Zaburi 139 - KITABU KITAKATIFU

Nyasaye yamanya goosi

¹ O, Yahova, ivi umali kombenzeriza kandi umanyi inzi ligali!

² Ivi umanya inzi kandi vindu viosi viangolaa; ivi umanyirizaa zing'anagani ziange ziosi kali noveeye ihale.

³ Ivi ondolaa kali lwa nyinziraa anoho lwa sosa: Ivi umanya vikolwa viange viosi.

⁴ O, Yahova, kali ningikiri komoloma likuva liosi, ivi umanyi cha nziza kovora.

⁵ Ivi ungumbirizi ku zimbega ziosi, ivi ukingaa inzi nizinguru zizio.

⁶ Limanya liilio lia umanyi inzi liveeye liu musi ligali, livitaa ligali limanyiriza liange.

⁷ Nyara kuzia haliha kwiruka kutura ku ivi? Nyara kuzia haliha nduli imbiri woovo?

⁸ Kali ninzia kuduuka mwigulu, ivi oveeye yo: kali niimba ning'onaa hasi mu kilindwa; ivi oveeye mu.

⁹ Kali niimba niimbuluka kuzia ihale ligali kuvita Ivugwi anoho ninzia komenya havundu haveeye ihale ligali Imadioli,

¹⁰ ivi oveeye yo kunzimilira, kandi ivi oveeye yo okongoonya.

¹¹ Niiva ndakateevi kisundi kinguniki, anoho uvulavu vungumbilizaa, vugirung'ane vugwi uvudiku;

¹² navuzwa kali kisundi sikeveeye kimwamu ku ivi mba, na vudiku voveeye uvulavu kuli mbasu; Kisundi nuvulavu viveeye vilala viele ku ivi.

¹³ Ivi walomba vivero viange viosi; ivi wanyung'anyia harara munda mwa mama wange.

¹⁴ Nzizominyaa ivi kigira wanomba wokogenyia kandi wukuhuga. Miyinzi jijo jiveeye jokogenyia; ivi umanya inzi vulahi ligali.

¹⁵ Lwa vigumba viange viali nivilombwa, nukuviikwa harara vulahi ligali munda mwa mama wange, lwa ndaali nimbirukiraa muvwivisu, ivi wamanya ndi mbeeye mu.

¹⁶ Ivi wandola ningikiri kwivulwa. Madiku ga ndaheevwa gaali nigang'odeywi mu kitabu chicho, kali lilala kulio nilikikiri kutanga kuva ho.

¹⁷ O, Nyasaye, zing'anagani zizio ziveeye zindinyu ligali ku inzi kumanyiriza; ziveeye zinyingi ligali kali sizinyala kuvalizwa mba!

¹⁸ Niiva ndakazivalizi, ziakaveeye zinyingi kuvita muyeke. Lwa mbuukaa inzi ngikiri vuzwa niivi.

¹⁹ O, Nyasaye, ndakayanzi ivi witi avandu vachamu vosi! Ndakayanzi avarumindi vosi vatuli ku inzi.

²⁰ Vavoola vindu vidamanu ku ivi. Vamoloma vindu vichamu ku lieta liilio.

²¹ O, Yahova, ndunyiraa ligali yavo avadunyiraa ivi! Ndegelizaa ligali yavo avibaaraa ku ivi!

²² Mbadunyiraa nilidunya linene kuvita kegero. Mbavalizaa kuva kuli avasigu vange.

²³ O, Nyasaye, ambenzeriza ligali na umanye zing'anagani ziange. Ongerize na umanye zing'anagani ziumwoyo gwange.

²⁴ Ombeenze na olole niiva uvudamanu vwosi voveeye mu inzi na unzimiliri munzira ihindiraa mihiga ni mihiga.