Zaburi 52 - KITABU KITAKATIFU

Likalaga kandi zimbavasi zia Nyasaye

¹ Kigira ki wigingilira vudamanu vuvwo, ivi mundu wi zinguru? Vusuuvirifu vwa Nyasaye voveeye vwi mihiga ni mihiga.

² Ivi olohizaa muvwivisu kudiviza avandu vandi; lulimi lulwo loveeye kuli logembe lwugi. Ovola uvugadi vwere kazozo.

³ Ivi wayanza kokora uvudamanu kuvita kokora uvulahi, kandi uyanzaa kovora uvugadi kuvita kovora agiligali.

⁴ Ivi umugadi! Uyanzaa vuzwa kusaliriza avandu na makuva googo.

⁵ Kunangwa Nyasaye alakudiviza mihiga ni mihiga; nu kukutuliza munyumba yooyo, alakutuliza mu kivala cha vandu vaveeye mwoyo, kandi alakudiviza ligali mihiga ni mihiga.

⁶ Avandu valungi valalora inguuva yiyi; na valava nu vuti ligali, maku valakosekeriza ni vavoola,

⁷ “Heenzi mundu uyu si yenya kweleda ku Nyasaye amusoore mba, navuzwa yasuuvira mu vutugi vwivwe ovonene, kandi yenya uvuhaliru mu vutugi vwivwe.”

⁸ Navuzwa inzi mbeeye kuli Muzeituni gomeraa mu Litembeli lia Nyasaye; inzi suuviraa mu zimbavasi ziu vuyanzi vwivwe mihiga ni mihiga.

⁹ O, Nyasaye, inzi ndahaana lisandiza ku ivi kazozo kigira agumali kongolera. Ndakulandiza imbiri wa vandu vovo kigira oveeye umulahi.