Zaburi 149 - KITABU KITAKATIFU

Lwimbu lwi lizominya

¹ Mwizominye Yahova! Mwimbiri Yahova lwimbu luhia; mumwizominye mu livugana lia vandu veve vasuuvirifu!

² Musangare O, Isiraeli kigira uyu wamulomba. Musangare munyi avandu va Ziyoni kigira mwami winyu!

³ Mwizominye lieta lilie mu livina. Mukubi zindumba nuvukana mu limwizominya.

⁴ Yahova ayaanzizwa na vandu veve. Ahaanaa uluyali ku vahocha kigira liguuta liavo.

⁵ Leka avandu va Nyasaye valungi vasangale mu liguuta liavo, na vimbi nuvusangali vudiku vwosi.

⁶ Leka vahanzuki vudinyu ni vizominyaa Nyasaye; nivaveeye nivivavi viavo viugi zimbega ziombi ligali mu makono gaavo;

⁷ vaduuki kuguuta zihiiri, nukuhaana mageri ku avandu vatamanyi Nyasaye.

⁸ Vaduuki kovoha avami vi zihiiri zana niminyororo, kandi vavohe avanene vaavo niminyororo ji kivia;

⁹ ukuhaana mageri ku zihiiri zindi kuli Nyasaye amali kulaga. Yili nilio liguuta lia vandu va Nyasaye. Mwizominye Yahova!