Zaburi 37 - KITABU KITAKATIFU

Amadanyi ga avandu vadamanu kandi avalahi

¹ Utahenda mwoyo kigira yavo avakolaa uvudamanu mba; anoho utakendekera yavo avakolaa uvudamanu mba.

² Valuuma vwangu nukutura ho kuli vunyasi kandi valaniala kuli vulimu vuvisi.

³ Usuuviri Yahova, na okole agaveeye amalahi, na ndio ulamenya mu kivala mu likingwa lilie.

⁴ Wenyelerizi uvuyanzi vwa Yahova, naye alakuha viosi via wenya kutura kuye.

⁵ Wenye uvulariri vwa Yahova, usuuviri muye, naye alakokoonya.

⁶ Yahova alakola uvulungi vuvwo vong'ereng'ane kuli uvulavu vuturaa ku iliuva.

⁷ Wikuziri kandi usuuviri Yahova, utahenda mwoyo kigira yavo avaveeye ni linyola mu zinzira ziavo mba, anoho yavo avanyoora kigira lilohiza lie zing'anagani ziavo zindamanu mba.

⁸ Utava ni lihenda mwoyo, anoho uvutima mba, kigira yivi viosi viviika mundu mu vudinyu.

⁹ Yavo avasuuviraa mu Yahova, valanyora miandu ji lirova, navuzwa yavo avaveeye avadamanu, valatulizwa mu kivala yicho.

¹⁰ Ku ing'inga engekeeke, avandu vadamanu valatulizwa ho, ulavenyeleriza, navuzwa siulavanyoola mba.

¹¹ Navuzwa avandu vaveeye avahoma valanyora miandu ji kivala, kandi valamenya mu mirembe, nu kusangalira linyola lie miandu milahi ja Yahova.

¹² Mundu mudamanu alohizaa mu vwivisu kokora uvudamanu ku mundu mulahi, kandi amuhenzaa nu kumudunyira.

¹³ Navuzwa Yahova asekeliza avandu vadamanu, kigira, vaveeye ahimbi kuduuka ku lidiku liu kudivizwa.

¹⁴ Avandu vadamanu vatuliza vivavi viavo, kandi vuta vwavo kulasa nu kwita avandu vadaka na avadambi, kandi kusinza avandu vaveeye avalungi,

¹⁵ navuzwa vivavi viavo vene vilavita, kandi uvuta vwavo vulavunanywa.

¹⁶ Nivulahi mundu mulungi kuva nivikekeke, kuvita kuva mudamanu nu vutugi vunyingi,

¹⁷ kigira Yahova alatuliza zinguru ku avadamanu, navuzwa alanenehiza yavo avaveeye avalungi.

¹⁸ Yahova alindaa livamwoyo lia yavo avamuhulira. Kandi miandu ji lirova jilava jaavo mihiga ni mihiga.

¹⁹ Si valava nu vusaliri mu ing'inga yu vudinyu mba. Navuzwa valanyora viukulia vinyingi mu ing'inga yi inzara eveeye ho.

²⁰ Navuzwa avachamu valakuza; avasigu va Yahova valatulaho kuli vimuli viumaa ma vitulaho, kandi kuli umwochi gu vuuya, magukama.

²¹ Mundu mudamanu niyegobi kindu, siyilanyaa mba, navuzwa mundu mulungi niyegobi, aveeye ni zimbavasi nu vuyanzi kwiranya viosi.

²² Yavo vosi ava Yahova yagasiza, valamenya mu kivala mihiga ni mihiga, navuzwa yavo avalaamwa valatulizwa mu kivala cha avasuuvirifu.

²³ Yahova yimiliraa mundu mu zinzira ziaduukanaa alonde. Kandi asolaa yavo avamuyaanzizaa.

²⁴ Kali niiva valagwa hasi, Yahova alavakonya kusingira.

²⁵ Mu madiku gi lihindira liange, inzi sindaalola ku mundu musuuvirifu naleki Yahova mba, anoho avana veve nivasavaa chukulia mba.

²⁶ Vuli ing'inga yoosi Yahova ahaanaa vuzwa ku vandu veve vosi, kandi vaveeye ni ligasizwa.

²⁷ Utuli ku vudamanu vwi zing'ano ziosi, na okole uvulahi, na ndio ulamenya mihiga ni mihiga.

²⁸ Yahova ayaanza likalaga lirungi kandi sialekaa avasuuvirifu veve mba. Alavalinda mihiga ni mihiga. Navuzwa avandu vadamanu alavatuliza mu kivala cha avasuuvirifu.

²⁹ Avandu va Yahova, avalungi valanyora kivala chi miandu, na valamenya mu mihiga ni mihiga.

³⁰ Munwa gwu mundu mulungi, govoora amakuva govogeri vuli kazozo.

³¹ Amalago ga Nyasaye gaveeye mu mwoyo gwigwe, kandi sianyala kutura kugo mba.

³² Mundu mudamanu alohizaa machiriri nu kwenyeleriza kwita mundu mulungi,

³³ navuzwa Yahova sialamuleka mu zinguru zia vasigu veve vosi, kandi alamukinga lwaveeye mu liyaalwa.

³⁴ Musuuviri Yahova kandi muhuliri amalago geege; na ndio alamuha luyali nu kumuha miandu ji kivala, navuzwa avandu vadamanu valatulizwa mu kivala cha avasuuvirifu.

³⁵ Ing'inga indala ndaamanya mundu mudamanu, wi kilage kandi mululu ligali, yagumala kuli mudaragwa gwa Lebanoni ugwali mu marova amagunamu.

³⁶ Navuzwa lwinyima, mundu oyo siyaloleka mba; ndamwenya ligali, navuzwa siyanyooleka mba.

³⁷ Henza ku mundu mulahi kandi mundu mulungi; mundu wi mirembe aveeye ni visukululwi.

³⁸ Navuzwa avoni valadivizwa ligali, kandi visukululwi viavo vilatulizwa ho ligali.

³⁹ Yahova alahonyia avandu valungi, kandi alavasoola mu zing'inga ziu vudinyu.

⁴⁰ Yahova alavakonya kandi alavasoola, alavahonyia kutura ku avadamanu kigira vazizaa kuye vanyoore likingwa.