Zaburi 140 - KITABU KITAKATIFU

Lisaala kigira likingwa kutura ku Nyasaye

¹ O, Yahova, ombonyie kutura ku vandu vadamanu; ukingi inzi kutura ku vandu vatindi.

² Vaganagana kongolera uvudamanu mu vwivisu kazozo. Vagemehiza uvulwani kazozo.

³ Zinimi ziavo ziveeye kuli zinzoka ziu vusungu vwukwita. Makuva gaavo gaveeye kuli uvusungu vwi kihirigoma.

⁴ O, Yahova, ukingi inzi kutura kuzinguru zia vadamanu, ukingi inzi kutura ku avandu vatindi. Avalohizaa liigwa liange muvwivisu.

⁵ Avikirage vategegi mutego mu vwivisu kugumira inzi vamali kotega imiveto jaavo ku inzi, kandi vavisi mitego kunzira vaduuki kung'umira.

⁶ Mbolera Yahova, “Ivi oveeye Nyasaye wange.” O, Yahova, hulira lianira liange liu kwenya ovokonyi!

⁷ O, Yahova, Mwami wange, muhonyi wange wizingulu, Ivi umali kukinga inzi kuli inguva mu vulwani.

⁸ O, Yahova, utaha avachamu cha venya mba; utaleka lilohiza liavo liu muvwivisu lizizagiliri mba.

⁹ Utaleka vasigu vange vave avaguuti mba; kola litihiza liavo ku inzi livagwiri aveene.

¹⁰ Leka amanda gakaa muliru gavagwiri aveene, leka vasiuvwi mbogo kandi vavuli kutura ichova kali hakuzu.

¹¹ Leka yavo avaginaa avandi vavuli kugasizwa mu kivala choosi, leka ikivi kikuniki avandu vikirage nukuvadiviza ligali.

¹² Inzi manya ndi Yahova akingaa lienya lia vadambizwa. Kandi ahaanaa likalaga liu vulungi ku vadaka.

¹³ Avalungi valizominya ivi ligali; avasuuvirifu valamenya imbiri woovo.