Zaburi 108 - KITABU KITAKATIFU

Lisaala kigira ovokonyi ku vasigu

¹ O, Nyasaye, mwoyo gwange gwituuliyi, ndimba nukukwizominya kazozo.

² Mwoyo gwange gwetegeki! Ndavuka nu kukuba vukana ni lidienyi!

³ O, Yahova, ndakusandiza hagati hi zihiiri. Ndakwimbira zinyimbu zie lizominya hagati ha vandu.

⁴ Uvuyanzi vuvwo vutaveeye nekeheri vuduuka mwigulu, kuvita ligulu; kandi uvusuuvirifu vuvwo vuduuka mu malesi.

⁵ O, Nyasaye, ukuminywe Mwigulu igulu, kandi uvukumi vuvwo vove ku lirova liosi.

⁶ Okohonyie nizinguru zizio; undivuliraa lisaala liange, kunangwa avandu va ivi uyanzaa vaduuki kohonywa.

⁷ Nyasaye umali komoloma kutura hatakatifu hehe: “Ndagavulanyia Shekemu: kandi ndagavulanyia livona lia Sukozi ku vandu vange, kigira mali kuguuta.

⁸ Kivala cha Gileadi keveeye change kandi kivala cha Manase keveeye change; Efuraimu aveeye igudwa yange yikivia; Yuda aveeye imbimbu yange yu vwami.

⁹ Navuzwa ndatumikira Moabu kuli ebenzeni yange yukwisavira ku. Ndalasa vilato viange ku Edomu, kuli kelolero ndi keveeye ichange. Ndahanzuka mu liguuta Vafilisitia.”

¹⁰ O, Nyasaye nivwaha umbilaa nduuki mu lidaala linene lieimbinga? Nivwaha unzimilira nduuki Edomu?

¹¹ O, Nyasaye, ivi ligali umali kukusuura? Ivi na mahi giitu, ulazia nikunyi kulwaana avasigu viitu?

¹² Okokonye, kuguuti avasigu viitu; ovokonyi vwu mundu sivoveeye kindu kali hakuzu mba.

¹³ Nyasaye naveeye olovega lwiitu kulaguuta, alakuguutira avasigu viitu.