandi nu vusuuvirifu vuvwo.

⁸ Kunangwa ndakwimbira zinyimbu zie liizominywa kazozo, lwa mbana ku ivi ivia ndisuuha kuhaana.