Zaburi 22 - KITABU KITAKATIFU

Lilira liu vusaliri vonene kandi ulwimbu lwi lizominya

¹ Nyasaye wange, Nyasaye wange, kigira ki ondeki? Inzi mali kukulilira ongonye, navuzwa sinyoolaa ovokonyi zana mba.

² Mbasu beyi nzanira ku ivi, Nyasaye wange, navuzwa siundivuliraa mba. Nzanira ivi uvudiku beyi, navuzwa sinyoolaa ovososi mba.

³ Navuzwa ivi Nyasaye oveeye mutakatifu, wamihaa kutura ku endeve yooyo yu vwami, na ivi niyie wa avandu va Isiraeli viizominyanga.

⁴ Avaguuga viitu vaviika lisuuvira liavo mu ivi. Vaasuuvira ivi, na ivi wavahonyia.

⁵ Vanira ku ivi, ma nivahona kutura mu vuhimwa. Vaasuuvira ivi na sivaviikwa mu zisoni kali hakuzu mba.

⁶ Navuzwa inzi simbeeye mundu kandi mba; mbeeye vuzwa eng'ende. Ndegeelizangwa nokokolerwa kehenyahenye na vandu vosi!

⁷ Vosi avaandolaa vaangolera kehenyahenye; Vaangunukiraa nukuusungusira mitwi.

⁸ Vavoola, “Ivi wasuuvira Yahova, kigira ki atakohonyia? Niiva Yahova akuyaanzaa, kigira ki atakokoonya?”

⁹ Yaali ivi, Nyasaye, uwaandeeta nimirembe kutura munda mwa mama wange. Kandi waandenda vulahi lwa ndaali mwana mudoto.

¹⁰ Kutura lidiku lia ndiivulwa, mbezaa mu vodendi vuvwo vulahi, kandi Nyasaye wange kazozo ivi oveeye kutura ing'inga ya ndiivulwa.

¹¹ Utava ihale ku inzi mba! Ikivi, keveeye ahimbi; na sihali numulala wokongoonya.

¹² Avasigu vanyingi vaangumbirizi kuli zigiriki; vosi vaangumbirizi kuli zigiriki zimbalava kutura mu kivala cha Bashani.

¹³ Zialaminyaa minwa jazio kuli zisimba, izifumaa kandi izienyaa kundandulanyia.

¹⁴ Zinguru ziange ziikami kuli amazi gasunduliywi ichova. Vigumba viange viosi viitiguki; mwoyo gwange guuyiinguki kuli ihura isalulukiziywi.

¹⁵ Madundu gange gumi kuli kijonjo; lulimi lwange luhandi mu zisaya. Ivi, Nyasaye, ondeki mu luguchi kuli mukuzu.

¹⁶ Kiduma cha avandu vadamanu kingumbirizi; vambodong'ani kuli kiduma chi zimbwa zinduru pa. Vatandulanyia makono nivirenge viange kuli isimba.

¹⁷ Vigumba viange viosi vinyala kololeka. Avasigu vange vaambeenzaa ni vaanyumikaa.

¹⁸ Vaakuba ikura ku zinguvu ziange kandi nivazigavulana.

¹⁹ O, Yahova, utava ihale ku inzi mba! Ivi mukonyi wange, hamba vwangu na ombonyie!

²⁰ Ombonyie kutura ku kivavi; honyia livamwoyo liange kutura kuzinguru zie zimbwa yizi!

²¹ Ombonyie kutura ku zisimba yizi; ombonyie kutura ku zinziga zie zimbogo.

²² Ndavolera avandu vange ivindu via umali kokora; ndakwizominya mu livugana liavo.

²³ “Mwizominye Yahova, munyi avatumikiri veve! Mumuhe luyali, munyi visukululwi via Yakobo! Mumusigamiri, munyi avandu va Isiraeli!

²⁴ Yahova siadunyiraa kandi sialekaa avadedekere mu kivi chavo mba. Siagirung'anaa kuvaleka mba, lwa vanira kuye avakoonye, avativuliranga.”

²⁵ Ndakwizominya mu livugana linene niliizuyi kigira aga umali kokora. Ndahaana visiuviliru via ndalagana imbiri wa Yavo avasigamiraa ivi.

²⁶ Avadaka valalia nukwiguta kuli venya; yavo avenyelerizaa Yahova valamwizominya! Nyasaye avagasize mihiga ni mihiga.

²⁷ Zihiiri ziosi zielirova valizuliza Yahova. Valagirung'ana kuyeeka kuye kutura havundu hoosi mu lirova avandu vizinimi ziosi kulirova valasigamira Yahova.

²⁸ Yahova aveeye mwami, kandi yamiha zihiiri.

²⁹ Avigingiri vosi, valamwinamira mu limusigamira; avandu vakuza vosi valamwinamira.

³⁰ Amakura gaazaa galamutumikira; gavalavolera amakura gaazaa amakuva ga Yahova.

³¹ Avandu vakikiri kwivulwa valavolerwa; “Yahova yahonyia avandu veve.”