Zaburi 118 - KITABU KITAKATIFU

Lisaala liu kusandiza ku liguuta

¹ Muhaane lisaandiza ku Yahova, kigira aveeye mulahi, kandi vuyanzi vwivwe vuhindiraa mihiga ni mihiga.

² Avandu va Isiraeli vavoole, “Vuyanzi vutali ne keheri vuhindiraa mihiga ni mihiga.”

³ Avasaalisi va Nyasaye vavoole, “Vuyanzi vwivwe vuhindiraa mihiga ni mihiga.”

⁴ Avandu vosi avasigamiraa Yahova vavoole, “Vuyanzi vwivwe vuhindiraa mihiga ni mihiga.”

⁵ Ndaanira ku Yahova mu kivi change, yandivulira kandi naamboholora.

⁶ Yahova aveeye harara ni inzi, kandi si nyara kutia mba. Mundu vuzwa anyala kongola kindiki?

⁷ Yahova aveeye niinzi, alangoonya, kandi ndalora avasigu vange nivaguutiywi.

⁸ Vuveeye vulahi kusuuvira mu Yahova kuvita kusuuvira mundu.

⁹ Vuveeye vulahi kusuuvira mu Yahova kuvita kusuuvira aviimiliri vi lirova.

¹⁰ Avasigu vanyingi vangumbiriza; navuzwa ndavaguuta kuzinguru zia Yahova!

¹¹ Vangumbiriza ku zimbega ziosi; navuzwa ndavaguuta kuzinguru zia Yahova!

¹² Vaangumberiza zimbega ziosi kuli zinzuki, navuzwa vasaambwa nukusima kuli muliru gwa malala, ndavaguuta kuzinguru zia Yahova.

¹³ Avasigu vange vazingilira nu vululu kandi ndaali ahimbi kuguutwa, navuzwa Yahova yangoonya.

¹⁴ Yahova aveeye zinguru ziange kandi lwimbu lwi liguuta; umali kugwa vohoonyi vwange.

¹⁵ Huliri zinyimbu ziu vusangali zie liguuta mu mahema gavasuuvirifu va Nyasaye, “Zinguru zinene zia Yahova zimali kokora yaga.

¹⁶ Zinguru zizie zileeti liguuta ku kunyi! Kandi zikoli gokogenyia mu vulwani!”

¹⁷ Inzi si ndakuza mba, navuzwa ndava mwoyo, kandi ndalandiza vikolwa viokogenyia via Yahova amali kokora.

¹⁸ Yahova umali kuhaana amageri malulu ku inzi ligali, navuzwa sialeki nguze mba.

¹⁹ O, Yahova, unziguliri virivwa vie Litembeli; na inzi ndingira mu nukuhaana lisaandiza kuye!

²⁰ Yiki ni kirivwa chi Litembeli lilie, avandu valungi veng'ine nivo avanyala kwingira mu.

²¹ O, Yahova nzizominyaa ivi kigira umali kuhulira lianira liange, kandi umali kumba liguuta.

²² Ligina liavumbaki vasuura, limali gugwa ligina linene liu mukoona.

²³ Yahova yakola yaga, gaveeye makuva gokogenyia imbiri wiitu.

²⁴ Yili ni lidiku lia Yahova amali kolomba! Gendi kuyaanze nu kusangara mu lio!

²⁵ O, Yahova, yaanza okohonyie! O, Yahova okohe liguuta.

²⁶ Nyasaye agaasizi umwami wingiraa mu Litembeli mu lieta lia Yahova! Kugasiza munyi kutura mu Litembeli lia Yahova!

²⁷ Yahova aveeye Nyasaye, ahaanaa vulavu ku kunyi, mutange lisavo ku ligenda kovodong'ana uvwali; mugiingi amatu ga makindu mu makono ginyu.

²⁸ Ivi oveeye Nyasaye wange ndahaana lizominya ni lisandiza ku ivi, ndalandiza ovonene vuvwo.

²⁹ Muhaane lizominya ni lisandiza ku Yahova kigira aveeye mulahi, kandi vuyanzi vwivwe vuhindira mihiga ni mihiga.